Read zande Yezekere 11 Bible Online

Yezekere 11 - zande bible

Yezekere 11

¹Toro ki tumba re ku ari, ki ye na mi sa ngbadimo du ku uroyo du ti ga Yekova bambu, nangera ku uroyo. Mo ngére, ti gene ngbadimo aboro adu yo 25; mi ki bi Yazanaya wiri Azura dagba yo yo, na Perataya wiri Benaya nangia abazogo aboro.

²Toro ki ya fere, “Wiri boro, agi yo re nga agu aboro nasanga irairapai ki nifu gbegberẽ rugute rogo gi bakporo re;

³naya, ‘Rago dua abambu ambeda nga te; gi bakporo re wa akoro, ani ki du nga pasio.’

⁴Si du, Ako wiri boro, mo gúmba pai kuti yo wa nebi, mo gúmba pai.”

⁵Ga Yekova Toro ki zorõ ku ri re, ko ki ya fere, “Mo yá, ya Yekova wẽ: Ako ngbatunga aYisaraere, wo berẽ oni he; bambiko mi ini agu apai nga gu ye ku berãroni yo.

⁶Oni ngeesi gaoni kangba rogo gi bakporo re, ki hisi gaha agene bakporo ni akangba.

⁷Si du ya Gbia MBORI wẽ: Gu gaoni kangba pigi oni he rogo ho yo, si nga pasio, gi bakporo re nga akoro; ono i akúsa roni rogo ho yo.

⁸Oni agunde be basape; mi ayé na basape ku ri roni, wo poi Gbia MBORI.

⁹Mi ki kusi roni rogo ho yo, ki fu roni ku be kungba aboro, ki sari sarangbanga kuti roni.

¹⁰Oni akpika be basape; mi asára ngbanga roni ti ngbandarago nga ga aYisaraere; oni ki ini he ya mi nga Yekova.

¹¹Gi bakporo re adu nga ni gaoni akoro te, oni adu nga ni pasio rogo ho a te; mi asára ngbanga roni ti ngbandarago nga ga aYisaraere;

¹²oni ki ini he ya mi nga Yekova; bambiko oni apeka nga sangba gimi rugaapai yo te, ka oni amanga nga pa gimi asarangbanga a ya, ono oni amangi pai kina kuti gu rugute nga ga arikaaboro nga agu yo du pati roni kirikiri.”

¹³Si ki ta du wa gere, ho mi agumba pai ni wa nebi, Perataya wiri Benaya ki kpi. Si du mi ati ku sande ni kpakpure, ki nikpari ni wawa, ki ya, “Ako Gbia MBORI! Mo nadigisa pa gu yangara yo adigisa nga ga aYisaraere yo?”

¹⁴Sangba Yekova ki ye kono du mi ni ki ya,

¹⁵“Wiri boro, awirinamo, zavura ndikidi awirinamo, nga gamo abadiazia, na ngbatunga aYisaraere dunduko, i dunduko nga agu yo araki Yerusarema yo aya tipa yo, ‘I ndu tuturu ti Yekova; i fu gi ringara re fu rani ni gaani.’

¹⁶Si du mo yá fu yo, ‘Ya Gbia MBORI wẽ: Wa mi avura ndu na yo tuturu ku sa yo ku dagba arikaaboro yo, wa mi avura gbandaka yo ku rogo aringara yo vuru, ono mi adu fu yo ngbutuko wa kparakpara ba rogo agu aringara yo i andu ku ho ni.’

¹⁷Si du mo yá fu yo, ‘Ya Gbia MBORI wẽ: Mi adúngura roni dagba aboro yo du, ki tiria roni ti agu aringara oni agbandaka ku rogo ho, mi ki fu ga aYisaraere ringara fu roni.’

¹⁸Ho i akada ni koyo, i aróga kere ahe yo dunduko ku sa yo na gaha kere gbegberẽ asino dunduko.

¹⁹Mi afu kura ngbaduse fu yo, ki moi vovo toro ku rogo yo yo; mi ki kusi nyaka ngbaduse ngbaduyo yo ki fu ngbadu boro fu yo,

²⁰ya i nipeke sangba gimi rugaapai, ki nika kuti gimi arugute ki nigi sangbaha; i ki du ni gimi aboro, mi ki du ni gayo Mbori.

²¹Ono tipa agu yo ngbaduyo nandu fuo gayo kere ahe na gayo kere gbegberẽ asino, mi aíra bape gayo mangaapai kina ku ri yo, wo poi Gbia MBORI.”

²²Si du akeruba ki zara apupoyo, na agu angbagida ki du pati yo a; gu taarimo nga ga Mbori nga ga aYisaraere ko adu ri yo.

²³Ga Yekova taarimo ki guari dagba bakporo, ki ru ri gu bagangara nadu ku pavururago ku uroyo pati bakporo.

²⁴Toro ki tumba re ku ari yo ki ye na mi rogo pa yuguyugupai yo be ga Mbori Toro ku Kasada yo, koyo du agu yo ni i aga na yo. Gu yuguyugupai mi abi he si ki ga ku ari yo pati re.

²⁵Mi ki gumba pa agu apai Yekova ayugu he fere dunduko fu agu yo i aga na yo.