Read zande Yezekere 31 Bible Online

Yezekere 31 - zande bible

Yezekere 31

¹Ti 11 garã, ti biata diwi, ti bambata rameru, sangba Yekova aye kono du mi ni niya:

²“Wiri boro, mo yá fu Faro bakindo aEzipeto na fu gako rimbasa: “Mo nawira da rogo pa gamo du ni bahe?

³Mo ngére, mi aríngbisa ro kuti kedara Rebanona yo, du na wene abehe ti ni na nzeremehe wa ku bire yo, ki du ni basosono ho, rihe ki da kina ku rogo adubo yo.

⁴Aime nambu ti ni, dudungura ime ki sonosi he ni gbanga ha, gaha adi ki nifu pati ba rugo ho kirikiri, ki nikparaka gaha awiriadi fu agu angua dunduko du bire yo.

⁵Si du si ki nisono ni gbanga ha ku ari yo gbe ku ri agu angua du bire yo dunduko; abehe ki nisono ni bakikindigi he na apaha ni gbangagbanga ha, mbiko gu ime du kpaima pati tarãha.

⁶Azire ari dunduko ki nidua bambura ti rukutu abehe; anya nvuo dunduko ki batika awira tii abehe; bakikindigi arikaaboro dunduko araki tii nzeremehe yo.

⁷Si adu ni bawene he mbiko pa kia ha, na tipa pa bagiza abehe; bambiko atarãha arimi ku sende yo ku rogo ba kpaima aime.

⁸Agu akedara nadu rogo ga Mbori ati arengba nga na susa ha te, kupuresa arengba nga na rukutu abehe a te; gu ngua du wa bagbodi adu wa kina kungba he, si arengba nga na abehe te; a nga angua rogo ga Mbori ati ngbanyaha adu wa gaha te.

⁹Mi amangi he ni bawenehe na badungu abehe ti ni, angua dunduko Edene yo naakpi he, nga gu naadu rogo ga Mbori ati.

¹⁰“Si du ya Gbia MBORI wẽ: Bambiko si sono ku ari yo gbe ki moi rihe kina rogo adubo yo, kpotoho ki du na ruka tipa pa gaha sona,

¹¹mi afu he ku be gu ni du na baome nga ga arikaaboro ni; ni amánga na ni ni rengo wa rengbe gaha gbigbitapai. Mi ba ha ku zegi yo.

¹²Kungba aboro, nga airakigisa aboro dagba arikaaboro susi i adé he ku sande ki mbu he. Abehe ati ku ri abaagangara yo na ku rogo angboongboo dunduko, rukutu abehe apíka ni kuadikuadi he rogo agene aime dunduko ringara yo; aboro dunduko kpotosende no agúari tii nzeremehe ki mbu he.

¹³Azire ari dunduko aráka ri gbarasigbarasi he, anya nvuo dunduko asúnga tii abehe.

¹⁴Si ki du wa gere dunduko ya angua dunduko du ti ngba aime asóna nga ni bagbanga ha te, watadu maa rihe ku rogo dubo yo a te; ka agu angua nambira ime adá nga ti pa gaha sona a ya; bambiko i ima fu he dunduko sa kpio, sa gu rago du ku tii sende yo wa sa na aboro, na agu yo nazorã ku Due yo.

¹⁵“Ya Gbia MBORI wẽ: Ho si ka zorã ni ku Baatoro kpikpi aboro yo mi arúga dudungura rago si kpari tipa ha, ki kisi gaha adi, dungu aime ki du ni kisikisi he; mi asá Rebanona ku bitimo yo mbiko ho, he amáka angua dunduko ati yo bambiko gaha pai.

¹⁶Mi akígisa arikaaboro i kio ti woro tigoho, ho mi ka ba ha ni ku Baatoro kpikpi aboro yo na agu yo nazorã ku Due yo; agu angua dunduko du Edene yo, gu siasia bawenehe du Rebanona yo, agu angua dunduko nambira ime, si adú dunduko ni wasawasa ha rogo gu rago du ku tii sende yo.

¹⁷I azórã na ni a ku Baatoro kpikpi aboro yo, koyo du agu yo ni i aimi yo ni basape; ii, agu yo naraka tii nzeremehe dagba arikaaboro yo i akpíka akpika.

¹⁸Da mo nawira ni rogo taarimo na rogo pa du ni bahe dagba angua Edene yo? I azóga ro wa sa na agu angua du Edene yo kina ku rogo gu rago du ku tii sende yo; mo apí dagba azangayeratise, na agu yo i aimi yo ni basape. “Gere nga Faro na gako rimbasa aboro dunduko, wo poi Gbia MBORI.”