Read zande Yezekere 1 Bible Online

Yezekere 1 - zande bible

Yezekere 1

¹Si ki ta du wa gere ti gu garã nga 30, ti biama diwi, ti rameru bisue, wa mi adu ti ngba gu di nga Kebara, dagba gu zizi yo i aga na yo, angbangbaturũ aza, mi ki bi yuguyuguapai nga ga Mbori

²Ti rame diwi bisue ti gu bisue garã nangia ga zia Bakindo Yoyakina ni bagibagi ko,

³sangba Yekova ki ye koyo du Yezekere ni nangia boromotumo, nangia wiri Buzi, ringara aKasado yo ti ngba di nga Kebara. Be Yekova ki du yo ri ko.

⁴Wa mi Yezekere angere, mo ngére, bakamikami yuge ki niye nodiyo, bakere dubo ki du, na imaima imarago pati he kirikiri, we ki nikĩ ki niikpira kindi, nzerehe adu rogo we yo wa sirigi.

⁵Kpia unga anya ki kuru biama dagba ha yo. Ngbanyara ki du wa gere: kpiara adu wa ga aboro,

⁶ono ami ni ba sa sa adu na akpakpura ni ba biama, ami ni ba sa sa adu na apupora ni ba biama.

⁷Ndura adu ni taĩtaĩ he sua, kpandura yo ki du wa kpandu wiri bagara yo; nzerera ki du wa gu sirigi kõ yo ho.

⁸Tii apupora yo ti pavura biama bera adu wa ga aboro. Agu ra biama re adu na akpakpura biama na apupora biama were:

⁹pupo gu ru azadi pupo gu kura ru; ami ni ba sa sa ki nindu kina nzunzu ku mbata yo, zanga sa tira wa ami andu.

¹⁰Tipa kpia kpakpura, ami ni ba sa sa adu na kpakpura wa ga boro ku kpakpura yo; ami biama adu na kpakpura wa ga bahu ku pavuru rira ku kumbabe yo, ami biama adu na kpakpura wa kpakpu babagara ku pavuru rira ku garebe yo, ami biama ki du na kpakpura wa ga dingimo ku mburu takora yo.

¹¹Akpakpura adu na angbatunga wa gure. Apupora ki du ni zaragazaraga ha ku ari; ami ni ba sa sa adu na apupora ni ba ue, nga gu zadi ga kura ru ni ba sa sa, gu ue ki dadi kpotora.

¹²Ami ni ba sa sa ki nindu kina nzunzu ku mbata yo; yo toro akpi nyemu ka ndu ku ho ni, ami ki nindu kina koyo, zanga sa tira wa ami andu.

¹³Dagba gu unga anya yo re he adu yo nadu wa kingiriwe, wa ima we nzinga nandu koyo na kono dagba gu unga anya re; wa adu imaima, ikpira ki kuru we yo.

¹⁴Gu unga anya re ki nindu ni ngarã koyo na kono, wa nzere ikpira gumba.

¹⁵Were wa mi angere koyo du gu unga anya ni re, mi abi ngbagida auru kpotosende pati gu unga anya biama re, ngbagida sa tipa ra ni ba sa sa.

¹⁶Tipa kpia agu angbagida re na waĩ si adu, were si adu: ngbanyaha adu wa nzere mbia nga rusoriso; wa du he biama kpiaha adu kina wa sa, bibi kpiaha adu wa ngbagida vuru kura ngbagida yo.

¹⁷Ho si andu ni, si andu kina ti gu pavuruhe sa wa si adu biama zanga sa tihe wa si andu.

¹⁸Agu angbagida biama re pangbaha ki du ti ni ni iiriwoho; si adu na abangirihe ti ni kirikiri.

¹⁹Ho gu unga anya andu ni re, angbagida ki nindu pati ra; ho gu unga anya aniguari ni re auru kpotosende, angbagida ki guari a.

²⁰Kina koyo toro akpi nyemu ka ndu ku ho ni, ami ki nindu koyo a, angbagida ki guari wa sa na ami; bambiko toro gu unga anya re adu rogo agu angbagida yo re.

²¹Ho agu ra andu ni re, agi ahe ki nindu re a; ho agu ra aru ni re, agi ahe ki niru re a; ho agu ra aguari ni re auru kpotosende, angbagida ki guari ku pati ra; bambiko toro gu unga anya re adu rogo angbagida yo.

²²Ku ba ri gu unga anya yo re kpia ari ki du koyo, nikĩ wa ngana, ni kparakakparaka ha ku rira.

²³Apupora ki du ni zaragazaraga ha nzunzu sua ku tii gu kpia ari re, gu koyo du kura ha ni; gu unga anya re ki du na apupora ni ba ue dadi kpotora.

²⁴Ho ami andu ni, mi agi woro apupora wa paa dungu aime, wa fugo gu Ko du na tandu apai dú, wa woro gbarakagbaraka pai nga ga paa bakere rimbasa. Ho ami aru ni zaa, ami ki zogo apupora ku sende.

²⁵Fugo ki ye ari yo ngbangbaturũ yo ku ba rira yo; ho ami aru ni zaa, ami ki zogo apupora.

²⁶Ku ba rira ari yo ku ngbangbaturũ yo he adu yo wa kina mbatabakindo, ngbanyaha ki du wa gu mbia nga safira; he ki sungu ku ari ri kpia mbatabakindo nadu wa kina kpia boro.

²⁷Nzere sirigi ki tona ti gu pako nadu wa kpia dimoko ki ndu ku riko yo, wa kpia we kirikiri pati ko; ku sande ti gu he nadu wa kpia dimoko mi abi he wa kina we, imaima imarago ki du kirikiri pati ko.

²⁸Kpia gu imaima imarago re kirikiri adu wa kpia wangu, nga gu ru nikuru mai yo rago na mai. Were kpia gu taarimo nga ga Yekova adu ni yuguyugu he. Ho mi abi he ni, mi ki ti ni kpakpure ku sande, mi ki gi fugo boro ni nigumba pai.