Read zande Yezekere 26 Bible Online

Yezekere 26 - zande bible

Yezekere 26

¹Ti bawe na sa garã, ti bambata uru nga ga diwi, sangba Yekova aye kono du mi ni niya:

²“Wiri boro, bambiko Tura aya tipa Yerusarema, ‘Eke, ga aboro ngbadimo kuadi, si ni zaza ha fere; mi ambi rengbe arengba berewe, wa du he ni ngbi ugure,’

³si du ya Gbia MBORI wẽ: Mo ngére, mi gbarasi rimoro, Ako Tura, mi ayé na dungu arikaaboro kuti ro, wa baime nafo angirihe.

⁴I agbárasa angapa bakporo Tura, ki kuadi gaha tumbatumba agbata ku sande; mi ki kpere sendehe baha ho, ki sa ha ni kinaku mbia.

⁵Si adú bebere baime yo, ni ba baapio atio; bambiko mi gumba ha, wo poi Gbia MBORI; si ki sa tihe ni úmozi fu arikaaboro;

⁶I aimo awirihe nga ade rogo baringara ni basape. Si du i aína ha ya mi nga Yekova.

⁷“Bambiko ya Gbia MBORI wẽ: Mo ngére, mi ayé na Nebukadenesara bakindo aBabero nodiyo kuti Tura, nangia bakindo ku ri abakindo, na afarasi na angbagidavura, na abanduri afarasi na rimbasa aborosovura.

⁸Ko aimo awiro nga ade ni basape rogo baringara; ko amáa nyanyaki nguru pati ro, ki ba akanda kuti ro, ki tumba bakikii vurakube kuti ro wa ri bambu.

⁹Ko arúga pa ome gako nyanyaki ngua fokahe kuti gamo angapa, ko akua gamo tumbatumba gbata na gako abasape.

¹⁰Gako afarasi adú ni badungu ra, si du nvutu ra ki dadi ro adada; gamo angapa akio be woro abanduri afarasi na angbagida tindaahe na angbagidavura, ho ko ka rima ti gamo angbadimo ni wa gu boro narima ku rogo gu bakporo du na sapusapu he ti ni.

¹¹Ko asímba gamo agene bakporo dunduko na sukutu gako afarasi; ko aimo gamo aboro ni basape; gamo nyanyaki adangba abambu ki tiwi ku sande.

¹²I asá gamo ngarã ni ugbuahe na ga babagaahe ni úmozi; i akúadi gamo angapa ku sande ki gbarasi ga wene abambu; i abáfa gamo ambia na angua abambu na sendehe ku bebere aime yo.

¹³Mi ki za woro gamo abia, ka i agía nga woro gamo asagiru berewe ya.

¹⁴Mi asá ro ni kinaku mbia; mo adú ni ba baapio atĩo; i adúa nga ro berewe te; bambiko mi nga Yekova gumba ha, wo poi Gbia MBORI.

¹⁵“Ya Gbia MBORI fu Tura wẽ: Aringara ti ngba gango baime akio nga be woro tigo ro te?, ho gu hogihogi yo ka uko ni, ho i ka imo aboro ni dagba roni yo te?

¹⁶Si du agu abazogo dunduko du pangba baime yo azórã ku sande auru gayo ambatabakindo, ki uru gayo gbanga roko, ki uru gayo kendegekendege abaukadi; i aúkadi tiyo na kina kio; i asúnga sande ki nikio pitipiti, ki nikigi mbiko ro.

¹⁷I ki tona biakpe ku ri ro, ki niya foro, “‘Waĩ gbandaka mo nadu na araki rogo ro yo nangia aboro baime, Ako baworimo bakporo, nga gu naandu na nyaka bangiri baime, mo na araki rogo ro yo naamoi gaoni gbudagbuda ti araki yo dunduko!

¹⁸Awere akisanga nakio ti uru tigo ro; ii, agu akisanga du rogo baime yo si gunde ti woro guari mo.’

¹⁹“Bambiko ya Gbia MBORI wẽ: Ni gu rago mi ka sa ro ni ni ngbi ugure, wa agu abaakporo naadu nga na araki rogo ho ya, ho mi ka ye ni na dudungura ime ku ri ro, gu bakere aime ki dadi ro,

²⁰si du mi atúra ro ku Due yo, na agu yo nazorã sa kuru aboro, mi ki mangi ro mo niraki rogo gu rago du kina ku tii sende yo, rogo ngbi ugure ti kuru kpotosende, na agu yo nazorã ku Due yo, ka si adú nga wa ka aboro araka rogo ro yo berewe ya, ka si adu nga wa wene ngbanyaro adú rogo ringara unga aboro berewe a ya.

²¹Mi ayé na mo sa iiriwo digidapai, ka mo adú nga ho berewe ya; ka i vura gbata ro vurũ, i abí nga ro berewe te, wo poi Gbia MBORI.”