Read zande Yezekere 24 Bible Online

Yezekere 24 - zande bible

Yezekere 24

¹Ti ribua garã, ti bawe diwi, ti rameru bawe, sangba Yekova aye kono du mi ni niya:

²“Wiri boro, mo ké rimo gi uru du areme re, kina gi uru re. Bakindo aBabero mbakadi tiko na vura kuti Yerusarema kina areme.

³Mo gúmba pa sanza fu ngbatunga asamungu ki ya fu yo, Ya Gbia MBORI wẽ: Mo mói akoro ku we yo, mo moi he, ki uka ime ku rogo ho yo a;

⁴ki moi rukutu pasio ku rogo ho yo, kinaku wene he dunduko rukutu, mboso na kpafube; ki hisi he na siasia ameme.

⁵Mo di gu siasia nya sa dagba rimbasa anya yo, ki ba gu kura amemeru ku tii he yo; ki pasi ru apasa gbe, ki pasi amemeru kina rogo ho.

⁶“Si du ya Gbia MBORI wẽ: Na gberẽ he fu bakporo ukakure, fu gu akoro sirigi du mirĩhe kina vuruhe yo, nga gu mirĩhe ata guari nga vuruhe yo ya! Mo kúsi he yo rukutu fuo gu, zanga sia gu.

⁷Bambiko gu kure uka yo ho yo si rogo ho kindi; si moi he kina ku ri ku mbia, si auka nga ha ku sande ka dada ha na nvutu te.

⁸Mi moi gu kure ku ri ku mbia bakporo auka ha ka zingisa gi ngariangaria zinga, ka ira bape a, ya ka si du nga ni dadidadi he ya.

⁹Si du ya Gbia MBORI wẽ: Na gberẽ he fu bakporo ukakure! Mi amánga guguda ha ni bakere he a.

¹⁰Mo moi nyake, ki ginda we gbe, ki pasi pasio wenengaĩ, ki uka gu ngadangada imehe, ki mbu ameme si gbi du.

¹¹Mo moi akoro ni ku he ku ri kingiriwe, si foi, sirigihe ki gbi, ya nirikoho zirĩku rogo ho yo, mirĩhe ki nyasi.

¹²Mi mbusi tire vurũ; nanaga mirĩhe aguari nga ti ni te, si aguari nga be we a te

¹³Mirĩhe si nga ga wasiwasi birikobiriko pai. Bambiko wa mi aidi ka girisa ro ono ka mo agira nga be ga biriko ya, mi agírisa nga ro berewe daho mi ka nyasa pa gi ngariangaria zinga ni ku ri ro te.

¹⁴Mi nga Yekova gumba ha; si aye ka du ni digisidigisi he, mi amánga ha; mi asá nga paha te, mi ambú nga ha te, mi asá nga gi berã te; mi asára ngbanga roni kuti gaoni apai na kuti gaoni mangaapai, wo poi Gbia MBORI.”

¹⁵Sangba Yekova ki ye kono du mi ni a, niya:

¹⁶“Wiri boro, mo ngere, mi naye ka dia gu ngba ti ro susi bara bangiro ku sa yo, bara sa kindi; ono ka mo tá nga ngbaduro watadu kpara kpe ya, ka aumero gá nga bangiro yo a ya.

¹⁷Mo úka omero, ono ni wawa te; ka mo kpári nga tipa kangba boro ya. Mo káĩ ga kaĩkaĩ rokori kuti ri ro, ki moi ga rakata ku nduro yo; ka mo dádi nga ngbaro ya, ka mo ri nga gu riahe nga ga akparikpe ya.”

¹⁸Si du mi nigumba pai fu aboro wiso, ku nyemu diare ki nikpi. Wiso mi ki mangi he wa i arugu re na ni.

¹⁹Aboro ki ya fere, “Mo agúmba nga gu pai fu rani agi apai ayugo ho te re, nga gu mo namanga were?”

²⁰Si du mi ki ya fu yo, “Sangba Yekova aye kono du mi ni niya:

²¹‘Mo yá fu ngbatunga aYisaraere, Ya Gbia MBORI wẽ: Oni ngére, mi agbárasa gi kparakpara ziazia ba, nga gu ruka nga ga gaoni ome, gu he ngba bangironi, nga gu mbisimoroni akpi nyemu he; agu awironi nga akumba na ade oni ambu yo sa yo i akpíka be basape.

²²Oni amanga a wa mangi mi; oni adáda nga ngbaroni te, ka oni ari nga gu riahe nga ga akparikpe a ya.

²³Gaoni kaĩkaĩ arokori adú ti kina ri roni na gaoni arakata nduroni yo; oni atá nga ngbaduroni watadu kpara kpe te, ono oni arúna kina rogo gaoni irairaapai, ki niuko gu ni koyo du gu ni ni.

²⁴Were Yezekere ka du fu roni ni yuguyuguhe; gu pai mangi ko dunduko oni amánga ha kina wo a. Ho gi ka ye ni re, si du oni aina ha ya mi nga Gbia MBORI.’

²⁵“Na mo wiri boro, ti gu rago ho mi ka dia gayo nyanyaki ba ni be yo, gayo ngbarago nga taarimo, gu he ngba bangiriyo na gu he mbisimoyo akpi nyemu he, na awiriyo nga akumba na ade a,

²⁶ti gu rago re merẽsimerẽsi boro ayé koyo du mo ni ka tingida pangbanga ha foro.

²⁷Ti gu rago re ngbaro adu ni zaza ha fu gu merẽsimerẽsi boro re, mo ki gumba pai ka ngbaro adú nga ni bubo berewe ya. Si du mo adu ni yuguyuguhe fu yo; i ki ini he ya mi nga Yekova.”