Read zande Yezekere 28 Bible Online

Yezekere 28 - zande bible

Yezekere 28

¹Sangba Yekova ki ye kono du mi O ni niya:

²“Wiri boro, mo gúmba pai fu bazogo Tura, Ya Gbia MBORI wẽ: “Bambiko kpotoro yo nakiisa pa tihe, mo ki ya, ‘Mi nga mbori, Mi sungu rogo basunga nga ga mbori, bebere abaime yo,’ ono mo ta du ni boro, mbori te, ka mo vura wisiga pa tiro ni iratatamana wa mbori―

³mo nga iratatamana ni rengo ki susi Daniere; a nga rondo ho du ni gbugbu he ti ro te;

⁴mo bi ngarã tipa ro be ga tatamana na ga rugatinapai, ki dungura dahabu na feda ku rogo gamo abaigaamarã yo;

⁵mo kiisi pa ga ngarã be ga bakere tatamana rogo bagaahe, kpotoro yo ki kiisi pa tihe be ga ngarã a―

⁶si du ya Gbia MBORI wẽ: Bambiko mo berẽ pa tiro wa iratatamana wa mbori,

⁷si du, mo ngére; mi ayé na kungba aboro ku ri ro, nga airakigisa aboro dagba arikaaboro susi; i ki mofo gayo abaasape kuti wene ngbanya ga tatamana, ki birikosi gamo taataa apai.

⁸1 atúra ro ku Due yo, mo ki kpi gu kpio nga ga imiimi yo bebere abaime yo.

⁹Mo naya kindi, ‘Mi nga mbori’? ku bangiri agu yo naimo ro, ka mo vura du ono ni boro, ni mbori te, ku be agu yo nahoga ro.

¹⁰Mo akpi gu kpio nga ga azangaye ratise ku be kungba aboro; bambiko mi gumba ha, wa poi Gbia MBORI.”

¹¹Sangba Yekova ki ye kono du mi ni ku ri gere niya:

¹²“Wiri boro, mo tóna biakpe ku ri bakindo Tura, ki ya fu ko, Ya Gbia MBORI wẽ: “Mo adu wa tongo ido nga ga ndikidi pai, hi ahi be tatamana, ki du ziazia rogo wene ngbanyaro.

¹³Mo adu Edene yo, gu ati nga ga Mbori; kikiipa ambia dunduko adu ni gu he naadada ro, nga sadio, tapazo, yaroma, rusoriso, oniki, yasipi, safera, zumeradi, taataa mbia; i amangi he dunduko na taataa dahabu si zi he ku baha, na gamo gbakigbaki aze. Si adu ni mbakadimbakadi he ti gu uru i amangi ro.

¹⁴Mi amoi ro na gu mbedimbedi keruba nabanda pai; mo adu ri ga Mbori ziazia bagangara yo; mo ata dagba ambia we.

¹⁵Mo adu zanga gbarasa rimoro rogo gamo apai tona ti gu uru i amangi ro, daho i abi irairapai ni rogo ro yo.

¹⁶Mo ahi be zuu, mbiko gu kpaima bagibagi ahe nangia gamo, mo ki mangi ingapai; si du mi aba ro wa birikobiriko he ri ga Mbori bagangara, gu keruba nabanda pai ki do ro ku zegi yo ku dagba ambia we yo.

¹⁷Kpotoro yo akiisi pa tihe mbiko wene ngbanyaro; mo awasi ga tatamana mbiko ga taataa apai. Mi aba ro ku sande; mi akusi ro ku bangiri abakindo, i ki bi ro abi ni bangiriyo.

¹⁸Mo abirikosi gamo kparakpara aba; mbiko rimbasa gamo irairaapai, rogo pa ga sunge bagahe zanga rurupai; si du mi akusi we rogo ro yo; si ariti ro, mi ki sa ro ni kuke auru kpotosende ku bangiri agu yo dunduko nabi ro.

¹⁹Agu aboro dunduko ini ro dagba aboro i nakiga mbiko ro; mo da ti iiriwo digidapai, ka mo adú nga ho berewe nye anye kindi ya.”

²⁰Sangba Yekova ki ye kono du mi ni niya:

²¹“Wiri boro, mo sá kpakpuro koyo du Sidona ni, ki gumba pai wa nebi kuti he,

²²ki ya, Ya Gbia MBORI wẽ: “Ako Sidona, mo ngére, mi gbarasi rimoro, mi adú ni irisiirisi re rogo bangbanda ro. I ki ini he ya mi nga Yekova ho mi ka sara ngbanga ni rogo ho yo, ki du ni kparakpara re ziazia rogo ho yo;

²³bambiko mi akéda tata kaza ku rogo ho yo, na kure ku ngba gaha agene bakporo; kangba ki niti rogo ho yo, be gu basape nga gu du kuti he ti papara arago dunduko. Si du i aina ha ya mi nga Yekova.

²⁴“Kiwe adú nga yo berewe tipa ngbatunga aYisaraere, ka rupa yo watadu nguruza ka imisa yo dagba akurayo dunduko napayasi yo te. Si du i aina ha ya mi nga Gbia MBORI.

²⁵“Ya Gbia MBORI wẽ: Ho mi ka dungura ngbatunga aYisaraere ni dagba agu aboro yo i agbandaka yo ku ho ni, ki du ni kparakpara re ziazia rogo yo yo ku bangiri arikaaboro, si du i aráka kina rogo gayo ringara nga gu mi afu fu gi moyambu nangia Yakoba.

²⁶I ki niraki zezeredi rogo ho, i ki nidudua abambu niruku bakakue aati yo. I aráka zezeredi ho mi ka sara ngbanga ni ku ri akurayo dunduko napayasi yo. Si du i aina ha ya mi nga Yekova gayo Mbori.”