Read zande Abia Kpenunga 5 Bible Online

Abia Kpenunga 5 - zande bible

Abia Kpenunga 5

¹Ako Yekova, nga gu pai naye ku ri rani. Mo ngére, ki bi nga gaani gbarasarimo!

²I sa gaani ũkumbo fu kungba aboro, gaani akporo fu akare.

³Ani nga awirinyaure, abarani akpiki dũ, anarani ki du ni adekurugbo.

⁴Ani nambira kina gu ime ani angbe ni marã. Ani nangbe gaani nyake a.

⁵I namanga rani nyanyaki na gonga ti gororani, ani mbu, ongoda ti rani te.

⁶Ani zi berani na aEzipeto, na aAsura ka bi riahe rengbe.

⁷Abarani mangi ingapai, ka i adu nga ho berewe ya, ono ani nakpida pa gayo irairaapai.

⁸Akanga nazoga rani, boro du nga ho sa ka batasi rani be yo te.

⁹Ani nabi gaani riahe be dungbaapai be kpio, be gu basape du ngbakungba yo.

¹⁰Kpotorani fafoi wa vuru gbigiwi yo, be gu faarago nga ga gberãngbi.

¹¹I namanga ade Siona yo, na ngasu ade rogo ga aYudo abaakporo.

¹²I naasa abazogo ku ari ti abeyo, i airisa nga abaakumba te.

¹³I nasosoda paranga akumba i sa ahe; akumbagude ki nikotoko be tindiro nyake.

¹⁴Gbinza akumba mbu pa sunga ngbadimo bakporo yo, paranga akumba mbu pa taka gayo ũworo ahe.

¹⁵Gu ngbarago du kpotorani yo si nyasi; gaani dogbere sa tihe ku rogo kpenunga.

¹⁶Kpakpari irisa tiwi ri rani yo; rungo du fu rani, bambiko ani mangi ingapai!

¹⁷Bambiko gere he amaka rani ti ni kpotorani yo; bangirani ki du tataita be agi apai re,

¹⁸bambiko Bagangara Siona du ngbakungba yo kina ahúa nata ri he.

¹⁹Ako Yekova, ono mo nazoga rago nye anye kindi; ga mbatabakindo nye fu gu rikaaboro ki du fu gu kura rikaaboro.

²⁰Tipagine go bangiro ti ni ti rani kindi? tipagine mbu mo rani ti ni were tipa gbanga rago?

²¹Ako Yekova, mo káraga rani koyo du mo ni berewe, si du ani ka karaga tirani ti ni! Mo mbákaai pa gaani arame berewe a wa si adu mbata!

²²Watadu mo ginaiga rani agindiga ni rengo? mo zingi kuti rani gbe?