Read zande Yezekere 30 Bible Online

Yezekere 30 - zande bible

Yezekere 30

¹Sangba Yekova ki ye kono du mi ni niya:

²“Wiri boro, mo gúmba pai wa nebi, ki ya, Ya Gbia MBORI wẽ: “Mo yóro wawa, ‘Na gberẽ gu uru re!’

³Bambiko uruhe mbedi, ga Yekova uru mbedi; si adú ni uru dubo, ni rago sarangbanga tipa arikaaboro.

⁴Basape ayé ku ri Ezipeta, imisiri adú rogo Etiopia gbe, ho kangba imiimi aboro ka tiwa ni Ezipeta yo, ho i ka ga ni na gaha rimbasa aboro ku sa yo, amburu gaha pai ki gbandaka.”

⁵Etiopia akpi be basape, na Puta, na Ruda, na Arabia dunduko, na Ribue, na aboro gu ringara i azunga he na yo.

⁶“Ya Yekova wẽ: Agu yo nasongoda Ezipeta akpí akpi, gu ruka nga ga gaha ome ati ku sande; tona Migedora yo ki da ku Sewene yo i ka kpika ni rogo yo be basape, wo poi Gbia MBORI.

⁷Si ki du ni bate dagba agu aringara du ni ngbi ugure, gaha abaakporo adú dagba agu abaakporo i agbu he.

⁸Si du i aína ha ya mi nga Yekova, ho moi mi we ni ti Ezipeta, na gaha amounda ki kuadi dunduko.

⁹“Ti gu uru re ipiipi abandusunge akúra yo du mi ni rogo abaakurungba ka kigisa gu zezere aEtiopia re; imisiri ayé ku ri yo gbe ti gu uru re nga ga Ezipeta rago sarangbanga; bambiko, mo ngére, si naye!

¹⁰“Ya Gbia MBORI wẽ: Mi adígisa gu rimbasa aboro nga ga Ezipeta yo, vuru be Nebukadenesara bakindo aBabero.

¹¹Ko tigako na gako aboro, nga airakigisa aboro dagba arikaaboro susi, i ayé na yo ka gbarasa ringara; i agbé gayo abaasape kuti Ezipeta, ki hisi ringara na kangba imiimi aboro.

¹²Mi ki ugudisi di nga Nire, ki bagi ringara ku be gbegberẽ aboro; mi akígisa ringara na ahe rogo ho dunduko, vuru be kungba aboro, mi, Yekova gumba ha.

¹³“Ya Gbia MBORI wẽ: Mi agbárasa kpiaahe, ki digisi pa kungba ahe Membi yo; bazogo adú nga berewe ringara Ezipeta yo te; si du mi amáa gunde rogo ringara Ezipeta.

¹⁴Mi asá Paterosa ni bate, ki moi we ti Soana, ki sari ngbanga ku ri Teoese.

¹⁵Mi ki uka gi ngariangaria zinga ku ri Perusiama gu nyanyaki ba nga ga Ezipeta, ki rogo gu rimbasa aboro Tebese yo ku sa yo.

¹⁶Mi ki moi we ti Ezipeta; Perusiama adú na imisiripai gbe; Tebese adú ni sapusapu he, gaha angapa ki kuadi ku sande.

¹⁷Gu paranga aboro du Ono yo na Pibesete yo akpíka be basape; ade andú ni zizi yo.

¹⁸Rago abíra Tapenesa yo, ho mi ka kuadi pa zogarago yo ni nga ga Ezipeta, gu ruka nga ga gaha ome ki digi; Tapenesa adú ni dadidadi he be dubo, awirihe nga ade andú ni zizi yo.

¹⁹Were mi ka sara ngbanga ku ri Ezipeta. Si du i aína ha ya mi nga Yekova.”

²⁰Ti 11 garã, ti bambata diwi, ti rameru saba, sangba Yekova aye kono du mi ni niya:

²¹“Wiri boro, mi kuadi be Faro bakindo aEzipeto; mo ngére, i avo nga ha te, ka husa ha ni vo ho ni giri remu oro a te, si du wa ka si du nyanyaki ka zada basape.

²²Si du ya Gbia MBORI wẽ: Mo ngére, mi gbarasi rimo Faro bakindo aEzipeto, mi akúadi abeko, gu nyanyaki beko na gu nadu ni kitiri he; mi ki mangi basape si ti ati be ko.

²³Mi agbándaka aEzipeto ku dagba arikaaboro yo, ki kparaka yo ku rogo aringara dunduko.

²⁴Mi ki nyakasi be bakindo aBabero, ki moi gi basape ku beko yo; ono mi akúa be Faro, ko ki niuko ku bangiri bakindo aBabero wa gu boro nihõ sa kpio.

²⁵Mi anyákasa be bakindo aBabero, ono be Faro ati ati; i ki ini he ya mi nga Yekova. Ho mi ka maa gi basape ni ku be bakindo aBabero, ko atáã ha koyo du ringara Ezipeta ni;

²⁶mi ki gbandaka aEzipeto ku dagba arikaaboro yo ki kparaka yo ku rogo aringara dunduko. Si du i aína ha ya mi nga Yekova.”