Read zande Yezekere 25 Bible Online

Yezekere 25 - zande bible

Yezekere 25

¹Sangba Yekova ki ye kono du mi ni niya:

²“Wiri boro, mo sá kpakpuro koyo du aAmono ni, ki gumba pai wa nebi kuti yo.

³Mo yá fu aAmono, Oni gí sangba Gbia MBORI: Ya Gbia MBORI wẽ, Bambiko oni aya, ‘Eke!’ ku ri gi kparakpara ziazia ba ho si abiriko ni, na ku ri ringara aYisaraere ho si adu ni ni bate, na ku ri ngbatunga aYudo ho i andu ni na yo ni zizi yo,

⁴si du mi nafu roni ku be aboro ku Uroyo oni du ni gayo aboro, i ki moi gayo bataya dagba roni ki moi gayo baraka dagba roni; i ari gaoni zuzu ahe, i ki nimbiri gaoni mamuanya.

⁵Mi asá Raba ni banambu tina akameri na agu abaakporo nga ga aAmono ni ndugu tipa arimbasa anya. Si du oni aina ha ya mi nga Yekova.

⁶Bambiko ya Gbia MBORI wẽ: Bambiko oni ta beroni ki doka nduroni ki ningi na gu gbegberẽ berã du kpotoroni yo kuti ringara aYisaraere,

⁷si du, oni ngére, mi taĩ bere sa roni, ki fu roni wa úmozi fu arikaaboro; mi ki rogo roni ku sa yo ti aboro ki mangi roni oni kpiki rogo aringara; mi agbárasa roni. Si du oni aina ha ya mi nga Yekova.

⁸“Ya Gbia MBORI wẽ: Bambiko Moaba aya Mo ngére, ngbatunga aYudo du wa kina kura arikaaboro dunduko,

⁹si du mi azá pavuru ringara Moaba tona ti agu abaakporo du ti gaha bangbandarago, nga ga ringara taarimo, nga Bete-yesimota, na Bara-mona, na Kiriyatarima.

¹⁰Mi afú he na aAmono fu aboro ku Uroyo ni gayo, ya ka i tingidi nga pa awiri aAmono berewe dagba arikaaboro yo ya,

¹¹mi ki sari ngbanga ku ri Moaba. Si du i aina ha ya mi nga Yekova.

¹²“Ya Gbia MBORI wẽ: Bambiko Edome mangi pai ni irabape kuti ngbatunga aYudo, Edome du na pai ku ri he gbe mbiko ira bape ku ri yo,

¹³si du ya Gbia MBORI wẽ, Mi atáã bere kuti Edome, ki rogo aboro na anya rogo ho ku sa yo du, mi ki sa ha ni gbarasigbarasi he; i akpíka be basape tona Temana yo da ku Dedana yo.

¹⁴Mi ki moi gi irabape ku ri Edome ku vurube gimi aboro aYisaraere; i ki mangi pai Edome yo kuti gi zinga na kuti gi ngariangaria zinga; i ki ini gi irabape, wo poi Gbia MBORI.

¹⁵“Ya Gbia MBORI wẽ: Bambiko aFereseto amangi pai ni irabape ki iri bape na gu gbegberẽ berã du kpotoyo yo ka gbarasa rago rogo gu sogote zanga digidaha;

¹⁶si du ya Gbia MBORI wẽ, Oni ngére, mi atáã bere kuti aFereseto, mi ki rogo aKereto ku sa yo, ki gbarasi gu yangara ringara du ku pangba baime yo.

¹⁷Mi asára ngbanga ni bakere irabape ku ri yo na nyanyaki mbusa. Si du i aína ha ya mi nga Yekova, ho mi ka maa gi irabape ni ku ri yo.”