Read zande Yezekere 21 Bible Online

Yezekere 21 - zande bible

Yezekere 21

¹Sangba Yekova ki ye kono du mi ni niya:

²“Wiri boro, mo sá kpakpuro sa Yerusarema ki tungusi pai kuti kparakpara aba; mo gúmba pai wa nebi kuti ringara aYisaraere,

³ki ya fu ringara aYisaraere, Ya Yekova wẽ: Mo ngere, mi gbarasi rimoro, mi amó gi basape fukaha yo, ki rogo ruru yo ku sa yo na gbegberẽ yo a.

⁴Bambiko mi aróga ruru yo na sbegberẽ yo ku sa yo ti ro, si du gi basape akúra fukaha yo sa aboro tona ku sudiyo ki da ku nodiyo a;

⁵aboro dunduko aina ha ya mi nga Yekova mo gi basape fukaha yo; mi akísa nga ha koyo berewe te.

⁶Si du mo uka omero, wiri boro; mo úka omero na kuangbaouse na kere rungo kpotoyo ku bangiriyo.

⁷Ho i ka ya ni foro, ‘Tipagine mo auka omero ti ni?’ mo ayá, ‘Bambiko agu apangbanga re. Bambiko ho si ka ye ni, ngbaduse azízirã azizirã dunduko, be boro arúngbura dunduko, he amáka toro aboro dunduko, arukusue dunduko ki rungbura wa ime. Mo ngére, si naye, si adú ni digisidigisi he,’ ” wo poi Gbia MBORI.

⁸Sangba Yekova ki ye kono du mi ni niya:

⁹“Wiri boro, mo gúmba pai wa nebi, ki ya, Ya Gbia wẽ, Mo gúmba pai: Basape, basape ni bedibedi he ki du a ni Kõkõ ho,

¹⁰ni bedibedi he sa imo aboro na ni, ni kõkõ ho si niikpira wa ikpira gumba! Watadu ani ngi? Mo gindiga pa ngau rugapaipai, wire, na aú ngua du.

¹¹Si du i fu basape tipa kõ ho, ya i zadi he; si ni bedibedi he ni kõkõ ho tipa fu he ku be baimiaboro.

¹²Wiri boro, mo kpári ki niyoro wawa, bambiko si kuti gimi aboro, si kuti abazogo dunduko nga ga aYisaraere yo; i kusi yo sa basape na gimi aboro. Si du mo ta ri kpakpu mbosoro.

¹³Bambiko si adú nga ni asada te ka mo gindiga gu ngau rugapai re gini pai rengbe he ka manga ha?” wo poi Gbia MBORI.

¹⁴“Si du mo gúmba pai wa nebi, wiri boro; mo ta bero, basape ki zorõ bara ue, ii, bara biata, basape tipa agu yo i akaimo yo; si nga gu basape tipa bakere imo aboro, nga gu ke yo kirikiri,

¹⁵ya kpotoyo yo zizirĩ, dungu yo ki kpiki ku pati gayo angbadimo. Mi fu gu ngenzerengenzere basape; ako! si nakí wa kina ikpira gumba, si ni kõkõ ho sa imo he na ni.

¹⁶Mo déwe rago ku kumbabe na ku garebe bara yo du kpakpuro ku ho ni.

¹⁷Mi atá bere a, mi ki nyasi gi ngariangaria zinga; mi Yekova, gumba ha.”

¹⁸Sangba Yekova ki ye kono du mi ni berewe niya:

¹⁹Wiri boro, mo gbá agene ue tipa ye gu basape nga ga bakindo aBabero; si ue nikakura rogo kina gu ringara sa. Mo ki dua ngua yugo gene, ki moi ne ti ri gene bakporo;

²⁰mo gbá gene tipa gu basape nikaye ku Raba yo nga ga aAmono bakporo sa Yuda na sa Yerusarema, gu bakporo du na ngapa pati he.

²¹Bambiko bakindo aBabero ru ti ngboso gene, ti ri agu agene ue re, ka soroka; ko nazigiza aguanza, ko nasana terafima, ko nangera kuti ende.

²²Ku kumbabeko yo du soroka ni tipa Yerusarema, ka za ngba na kpe, ka tumba fugo na wawa, ka maa nyanyaki ngua fokahe kuti angbadimo, ka ba akanda na ka dua ngapa gbata.

²³Ono si adú bangiriyo wa zire Da soroka; i zunga he ni ndikidi zungahe; ono ko naye na pa gayo irairapai ku bangiriyo, ya i du ni zizi yo.

²⁴“Si du ya Gbia MBORI wẽ: Bambiko oni mangi pa gaoni irairapai i tingidi pa ha, pa gaoni samungu du adu zanga dada ha, si du gaoni ingaapai kuru rogo gaoni mangaapai dunduko bambiko tingida pa roni da, i azía roni kina rogo ho.

²⁵Na mo, Ako mo, kere gbegberẽ boro, bazogo aYisaraere, ga rago nada, gu rago nga yangara ga mbusa,

²⁶si du ya Gbia MBORI wẽ: Mo dí kpakpari riro yo, ki di kpakpari bakindo ku sa yo; apai anyé nga wa si adu te; mo kíisi pa gu he du ni umba ha, ki umbasi pa gu he du ni tumbatumba ha.

²⁷Mi amánga ha ni gbarasigbarasi he, ni gbarasigbarasi he, ni gbarasigbarasi he, wiri fuoho adú nga ho te daho gu ko ka ye ni du he ni gako, ko mi ka fu he fu ko.

²⁸“Na mo, wiri boro, mo gúmba pai wa nebi, ki ya, Ya Gbia MBORI tipa aboro Amona wẽ, na tipa pa gayo gbarasarimo; mo yá, Basape, i mo basape tipa imo aboro, i kõ ho si nikĩ, ngenzerengenzere ka ikpira wa ikpira gumba―

²⁹ho bi yo zire yuguyuguahe ni foro, ho i nasoroka pa azire ni foro ka piga ro auru gorõ gu kere gbegberẽ aboro, nga agu yo gayo rago nada, rago gayo yangara mbusa.

³⁰Mo káraga basape ku fukaha yo. Mi asára ngbanga ro rogo gu ba yo i amangi ro ni, rogo ndikidi ga ringara.

³¹Mi ki uka gi imisiri ngbaduse ku ri ro; mi avúda we kuti ro nga ga dingidingi ngbadure; mi ki fu ro ku be airazuu, du ni airabirĩ rengbe ka gbarasa he.

³²Mo adu ni nyake tipa we; kurero adu rogo ringara; i atingida nga pa ro berewe te; bambiko mi Yekova gumba ha.”