Read zande Yezekere 18 Bible Online

Yezekere 18 - zande bible

Yezekere 18

¹Sangba Yekova ki ye kono du mi ni berewe ki ya:

²“Tipagine mo nagumba gi sanza re ti ni tipa ringara aYisaraere? ‘Abaroni anari kakaĩ rindi bakakue, rindi agude ki niimi be he’.

³Wa du mi ni ungare, wo poi Gbia MBORI, mo agúmba nga gi sanza berewe dagba aYisaraere te re.

⁴Oni ngére, ambisimo aboro dunduko nga gimi; mbisimo ba a wa mbisimo wirini nga gimi: gu mbisimo ka ainga pai si akpí akpi.

⁵“Ka boro du ni ruru ni ki nimangi apai ku sangba rugute yo na rurupai―

⁶ka ni ari nga he ri abaagangara yo ya, watadu tuka bangirini ka ngera koyo du kpiaahe ni nga ga ngbatunga aYisaraere a ya, abirikosi nga tini na dia kurani watadu ra na de ti rago gari kaza ade ya

⁷arungosi nga boro ya, ono ni nakaraga ga irabape ngbaanga fu ni, ka ni atuka nga ahe ni zuu ya, ono ni nafu gani riahe fu aboro gomoro ki niukadi kundiri yo ni roko,

⁸ni afu nga marã tipa mokiisa te, ka ni adia nga gu he kiisi yo ho ku ri he a ya, ono ni adia beni ku sa yo ti irairapai, ki nisari ndikidi sarangbanga dagba boro na kurani,

⁹ki nipeke fuo sangba gimi rugaapai, ki nika kuti gimi asarangbanga ni nga ruru ni, ni anyé ni ungani ni rengo, wo poi Gbia MBORI.

¹⁰“Ka ni vungu gude nga batuka, nga baukakure, namanga gu dagba agi apai re,

¹¹ka ni amanga nga gu pai rengbe ya, ono ni nari ahe ri abaagangara yo, ki birikosi dia kurani,

¹²ki rungosi rungorungo ni na irazingo he, ki tuka ahe ni zuu, ka ni aberã nga pa karaga ngbaanga ya, ono ni ki tuka bangirini ka ngera koyo du kpiaahe ni, ki nimangi kere gbegberẽ asino,

¹³ki nifu marã tipa mokiisa, ki nidi gu kiisi yo ho; ni anyé tie ni ungani? Ni anye nga ni ungani te. Ni mangi gi kere gbegberẽ asino dunduko re; ni akpí akpi ni rengo; kureni adu kina ku ri ni.

¹⁴“Ono ka gi wirini re vungu gude nabi gu ingaapai dunduko nga gu bani amangi, ki nigunde ti ni, ka ni amanga nga ha wo ya,

¹⁵ka ni ari nga he ri abaagangara yo watadu tuka bangirini ka ngera koyo du kpiaahe ni nga ga ngbatunga aYisaraere ya, abirikosi nga dia kurani ya,

¹⁶arungosi nga boro ya, adia nga marã ngbaanga ya, atuka nga ahe ni zuu ya, ono ni nafu gani riahe fu aboro gomoro ki niukadi kundiri yo ni roko,

¹⁷ki di beni ku sa yo ti irairapai, adia nga marã mokiisa watadu gu kiisi yo ho ya, nakparia pa gimi asarangbanga, ki nipeke fuo sangba gimi rugaapai; ni akpi nga tipa ga bani irairapai te; ni anyé anye ni ungani ni rengo.

¹⁸Ono tipa bani, bambiko ni arungosi wirinani ni kere pai, ki tuka gani ahe, ka manga gu pai angba nga dagba gani aboro ya, oni ngére, ni akpi tipa gani irairapai.

¹⁹“Ono oni naya, ‘Tipagine ka gude ambu nga mbugo ga bani irairapai ti ni ya?’ Ho mangi wirini gu pai nidu ku sangba rugute yo na rurupai, ki nika kuti gimi rugaapai dunduko, ni anyé anye ni ungani ni rengo.

²⁰Gu mbisimo ka ainga pai si akpí akpi. Wiri boro ambú nga mbugo ga bani irairapai te, bagude ambu nga mbugo ga wirini irairapai a te; gu rurupai nga ga ruru boro adú fu kina ni, gu gbegberẽpai nga ga gbegberẽ boro ki du kina ku ri ni.

²¹“Ono ka gbegberẽ boro sa tini ti gani ingaapai dunduko nga gu mangi ni ki ka kuti gimi rugaapai dunduko ki nimangi apai ku sangba rugute yo na rurupai, ni anyé anye ni ungani ni rengo; ni akpi nga te.

²²I atingida nga pa gu samungu sa kuti ni dagba gu ni amangi he te; ni anyé anye ni ungani mbiko gu rurupai mangi ni.

²³Rago nangba ti re mbiko kpio gbegberẽ boro? wo poi Gbia MBORI, gu ngba nga ni sa tini ti gani gbegberẽpai ki nye ni ungani, te?

²⁴Ono ho ruru boro nisa tini ti gani rurupai ni ki mangi irairapai ki mangi kina gu kere gbegberẽapai nga gu gbegberẽ boro nimangi he, ni anyé ni ungani? Pai dagba gu ruru mangaapai mangi ni i ka tingida pa ha te; ni akpí akpi bambiko gu tindika mangi ni na gu ingapai mangi ni.

²⁵“Ono oni naya, ‘Gu pai nga ga Gbia ru nga ha te.’ Ako ngbatunga aYisaraere, oni gí he awere: Ru nga gi pai te? A nga si nga gaoni pai aru nga ya, te?

²⁶Ho ruru boro nisa tini ti gani rurupai ni ki mangi irairapai, ni akpi tipa ha; ni akpi bambiko gu irairapai mangi ni.

²⁷Berewe, ho gbegberẽ boro nisa tini ti gu gbegberẽpai mangi ni ni ki mangi apai ku sangba rugute yo na rurupai, ni abátasa ungani abatasa.

²⁸Bambiko ni aberẽ pai ki sa tini ti gu samungu dunduko nga gu ni amangi he, ni anyé anye ni ungani ni rengo, ni akpi nga te.

²⁹Ono ngbatunga aYisaraere naya, ‘Gu pai nga ga Gbia ru nga ha te.’ Ako ngbatunga aYisaraere, ru nga gimi apai te? A nga si nga gaoni apai aru nga ya, te?

³⁰“Ako ngbatunga aYisaraere, si du mi asára ngbanga roni, aboro ni ba sa sa kuti gayo apai, wo poi Gbia MBORI. Oni sá gaoni berã ki sa tironi ti gaoni samungu dunduko, irairapai ka du ni gaoni úgbaiasahe.

³¹Oni báfu pa samungu dunduko 11 roni ku sa yo nga gu oni amangi he kuti re, ki di voyo ngbaduse tigaoni, na vovo toro! Ako ngbatunga aYisaraere, tipagine oni ka akpi ti ni?

³²Bambiko rago angba nga ti re mbiko kpio boro te, wo poi Gbia MBORI; si du oni sá tironi, ki nye ni imgaroni.”