Read zande Yezekere 20 Bible Online

Yezekere 20 - zande bible

Yezekere 20

¹Ti saba garã, ti bisue diwi, ti rameru bawe, agu abaakumba nga ga aYisaraere yo aye ka sasana Yekova tipa pai, ki sungu ku bara bangire.

²Sangba Yekova ki ye kono du mi ni, niya:

³“Wiri boro, mo gúmba pai fu ga aYisaraere abaakumba ki ya fu yo, Ya Gbia MBORI wẽ, Oni ye ka sasana re tipa pai? Wa du mi ni ungare, mi aída nga ha fu roni oni sasana re tipa pai te, wo poi Gbia MBORI.

⁴Mo asára ngbanga yo? wiri boro, mo asára ngbanga yo? Mo rúgu yo i ini gu kere gbegberẽ asino nga ga abayo,

⁵mo ki ya fu yo, Ya Gbia MBORI wẽ: Ti gu uru nga gu mi asia Yisaraere ni, mi azunga he fu ngbatunga Yakoba, niyugu tire fu yo i ini re rogo ringara Ezipeta, mi azunga ne fu yo, niya, Mi nga Yekova nga gaoni Mbori.

⁶Ti gu uru re mi azunga he fu yo, ya mi aye na yo ringara Ezipeta yo ku rogo gu ringara nga gu mi agbata fu yo, gu ringara du adu na mamuanya na nzeme anyege kpaima, du ni taasitaasi ringara dagba aringara dunduko.

⁷Mi ki ya fu yo, Oni báfu gu kere gbegberẽ ahe ku sa yo nangba bangironi, oni ni ba sa sa, ka oni birikosi nga tironi na gu kpiaahe nga ga Ezipeta ya, mi nga Yekova nga gaoni Mbori.

⁸Ono i asa mungu kuti re ka i akpi nga nyemu ka dega tuyo fere ya; i ni ba sa sa abafa nga gayo kere gbegberẽ ahe ku sa yo nangba bangiriyo te, i ambu nga pa gu kpiaahe nga ga Ezipeta a te. “Si du mi aberẽ pa uka gi ngariangaria zinga ti ni ku ri yo ki mangi pa gi zinga kuti yo rogo ringara Ezipeta.

⁹Ono mi mangi pai mbiko rimore, ya ka si du nga ni gbarasigbarasi he ku bangiri arikaaboro nga agu yo i araka dagba yo yo ya, nga agu yo mi ayugu tire fu yo ni kusa yo ringara Ezipeta yo.

¹⁰Si du mi ki ngbe ku mbata yo fu yo ka kusa yo ringara Ezipeta yo ku ngbakungba yo.

¹¹Mi afu gimi rugaapai fu yo ki yugu gimi asarangbanga fu yo, nga gu ka boro ka kuti ni ni nye anye ni ungani.

¹²Ku ri gere mi afu gimi arago sabiti fu yo, wa yuguyuguhe dagba re na yo, i ini he mi nga Yekova kpara yo ziazia.

¹³Ono ngbatunga aYisaraere asa mungu kuti re ngbakungba yo; i apeka nga sangba gimi rugaapai te, ono i ki gindiga gimi asarangbanga, nga gu ka boro ka kuti ni ni nye anye ni ungani; i ki nibirikosi gimi arago sabiti gbe. “Si du mi aberẽ pa uka gi ngariangaria zinga ku ri yo ngbakungba yo, ka nyasa yo du.

¹⁴Ono mi amangi pai mbiko rimore, ya ka si du nga ni gbarasigbarasi he ku bangiri arikaaboro ya, nga agu yo mi akusi yo ku bangiriyo.

¹⁵Ku ri gere mi azunga he fu yo ngbakungba yo ya mi aye nga na yo ku rogo gu ringara nga gu mi afu fu yo te, gu ringara du adu na mamuanya na nzeme anyege kpaima, du ni taasitaasi ringara dagba aringara dunduko,

¹⁶bambiko i agindiga gimi asarangbanga, ka i apeka nga sangba gimi rugaapai ya, i ki birikosi gimi arago sabiti; bambiko kpotoyo yo andu fuo kina gayo kpiaahe.

¹⁷Ono mi aína nga pai fu yo te, ka mi agbarasa nga yo watadu nyasa yo ngbakungba yo du ya.

¹⁸“Mi ki ya fu awiriyo ngbakungba yo, Ka oni peke nga sangba ga abaroni rugaapai ya, ka oni ká nga kuti gayo asarangbanga ya, ka oni birikosi nga tironi na gayo kpiaahe a ya.

¹⁹Mi nga Yekova nga gaoni Mbori; oni péke sangba gimi rugaapai, ki ka kuti gimi asarangbanga,

²⁰ki nikpara gimi arago sabiti ziazia, ya si du ni yuguyuguhe dagba re na oni, ya oni ini he ya mi nga Yekova gaoni Mbori.

²¹Ono awiriyo asa mungu kuti re; i apeka nga sangba gimi rugaapai te, ka i aka nga kuti gimi asarangbanga ya, nga gu ka boro ka kuti ni ni nye anye ni ungani; i abirikosi gimi arago sabiti. “Si du mi abere pa uka gi ngariangaria zinga ku ri yo ki mangi gi zinga ku ri yo ngbakungba yo.

²²Ono mi ambu paha, ki mangi pai mbiko rimore, ya ka si du nga ni gbarasigbarasi he ku bangiri arikaaboro ya, nga agu yo mi akusi yo ku bangiriyo.

²³Ku ri gere mi azunga he fu yo ngbakungba yo ya mi agbándaka yo ku dagba arikaaboro yo ki gbandaka yo ku rogo aringara,

²⁴bambiko i amanga nga pa gimi rugaapai te, ono i ki gindiga gimi asarangbanga ki birikosi gimi arago sabiti, i amoi bangiriyo ti kina ga abayo kpiaahe.

²⁵Ku ri gere mi afu rugaapai fu yo nga gu adu nga ni wene he ya, na asarangbanga nga gu ka i adu nga na unga mbiko ho ya;

²⁶mi ki birikosi yo be kina gayo gamaahe rogo manga yo i tumo ni bambata awiriyo dunduko ku we yo, ya mi gbarasi yo, i ini he ya mi nga Yekova.

²⁷“Si du, wiri boro, mo gúmba pai fu ngbatunga aYisaraere ki ya fu yo, Ya Gbia MBORI wẽ: Rogo gi pai re abaroni agberẽ ngbayo yo berewe fere, ni manga pai ni biriki na mi.

²⁸Bambiko ho mi aye ni na yo ku rogo gu ringara nga gu mi azunga he ka fu he fu yo, si du ho i anibi gu batumbatumba rago ni watadu gu nanaga ri ngua, yo i anatumo ni ni gayo amotumo ki nimoi gu zingisapai nga ga gayo gamunihe mbedisatise; yo i azo gayo wene fuõngua ni, yo i auka gayo mbirimbiri amotumo ku ho ni a.

²⁹Mi aya fu yo, Gine nga gu tumbatumba ba oni nandu ku ho ni? Si du i ay ambu rimoho nga Bama daku awere.

³⁰Si du mo yá fu ngbatunga aYisaraere, ya Gbia MBORI wẽ: Oni nabirikosi tironi ni agu asino nga ga abaroni ka ingisa tironi nimangi pai ni sino pa kere gbegberẽ asino?

³¹Ho oni nafu gaoni agamahe ni nitumo ni awironi nibafa yo ku we yo, oni nabirikosi tironi na gi gaoni kpiaahe dunduko re daku areme. Ako ngbatunga aYisaraere, oni asásana re tipa pai? Wa du mi ni ungare, wo poi Gbia MBORI, mi aída nga ha fu roni oni sasana re tipa pai te.

³²“Gu pai dũ rogo gaoni berã si amánga nga wa sa te ― gu berã nga, ‘Ani dú wa arikaaboro, wa agu angbatunga nga ga aringara yo, ki niirisi ngua na mbia.’

³³“Wa du mi ni ungare, wo poi Gbia MBORI, Mi adú ni bakindo ku ri roni ni rengo, na nyanyaki bere na ni taĩtaĩ bere, na ngariangaria zinga naauka ku ri roni.

³⁴Mi akúsa roni dagba aboro ki dungura 11 mi rogo agu aringara yo oni agbandaka ku ho ni, na nyanyaki bere na ni taĩaĩ bere, na iipanangaria zinga naauka ku ri roni;

³⁵mi k i ye na oni ku rogo gu ngbakungba nga ga aboro, yo mi ka sara ngbanga roni ni nibi bangirani dagba rani.

³⁶Wa mi asari ngbanga abaroni ngbakungba yo ringara Ezipeta yo, wo a mi ka asara ngbanga roni, wo poi Gbia MBORI.

³⁷Mi amánga roni oni susi tii ngbondo, mi ki idi he oni ndu ni gedigedi roni.

³⁸Mi akpára asamungu dagba roni, na agu yo gu auru gi ndika; mi ayé na yo rogo gu ringara yo i asungu ni, ono i aríma nga ku rogo ga aYisaraere ringara yo te. Si du oni ki ini he ti ni ya mi nga Yekova.

³⁹“Ako ngbatunga aYisaraere, tipa roni, ya Gbia MBORI wẽ: Ka oni aida nga ka dega turoni fere ya, oni ndú dunduko ka manga pa gaoni kpiaahe, awere na ku mbata yo a; ono ziazia rimore oni agbárasa nga ha berewe na gaoni agamahe na gaoni kpiaahe te.

⁴⁰“Bambiko ri gi kparakpara bagangara yo, gu bagbanga bagangara nga ga aYisaraere, wo poi Gbia MBORI, yo ngbatunga aYisaraere dunduko, i dunduko, ka amanga pa re rogo ringara ni; yo mi ka ida pa yo ni, mi ki sasana he yo a tipa gaoni aruhe na gaoni siasia agamahe na gaoni kparakpara amotumo dunduko.

⁴¹Mi aída pa roni wa wene fuõhe, ho mi ka kusa roni ni dagba aboro, ki dungura roni rogo agu aringara yo oni agbandaka ku ho ni; mi ki yugu gi pa du ni kparakpara re ziazia rogo roni yo ku bangiri arikaaboro.

⁴²Oni ki ini he ya mi nga Yekova, ho mi ka ye ni na oni ku rogo ringara aYisaraere, gu ringara mi azunga he ka fu he fu abaroni.

⁴³Oni atingida pa gaoni apai yo, na gaoni mangaapai dunduko nga gu birikosi oni tironi na ni; oni ki sogo tironi tipa gu gbigbitaapai nga gu oni amangi he.

⁴⁴Oni ki ini he ya mi nga Yekova, Ako ngbatunga aYisaraere, ho mi ka manga pai ni fu roni ku sangba rimore yo, kuti gaoni gbigbitaapai te, na kuti gaoni wasiwasi mangaapai a te, wo poi Gbia MBORI.”

⁴⁵Sangba Yekova ki ye kono du mi ni niya:

⁴⁶“Wiri boro, mo sá kpakpuro ku sudiyo ki tungusi pai ku sudiyo, ki gumba pai wa nebi kuti ringara bire Negebe yo;

⁴⁷mo yá fu bire Negebe yo, Mo gí sangba Yekova: ya Gbia MBORI wẽ, Mo ngere, mi agínda we rogo ro yo, si ki riti iwo angua du rogo ro yo na ugu angua dunduko; gu kĩkĩ mirãwe re abísa nga te, agu apavuruhe dunduko nangera sudiyo da ku nodiyo agbí be he.

⁴⁸Aboro dunduko nikabi he ya mi nga Yekova ginda ha; si abísa nga te.”

⁴⁹Si du mi ki ya, “Ako Gbia MBORI! i nagumba ha tipa re, ‘A nga ko nga bagumba asanza te?’”