Read zande Yezekere 22 Bible Online

Yezekere 22 - zande bible

Yezekere 22

¹Sangba Yekova ki ye kono du mi ni ku ri gere, niya,

²“Mo, wiri boro, mo asára ngbanga, mo asára ngbanga gu bakporo uka kure re? Si du mo táki pande pa gaha kere gbegberẽ mangaapai dunduko fu he.

³Mo ayá, Ya Gbia MBORI wẽ: Gu bakporo nga gu nauka kure rogo ho, ragoho nikada, nga gu namanga kpiaahe sa birikosi tihe!

⁴Mo du na pai ku ri ro mbiko gu kure uka mo ho, ki biriko be gu kpiaahe nga gu mangi mo ho; mo mbedisi gamo rame, gu ringbisiringbisi rago nga ga garãro si da. Si du mi sa ro ni ugbarasarimo fu arikaaboro, ni umongo fu aringara dunduko.

⁵Agu yo du mbembedi na mo na agu yo du tuturu i amóma ro, mo Dirikosibirikosi bakporo, hi be gbarakagbaraka pai.

⁶“Mo ngére, agu abazogo nga ga aYisaraere yo du rogo ro yo nga bakporo, i fu tiyo sa uka kure ni ba sa sa kina ku sangba gayo ngarã yo.

⁷I namanga aba aboro dagba ro na anayo ni payasipayasi yo; i narungosi yegayega aboro rogo ro yo; i namanga awirinyaure rogo ro yo gbegberẽ na adekurugbo.

⁸Mo payasi gimi kparakpara ahe, ki birikosi gimi arago saoiti.

⁹Aboro rogo ro yo nasoa pa uka kure, na aboro rogo ro yo nari riahe ri abaagangara vo; aboro namanga wasiwasi apai rogo ro yo.

¹⁰Agu yo rogo ro yo nazaka ga abayo k undirise, i nabirikosi pa agu ade nidu na kaza ade rogo ro yo.

¹¹Boro namanga kere gbegberẽ pai na dia kurani; kura ni namanga wasiwasi pai ki birikosi dia wirini; kura yo ki birikosi adawiriyo rogo ro yo, nga wiri vuru bani.

¹²Aboro naroga marã mabirimo ka uka kure boro rogo ro yo; mo nadia marã mokiisa na kiisikiisi he, mo nakumukosi tiro be rungosi akuaro; bangíro ki go ti re, wo poi Gbia MBORI.

¹³“Mo ngére, si du mi nata bere kuti pa gu iraira mokiisa bi mo, na kuti pa gu kure nidu rogo ro yo.

¹⁴Ngbaduro rengbe ka hi pai, watadu bero rengbe ka du nyanyaki, rogo gu uru nga gu mi ka manga ro? Mi Yekova gumba ha, mi amánga ha amanga.

¹⁵Mi agbándaka ro ku dagba arikaaboro ki kparaka ro ku rogo aringara, mi ki nyasi ga biriko rogo ro yo.

¹⁶Mi adú ni birikosibirikosi re mbiko ro ku bangiri arikaaboro; mo ki ini he ya mi nga Yekova.”

¹⁷Sangba Yekova ki ye kono du mi ni, niya:

¹⁸“Wiri boro, ngbatunga aYisaraere sa tiyo fere wa mirĩ marã; i dunduko, sirigi, na kpano na marã na donga, i ki sa tiyo wa mirf feda ku gbigiwi yo.

¹⁹Si du ya Gbia MBORI wẽ: Bambiko oni sa tironi dunduko wa mirĩ marã, oni ngere, mi adúngura roni ku bebere Yerusarema vo.

²⁰Wa aboro nadungura feda na sirigi na marã na donga na kpano ku gbigiwi yo, ka utuda we kuti ni si zaragasi he, wo mi ka dungura roni ni gi zinga na rogo gi ngariangaria zinga, mi ki moi roni ku rogo ho yo ka zaragasi roni.

²¹Mi adúngura roni ki utudi we kuti roni nga ga gi zinga, oni ki du ni zaragasizaragasi roni bebere he yo.

²²Wa feda du ni zaragasizaragasi he gbigiwi yo, wo oni ka du ni zaragasizaragasi roni bebere he yo; oni ki ini he ya mi nga Yekova uka gi ngariangaria zinga ku ri roni.”

²³Sangba Yekova ki ye kono du mi ni niya:

²⁴“Wiri boro, mo gúmba pai fu ringara ki ya, Mo nga gu ringara adu nga ni girisigirisi he ya, watadu du na mai ku rogo ro yo ti uru imisiri ngbaduse a ya.

²⁵Gaha abazogo rogo ho wa gbiriwogbiriwo bahu nasipa umozi; i riti unga aboro; i df aũkumuko na kikiipaahe; i sa dungu ade ni adekurugbo rogo ho yo.

²⁶Gaha aboromotumo mangi zuu sa gi rugute ki birikosi gimi kparakpara ziazia ahe; i akparaka nga dagba kparakpara ziazia ahe na bibiriko ahe te, i ayugo nga pa gu du kia nga bibiriko he na gigiri he a te, bangiriyo go ti gimi arago sabiti, si du mi du ni birikosibirikosi re dagba yo yo.

²⁷Gaha abazogo rogo ho du wa kina awaru nasipa úmozi, niuka kure, nigbarasi unga aboro sa dia iraira mokiisa

²⁸Gaha anebi nimbedi he ni iwo kuamba tipa yo, nibi zire yuguyugupai nisoroka pa azire fu yo, niya, ‘Ya Gbia MBORI wẽ,’ ho Yekova agumba nga pai ni ya.

²⁹Aboro ringara mangi pa rungo ki tuka ahe; i rungosi rungorungo aboro na airazingohe, ki rungosi yegayega ooro zanga rurupai.

³⁰Mi ki gbata boro dagba yo yo nikadua ngapa tipa ringara ki ru rogo sarisari he ku bara bangire, ya ka mi gbarasi nga ha ya; ono mi abi nga boro wa sa te.

³¹Si du mi uka gi imisiri ngbaduse ku ri yo; mi nyasi yo na gu we nga ga gi dingidingi ngbaduse; mi moi boro gayo pai kina ku ri yo, wo poi Gbia MBORI.”