Read zande Abia Kpenunga 3 Bible Online

Abia Kpenunga 3 - zande bible

Abia Kpenunga 3

¹Mi nga gu boro bi gberãngbi be ngbondo gako zinga.

²Ko ado re ku mbata yo ki mangi re mi nita rogo bitimo zanga imarago.

³Ni rengo ko ninasaka beko kuti re berewe na berewe na uru pitipiti.

⁴Ko mangi pasiore si nyorõ na kpotore a, ki kuadi amemere.

⁵Ko zi re, ki suradi re na nirãnirãpai na gberãngbi;

⁶ko mangi re mi niraki rogo nduunduu bitimo, wa agu yo naaima kpika bakuru yo.

⁷Ko vo ndugu pati re kirikiri, ka mi rengbe nga ka kura yo ya; ko vo re ni barõrõi azogbo.

⁸Ka mi vura yamba he ki kpari tipa undahe, ko naka ha aka.

⁹Ko dua ndugu pati gimi agene na sekeseke ambia, ko mangi gimi agene ni nuganuga ha.

¹⁰Ko du fere wa kina gu nya nga urisi pi ka sunguda rago, wa bahu rogo gau bagbuko.

¹¹Ko ingisi re ngba gi gene, ki sipi re rukutu; ko mangi re mi du ni sa re.

¹²Ko nuga gako mboto, ki moi re wa fuohe tipa no ho ni gako aguanza.

¹³Ko bafu gako aguanza ku kpotore yo.

¹⁴Mi sa tire ni ũmongo fu aboro dunduko; ki du ni gayo ũbia na uru pitipiti.

¹⁵Ko hisi re na nirãnirãpai, ko mbisi re na hihii ngua.

¹⁶Ko sa arindire ti zakara mbia, ki ya mi nugadi ku rogo akuke yo.

¹⁷Mbisimore zanga zereda, bangire go ti gu pai nga pa ngbarago;

¹⁸si du ya mi, “Omere nyasi, na pa gi kida ku be Yekova a.”

¹⁹Mo tíngidi pa gi gberãngbi na gi rungo, pa gu hihii ngua na kere nirãnirã he a!

²⁰Mbisimore natingida pa ha kindi, ki ninugadi ku kpotore yo.

²¹Ono mi natingida pa gere, si du du mi ti ni na maabangirise.

²²Ga Yekova inaapai anyasa nga wa sa te, gako weneringise adiga nga a te.

²³Si ni vovo ho na awiso dũ; ga yososopai du ni bakere he.

²⁴Mbisimore naya, “Yekova nga gi kparakpara he, si du mi amáa bangire ti ni ti ko.”

²⁵Yekova namanga apai ni wene he fu agu yo nasunguda ko, fu mbisimo gu ni nagbata ko.

²⁶Gu pai ngba nga ka boro du na maabangirise ki nisungudi ga Yekova bata ni zera.

²⁷Si angba fu paranga kumba ni tindi gonga ti rago parangani.

²⁸Ni súngu ni sa ni ki ongo kii, ho moi yo gonga ni ku gorõni.

²⁹Ni zógo ngbani ku nvutu yo― si ngia ka maabangirise du.

³⁰Ni ária bagani fu gu ni nata ni, ki idi pa soapai.

³¹Bambiko Gbia abá nga aboro ku sa yo nye anye kindi te,

³²ono ka ko vura tona pa rungo, ko adú adu na nunga kuti sangba gako inaapai du kpaima;

³³bambiko ko arungosi nga awiri aboro mbiko nyemuhe du ti ko te, watadu fu rungo fu yo a te.

³⁴Ka sadiaga gu zizi aboro dunduko nga ga kpotosende yo ku tii ndue yo,

³⁵ka aria gu rurupai nga ga boro bara bangiri gu Ko nga Bahe ki susi,

³⁶ka gbarasa boro rogo gani pai, Gbia aida nga na agi apai te re.

³⁷Da rugu pai, si ki ye ka manga, ka Gbia ata fu nga rugute tipa ha mbata ya?

³⁸A nga gbegberẽpai na wenepai naye ngba kina gu Ko nga Bahe ki susi, te?

³⁹Tipagine ka unga boro akpakana he ti ni, nga kina boro boro, tipa gu mbusa du tipa kina gani ingaapai?

⁴⁰Ani ásadi gaani apai ki wisigi he, ki karaga tirani berewe koyo du Yekova ni!

⁴¹Ani túmba kpotorani yo na aberani a fu Mbori du ngbangbaturũ yo; ki ya

⁴²“Ani ti ndika ki sa mungu; ono mo ata vu nga rani te.

⁴³“Mo ukadi tiro ni zinga ki nido fuo rani; mo imi rani zanga nunga.

⁴⁴Mo dadi tiro ni dubo, ya ka kpe susi nga koyo du mo ni wa sa ya.

⁴⁵Mo sa rani wa mirĩahe wa rufura ahe ku dagba aboro yo.

⁴⁶“Avurarani dunduko nasenga rani.

⁴⁷Gunde na due gbina ye sa rani, payasi pa ahe na gbarasapai du fu rani.

⁴⁸Bangire naga na aume wa kina adi, bambiko be pa gbarasa gimi aboro.

⁴⁹“Aume aúka bangire yo kindi, ka ami akáta nga wa sa ya,

⁵⁰daho Yekova ka ngera ni ngbangbaturũ yo ki bi he ku sende no.

⁵¹Bangire nafu rungo fere, bambiko pa ga ngasu ade apai dunduko nga ga gi bakporo yo.

⁵²“I agbata re wa i nagbata zire, nga agu aboro naadu ni avurare zanga ndupai.

⁵³I ba re ni ungare ku rogo due yo, ki bafu ambia ku auru re.

⁵⁴Ime ki fu ri re; mi ki ya, ‘Mi ingi kindi’.

⁵⁵“Ako Yekova, mi ayambu he ti rimoro mburu due yo.

⁵⁶Mo agi gi kpezungaditise, wa mi aya. ‘Ka mo kísi nga turo tipa gi kpe nga ga undahe ya!’

⁵⁷Mo ambedi na mi ni gu rago mi ayambu ro; mo aya, ‘Ka mo gúnde nga ya!’

⁵⁸“Ako Gbia, mo azúngadi he tipa gi pai, mo atumo ungare.

⁵⁹Ako Yekova, mo abi gu gbegberẽ pai i amangi he kuti re; mo sári ngbanga gi pai.

⁶⁰Mo ima bi gayo irabape dunduko na agu apai dunduko i asangi he kuti re.

⁶¹“Ako Yekova, mo agi gu gayo soapai kuti re, na agu apai dunduko i asangi he kuti re.

⁶²Sangba agu yo naazuba re, na gayo berã, si du kuti re na uru pitipiti.

⁶³Mo bí nga yo wa sungu yo sande, na wa guari yo ku ari, mi nga gayo ũbia.

⁶⁴“Ako Yekova, mo ambúsa yo, kuti gu mangaapai nga ga beyo.

⁶⁵Mo afú nyaka ngbaduse fu yo; ga motiwa adú ku ri yo.

⁶⁶Ako Yekova, mo adó yo rogo ga zinga ki gbarasi yo tii gamo angbangbaturũ no.”