Read zande Yezekere 16 Bible Online

Yezekere 16 - zande bible

Yezekere 16

¹Sangba Yekova ki ye berewe kono du mi ni ki ya:

²“Wiri boro, mo yúgu ga Yerusarema kere gbegberẽ asino fu he,

³ki ya, Ya Gbia MBORI fu Yerusarema wẽ: Pa ga enga na pa vungaro si nga ga ingara aboro Kanana; bamo angia boro Amora, namo ki du ni boro Eto.

⁴Ono tipa pa batika ro, ti gu uru i avungu ro i ayera nga giri mbukusero te, i azunda nga ro na ime ka girisa ro a te, i ambeda nga ro na tikpo a te, i aukadi nga ro ni gbanga roko a te.

⁵Nungaro adu nga bangiri boro, ka manga gu dagba agi apai yo re foro ni inapai foro sa te; ono i aba ro ku zegi yo ku baati yo, bambiko mo adu ni sogosogo boro, ni gu uru i avungu ro.

⁶“Ono ho mi asusi ni pati ro, ki bi ro mo niwaranga rogo kurero, mi aya foro ho mo adu ni rogo kurero yo, ‘Mo aú ni ungaro,

⁷ki sono wa rúrúhe ati yo.’ Mo ki sono ki sa tiro ni bagbanga ro ki da ti pa paranga de; mamuro ki kuru, mangeriro ki sono; ono mo ki au ni kundiri ro ni ku ro.

⁸“Ho mi asusi ni pati ro berewe ki ngere koyo du mo ni, mo ngére, garãro adu nga garã nyemuse; mi ki gbaragi gi gbanga baukadi ku auru ro, ki dadi kundiri ro: ii mi apazua ro ni gi zungahe foro Ki mangi mokido na mo, wo poi Gbia MBORI, mo ki sa tiro ni gimi boro.

⁹Mi ki zundu ro na ime ki girisi ro ti kurero, ki mbedi ro ni nzeme.

¹⁰Mi aukadi ro na kendegekendege roko ki sosoro kpoto ku nduro yo, mi aukadi ro na roko ni tutu ndindn giri nzibi kí dadi ro ni fiofio roko.

¹¹Mi ki fongo ro na wene aufongo a, ki moi abenge ku bero yo, na azogbo ku goro.

¹²Mi ki moi tongo ku õro yo, na úfongo tue ku turo yo, na bawene kpakpari bakindo ku riro yo.

¹³Were mi afongo ro na dahabu na feda a, ga remu ki ngia roko ni tutu ndindii giri nzibi, na fiofio roko, na kendegekendege roko; mo ari fufurú ngungo, na nzeme anyege na nzeme. Mo ki sono ki susi ni wene ngbanyaro, pa ro ki du wa ga abakindo.

¹⁴Ga worimo ki ndu ku dagba arikaaboro bambiko wene ngbanyaro, bambiko si adu teketeke mbiko gu bairisa nga gu mi afu he foro, wo poi Gbia MBORI.

¹⁵“Ono mo akida kina kuti pa wene ngbanyaro, ki mangi bari bambiko worimoro, ki gbaragi ga pa bari fu agu yo nasusa.

¹⁶Mo arogo bete gamo aroko, ki mangi tumbatumbaarago foro mbedi yo ho na rangi, mo ki mangi bari ri he; wa gu he nadu nga mbata wa sa ya, si adú nga wo kindi a te.

¹⁷Mo adi ga wene aufongo nga ga gi dahabu na ga gi feda, nga gu mi afu he foro, ki mangi kpiaahe foro ni kpia akumba, ki nimangi pai ni sino pa bari na ni;

¹⁸mo ki di ga kendegekendege baukadi ka dada ha na ni, ki moi gi nzeme na gi fuõngua bangirihe.

¹⁹Gi riahe a wo, nga gu mi afu he foro mi arigi ro na fufuru ngungo na nzeme, na nzeme anyege mo amoi he barangba gu kpiaahe ni wene fuõhe a, wo poi Gbia MBORI.

²⁰Mo ki rogo awiro nga akumbagude na adegude, nga agu yo mo avungu yo fere, mo atumo na agi yo re fu he si riti yo. Ga pa bari adu ni wiri toni pai

²¹ya mo imi awire ki kusi yo dd wa motumo ni we fu he?

²²Rogo gamo kere gbegberẽ asino dunduko na gamo pa abari mo atingida nga pa rago parangaro te, ho mo adu ni ni kundiri ro ni ku ro, niwaranga rogo kurero.

²³“Gbia MBORI naya: Na gberẽ he, na gberẽ he foro! Fuo gamo gbigbita apai dunduko,

²⁴mo adua basosono bambu foro, ki dua bagbanga ba rogo abaagene ni ba sa sa foro;

²⁵ti ri agene bakporo mo adua bagbanga aba yo ki nibagi wene ngbanyaro yo, ka abaga tiro fu agu yo nasusa, ki ningeesi pa ga bari.

²⁶Mo amangi bari na aEzipeto a, nangia akpinyemu gbegberẽpai naaraka mbembedi na mo, ki ngeesi ga pa bari, ka gara gi zinga ku ri ro.

²⁷Mo ngére, si du mi taĩ bere sa ro, ki umbasi gu he i aringbisi he foro, ki kusi ro sa gu nyemuhe nga ga asogoro, nangia awiri aFereseto nga ade, nga agu yo nadu na zee be ga wasiwasi asino.

²⁸Mo amangi bari na aAsuro a, bambiko mo arengba nga na mbi be he te; ii, mo amangi bari na yo, ka mo ambi nga kindi ya.

²⁹Mo angeesi ga pa bari a wo na ringara bagaahe nga ga aKasado; zavura na gere mo ambi nga a te.

³⁰“Na rungbura kpotoro yo, wo poi Gbia MBORI, wa mangi mo agi apai dunduko re, nga gu mangaapai nga ga wasiwasi irabari;

³¹nidua ga basosono bambu ti ri agene bakporo dunduko, ki nimangi gamo gbanga aba rogo abaagene dunduko. Ono mo adu nga wa irabari te, bambiko mo apayasi pa marã ngbehe.

³²Didiae nga debari nga mo nadia kungba aboro ku ba kumbari!

³³Akumba nafu agamahe fu airabari dunduko; ono mo afu gamo agamahe dunduko fu akpinyemuro, nifu marã mabirimo fu yo i ye koyo du mo ni rogo pavururago dunduko tipa ga pa bari.

³⁴Si du mo adu akia ti kura ade rogo ga pa bari: a nga boro sa nasana ro ka manga bari na mo te; mo ki fu marã ngbehe, ono i afu nga marã ngbehe foro te; si du du mo ti ni kia.

³⁵“Si du, Ako debari, mo gi ga Yekova pai:

³⁶ya Gbia MBORI wẽ, Bambiko pa ga zee adu ni ku he, na kundiri ro ki du zanga dada ha rogo ga pa bari na akpinyemuro, bambiko gamo kpiaahe nga ga kere gbegberẽ asino dunduko, na bambiko kure awiro nga gu mo afu he fu yo,

³⁷si du, mo ngére, mi adúngura akpinyemuro dunduko nga agu yo rago angba ti ro mbiko yo, agu yo dunduko mo akpi nyemu yo, na agu yo dunduko mo asogo yo; mi adúngura yo kuti ro rogo pavururago du, ki kusi kundiri ro fu yo, ya i bi kundiri ro dunduko.

³⁸Mi ki sari ngbanga ro wa i nisari ngbanga agu ade nabasa pa rogatise ki uka kure. Mi ki ye na kure ngariangaria zinga na ga deringo ku ri ro.

³⁹Mi ki fu ro ku be akpinyemuro, i ki bafu ga basosono bambu ku sande ki kuadi gamo gbanga aba ku sande; i aúra gamo aroko ti ro ki rogo ga wene aufongo ti ro, ki mbu ro ni kundiri ro ni ku ro.

⁴⁰I ayé na rimbasa agu aboro kuti ro, i asópa ro ni ambia ki ru ro puu na gayo abaasape.

⁴¹I ki zokodi gamo abambu ki sari ngbanga ku ri ro ku bangiri badungu ade; mi amanga ro mo mbu pa manga bari, ka mo afu nga marã ngbehe berewe ya.

⁴²Wo mi ka nyasa gi ngariangaria zinga kuti ro, gi deringo ki guari ti ro; mi azéra, ka mi azínga nga berewe ya.

⁴³Bambiko mo atingida nga pa agu arame nga ga parangaro te, ono mo aegerãsi re ni agi apai re du; si du, mo ngére, mi aíra bape gamo mangaapai kina ku ri ro, wo poi Gbia MBORI. “Mo mangi pa wasiro gbia kuti gamo kere gbegberẽ asino dunduko te?

⁴⁴Mo ngére, agu aboro dunduko nagumba asanza i nikagumba gi sanza re tipa ro, ‘Wa du pa na boro, wo pa wiriri nga de ka du.’

⁴⁵Mo nga wiri namo ni de, nasoga kumbari na awiriri; mo ki du nga wirina awirinamo, nga agu yo nasoga akumbayo na awiriyo. Namo angia boro Eto, bamo ki ngia boro Amora.

⁴⁶Unvuruamo ki ngia Somorona, naraki na awiriri ni ade ku pati ro ku nodiyo; tamero ki ngia Sodomo naraki na awiriri ni ade ku pati ro sudiyo.

⁴⁷Ono peka fuo kina gayo apai arengba nga bangiro te, watadu manga pai kuti gayo kere gbegberẽ asino a te; rogo kina wiri toni rame mo awasi tiro ki susi yo dunduko rogo gamo apai dunduko.

⁴⁸Wa du mi ni ungare, wo poi Gbia MBORI tamero nga Sodomo na awiriri ni ade amanga nga wa mo amangi na awiro ni ade te.

⁴⁹Mo ngére, gere nangia gu irairapai nangia ga tamero nga Sodomo: ri na awiriri nga ade, adu na ruka, na dungu ariahe, ki du zezere na pa sunge, ka i aunda nga rungorungo aboro na airazingo ahe ya.

⁵⁰I akiisi pa tiyo, ki mangi kere gbegberẽ asino ku bangire; si du mi arogo yo ti ni ku sa yo, ho mi abi he ni.

⁵¹Ga Somorona ingaapai arengba nga na kina bebere gamo ingaapai te; mo amangi kere gbegberẽ asino ki susi yo, ki sa awirinamo nga ade i du wa ruru aboro mbiko gu kere gbegberẽ asino nga gu mangi mo.

⁵²Mo tigamo, mo kpídi pa ga pa wasiro, bambiko mo sari ngbanga fu awirinamo nga ade; bambiko gu ingaapai mangi mo si ni kere gbegberẽ asino ki susi gayo, i du ni ruru yo ki susi ro. Si du mo tigamo mo dú na zee, ki kpidi pa ga pa wasiro, bambiko mo sa awirinamo nga ade i wiri ruru aboro.

⁵³“Mi akáraga yo gene zia yo yo, Sodomo na awiriri nga ade, na Somorona na awiriri nga ade, na gamo zizi yo a dagba yo yo,

⁵⁴ya mo kpídi pa ga pa wasiro ki du na zee be agu apai dunduko mangi mo, ki sa tiro ni ũwasa fu yo.

⁵⁵Na tipa awirinamo a nga ade, nga Sodomo na awiriri nga ade, i akáraga tiyo sa gayo bambata apai, na Somorona na awiriri nga ade, i akaraga tiyo sa gayo bambata apai a; mo na awiro nga ade akáraga tironi sa gaoni bambata apai.

⁵⁶Sodomo nga tamero ni de adu nga ni sanza ngbaro yo ni gu uru nga ga ga enda te?

⁵⁷mbata ga gbigbitapai nikadu ni kusikusi he te? Awere mo sa tiro ni ugbarasarimo wa kina ri tipa awiri Edome nga ade na gayo aboro ramukporo, na tipa awiri aFereseto nga ade, nga agu yo du kirikiri pati ro napayasi ro.

⁵⁸Mo kpidi pa gu mbusa nga ga wasiro na ga kere gbegberẽ asino, wo poi Yekova.

⁵⁹“Ii, ya Gbia MBORI wẽ: Mi amánga na mo wa mo amangi he nipayasi pa zungahe nibasa pa mokido,

⁶⁰ono mi atingida pa gi mokido na mo naadu ti rago parangaro, mi ki nyakasi nyenye mokido na mo.

⁶¹Si du mo atingida pa gamo apai, zee ki ki mangi ro ho mi ka roga awirinamo ni nga ade nga unvuruamo na tamero a, ki fu yo foro wa awiro nga ade, ono mbiko gu mokido du dagba rani na mo te.

⁶²Mi anyákasa gi mokido na mo, mo ki ini he ya mi nga Yekova,

⁶³ya mo tingidi he ki du mumungo, ka mo azá nga ngbaro berewe wa sa ya bambiko ga wasiro, no mi Ka vu ro ni ti agu apai dunduko nga gu mo amangi, wo poi Gbia MBORI.”