Read zande Yezekere 27 Bible Online

Yezekere 27 - zande bible

Yezekere 27

¹Sangba Yekova ki ye kono du mi ni niya:

²“Were mo, wiri boro, mo tona biakpe ku ri Tura,

³ki ya fu Tura, naraka ti oazorã sa baime, nangia babagiahe fu agu aboro du ti dungu aringara ti ngba gango baime yo, ya Gbia MBORI wẽ: “Ako Tura, mo aya, ‘Mi teketeke na wene ngbanyare.’

⁴Gamo abangbandarago du bebere abaime yo; abadua ro namangi ga wene ngbanya teketeke.

⁵I amangi gamo apurangi dunduko ni kupuresa naye Senira yo; i adi kedara Rebanona yo ka manga gbanga ngua tipa abaakurungba foro.

⁶I amangi gamo akapi ni ngua wa gero Basana; ki mangi gamo apurangi ni ngua bukusa naye ti ngba gango Kupurio yo, du ni zunguzungu he na rindi mbarã.

⁷Roko apupoho adu ni tutu giri nzibi ni kendegekendege he, naye Ezipeta yo, si adu ni ga bendere; ga bagbu uru adu ni kayaa ha, na ngungungu he naye ti ngba gango ime Erisa yo.

⁸Agu araki Sidona yo na araki Aruwada yo angia gamo abasikisi abaakurungba; Ako Tura, gamo tatamana aboro adu rogo ro yo i nangia gamo abandu na abaakurungba.

⁹Gu kuru aboro nga ga Gebara yo na gaha tatamana aboro adu rogo ro yo, nimbakadi ga sapusapu he ni baro; agu abaakurungba dunduko nga ga baime na gaha abanzengere bakurungba nadu rogo ro yo, ka darã pa gamo bagibagiahe.

¹⁰“Aboro Parasa na aRudo na aPuto adu dagba ga rimbasa vura wa gamo aborosovura; i aasi vurakube na kpakpari vura ti ro; i afu bairisa foro.

¹¹Aboro Aruvada na aboro Ereke adu kirikiri ri gamo angapa, aboro Gamada ki du rogo gamo kirikiri agbata; i aasi gayo avurakube ri gamo angapa kirikiri; i asa ngbanyaro ni teketeke he.

¹²“Tarusisa aunda bagibagiahe na mo bambiko gamo bakere kumuko nadu ni angbatunga ha akia akia, i ki unda feda, na marã, na kpano, na donga tipa ngbe gamo ahe.

¹³Yavana aunda ahe na mo, na Tubara, na Mesaka; i aunda aboro na aúsunge nga ga sirigi tipa gamo bagibagiahe.

¹⁴Bete-togaruma aunda afarasi, na afarasi vura, na abaadongi tipa ngbe gamo ahe.

¹⁵Aboro Dedana abagi ahe na mo; badungu aringara ti ngba gango baime yo adu ni gamo ndikidi baabagaahe, i aye na rindi mbarã ni mosoro foro, na ngua ebone a.

¹⁶Edome abagi ahe na mo bambiko gamo mbakadimbakadi ahe nadu kpaima; i aunda zumeradi tipa gamo ahe, na ngungungu ahe, kendegekendege remu, na tutu roko ni giri nzibi, na kuru meme anyaime, na ngungungu mbia.

¹⁷Yuda na ringara aYisaraere aunda ahe na mo; i aunda nganu tipa gamo bagibagiahe, na eraya na bambata zuzu vurumo, nzeme anyege, nzeme na tomengua ni ngua kaza.

¹⁸Damaseke aunda ahe na mo tipa gamo mbakadimbakadi ahe nadu kpaima, bambiko gamo bakere kumuko nadu ni angbatunga ha akia akia; imekakue naye Erebone yo, na pusi mangenya,

¹⁹na imekakue naye Uzora yo i aunda ha tipa gamo ahe; i aunda takitaki amarã, kinanona na nzinziri koko tipa gamo bagibagiahe.

²⁰Dedana aunda ahe na mo nga roko basunga tipa sunga ri nya.

²¹Arabia na abazogo Kedara adu ni boro gamo wene babagi wiri akandoro, abaakandoro, na ameme; i aunda agi anya re na mo a.

²²Agu ababagiahe nga ga Seba yo na Rama aunda ahe na mo a; i aunda ahe tipa gamo ahe nga wene furú afuõangua dunduko, gu ngba ki susi, na kikiipa ambia dunduko, na dahabu.

²³Arana aunda ahe na mo, na Kane, Edene, Asura na Kiridama a.

²⁴Agi yo re aunda ahe na mo rogo ga babagaahe yo ni siasia aroko, ni kayaa aroko na kendegekendege aroko, na ni roko dadaahe ni angbatunga arangi, ni vodivodi he na agire ni nyanyaki he.

²⁵Agu abaakurungba nga ga Tarusisa anatinda gamo bagibagi ahe foro. “Si du mo adu ni hisihisi ro ki du bandaĩ be tindiro bebere abaime yo.

²⁶Gamo abasikisi abaakurungba ki ye na mo ku rogo badudungura ime. Gu bayuge naye uroyo kuadi ro bebere abaime yo.

²⁷Gamo akumuko, na gamo ahe, na gamo bagibagi ahe, na gamo abanzengere bakurungba, gamo abandu na abaakurungba, gamo abambakadi sapusapu he, na gamo ababagi ahe, na gu gamo abasovura dunduko du rogo ro yo, na ga rimbasa agu aboro dunduko nga gu du be ro, si dunduko rinda ku bebere abaime yo ti uru ga tigo.

²⁸Banambu rogo ringara ki nikio be woro kpe gamo abandu na abaakurungba,

²⁹agu yo dunduko nazadi akapi i ki gbadi abaakurungba yo. Abanzengere abaakurungba na abandu na abaakurungba bangiri baime ki rundu ti ngba gango

³⁰ki nikpari ni wawa ku ri ro, ki nikpari ni wawa ku ari, ni kere kpe. I ki nimi nvutu ku riyo yo ki niwaranga rogo kuke yo;

³¹i ki nikoeke riyo tipa ro, ki niukadi mbuzaroko, ki nikpari ku ri ro ni nirãnirã kpe mbisimoyo yo, ni ta ngbaduse.

³²Rogo gayo kparakpe ni wawa i ki tona biakpe tipa ro, ki nikpari kpe tipa ro were: ‘Da i abafu ni ku sa yo mbata wa Tura ku bebere baime yo?

³³Ho gamo ahe aye ni bangiri abaime yo, mo ambisi dungu aboro; mo akumukosi abakindo kpotosende na ga kpaima kumuko na gamo bagibagiahe.

³⁴Awere mo ni kuadikuadi ro be abaime, rogo dudungura aime yo; gamo bagibagiahe rinda na mo na agu abandu na abaakurungba dunduko.

³⁵Agu araki rogo ringara du ti ngba gango baime yo dunduko du na bakere kiga mbiko ro; gayo abakindo ki nikio akio be ro ni kere he, kpakpuyo du ni zigizozigizo ho.

³⁶Agu ababagiahe du dagba aboro yo naumo ro; mo da ti iiriwo digidapai, ka mo adú nga ho berewe nye anye kindi ya.’ ”