Read zande Yezekere 33 Bible Online

Yezekere 33 - zande bible

Yezekere 33

¹Sangba Yekova ki ye kono du mi ni niya:

²“Wiri boro, mo gúmba pai fu awiri angbatungaro ki ya fu yo, Ka mi ye na basape kuti ringara, aboro gi ringara re ki sia kumba dagba yo yo, ki sa ko ni gayo babandarago;

³ka ko bi basape si niye sa gi ringara re ki vu nambongo ki fugu he fu aboro;

⁴si du ka boro gi woro nambongo fugapai ki basa pa ha, basape ki ye ki imi ni, kureni ki du kina ku ri ni.

⁵Ni agi woro nambongo, ki basa pa ha; si du kureni ka du ti ni kina ku ri ni. Ono ka ngia ni agi pa fugapai, ka ni abatasi ungani abatasa.

⁶Ono ka babandarago bi basape si niye ka ko avu nga nambongo ya, si du ka ko afúga nga pa ha fu aboro ya, basape ki da, ki imi gu ni dagba yo yo; si aimi gi boro re ni kina gani irairapai, ono mi aíra bape kureni ti kina babandarago.

⁷“Si du mi moi ro, wiri boro, ni babandarago tipa ngbatunga aYisaraere; ho mo ka nigi pai ni ngbare, mo ka fuga pai fu yo tipa re.

⁸Ka mi ya fu gbegberẽ boro, Ako gbegberẽ boro, mo akpí akpi ni rengo, ono mo agumba nga pai ka fuga ha fu gbegberẽ boro ni mbu gani apai ya, gu gbegberẽ boro re akpi ni kina gani irairapai, ono mi aíra bape kureni ti kina ro.

⁹Ono ka mo fugu pai fu gbegberẽ boro ni mbu gani apai, ka ni ambu nga gani apai ya; ni akpi ni kina gani irairapai; ono mo ki batasi ungaro tigamo.

¹⁰“Mo, wiri boro, mo gúmba ha fu ngbatunga aYisaraere, Wo pe oni he niya: ‘Gaani samungu du ku ri rani na gaani ingaapai, ani naruna mbiko ho; ani awirã Da du ni ungarani waĩ?’

¹¹Mo yá fu yo, Ya Gbia MBORI wẽ, Wa du mi ni ungare, rago angba nga ti re tipa kpio gbegberẽ boro te, ono gu ngba nga gbegberẽ boro sa tini ti gani pai ki nye ni ungani; oni sá tironi, oni sá tironi ti gaoni gbigbita asino; ako ngbatunga aYisaraere tipagine oni aida pa kpio ti ni?

¹²Mo tigamo, wiri boro, mo yá fu awiri angbatungaro, Gu rurupai nga ga ruru boro abátasa nga ni rago gani samungu te; gu gbegberẽpai nga ga gbegberẽ boro, ka ni ti nga mbiko ho ti gu rago mbu ni gani gbegberẽpai te, gu ni du ni ruru ni ni anyé nga ni ungani mbiko gani rurupai ni gu rago ni namanga ingapai te.

¹³Ho ka mi gumba pai ni fu ruru boro, ya ni anyé ni ungani ni rengo; ni ki nikida kuti gani rurupai, ki nimangi irairapai, i atingida nga pa gu gani rurupai ni anamanga ha wa sa te; ono gu gani irairapai ni anamanga, ni akpi kina rogo ho.

¹⁴Ho ka mi gumba pai ni a fu gbegberẽ boro ki ya, ‘Mo akpí akpi ni rengo,’ ka ni mbu gani ingapai ki nimangi gu pai ru aru,

¹⁵ka gbegberẽ boro gasi gani bape, ki karaga gu he ni adĩ he ni dĩ, ki nipeke fuo arugute unga, ka ni amánga nga irairapai berewe ya; ni anye anye ni ungani ni rengo, ni akoi nga te.

¹⁶I atingida nga pa gu gani ingapai ni anamanga ha wa sa te; ni mangi pai ku sangba rugute yo na rurupai, ni anyé ni ungani ni rengo.

¹⁷“Ono awiri angbatungaro naya, ‘Gu pai nga ga Gbia ru nga ha te’; ono tipa yo, a nga si nga gayo pai aru nga ya te?

¹⁸Ho ruru boro nisa tini ni ti gani rurupai, ki mangi irairapai, ni akpi tipa kina ha.

¹⁹Ho gbegberẽ boro nisa tini ni ti gani gbegberẽpai, ki mangi pai ku sangba rugute yo na rurupai, ni abátasa ungani abatasa mbiko ho.

²⁰Oni naya, ‘Gu pai nga ga Gbia, ru nga ha te.’ Ako ngbatunga aYisaraere, mi asára ngbanga roni ni ba sa sa kina kuti gaoni apai.”

²¹Ti 12 garã nga ga gaani zia, ti bawe diwi, ti rameru bisue, kumba namere Yerusarema yo ki ye kono du mi ni, ki ya, “Bakporo ti.”

²²Were be Yekova adu ri re ni gu nyemu mbata gu merẽmerẽ boro nikaye re; ko ki za ngbare ti gu rago gu kumba aye wiso re kono du mi ni; si du ngbare adu ni zaza ha, ka mi adu nga berewe ni bubo ya.

²³Sangba Yekova ki ye kono du mi ni niya:

²⁴“Wiri boro, araki rogo agi angbi ugure re rogo ringara aYisaraere nanagumba pai niya, ‘Abarayama angia kina kumba sa, ono ko adi ukumbo nga ga ringara; ono ani nga ngenge aboro; i afu ringara ni rengo fu rani ni ũkumbo.’

²⁵Si du mo yá fu yo, Ya Gbia MBORI wẽ; Oni nari pasio na kure rogo ho, ki ningere koyo du gaoni kpiaahe ni, ki niuka kure; oni adia ringara ni gaoni tie?

²⁶Oni naru mbiko basape, oni namanga kere gbegberẽapai, oni ni ba sa sa nabirikosi dere akuaroni; oni adia ringara ni gaoni tie?

²⁷Mo gúmba gere fu yo, Ya Gbia MBORI wẽ; Wa du mi ni ungare, ni rengo agu yo du rogo angbi ugure akpíka be basape; gu ni du rogo haúrago, mi afú ni fu anya nvuo ami riti ni; agu yo du rogo nyanyaki aba na rogo asimbia, i akpíka be tata kaza.

²⁸Mi ki sa ringara ni vurubate ni ngbi ugure; gu ruka nga ga gaha ome ki da ti digidaha; agu abaagangara du Yisaraere yo ki du ni bate, ka boro asúsa nga rogo ho yo ya.

²⁹Si du i aina ha ya mi nga Yekova ho mi ka sa ringara ni ni vurubate, ni ngbi ugure, bambiko gu kere gbegberẽapai nga gu mangi yo ho yo.

³⁰“Ono tipa ro, wiri boro, agu awiri angbatungaro nga agu yo nagumba pai tipa ro pati angapa bakporo na ti angbadimo abambu, gu ni fu kurani, i ni ba sa sa fu awirinayo niya, ‘Mo yé ka gia gu pai nakura ngba Yekova yo.’

³¹I ki ye koyo du mo ni wa aboro niye, i ki sungu ku bara bangiro wa gimi aboro, i ki gi gu pai mo agumba ha, ono i amanga nga ha te; bambiko i nayugo bakere nyemuse ni kina ngbayo, ono ngbaduyo yo moi yo ho sa dia gayo mokiisa.

³²Mo ngére, mo bangiriyo wa gu boro nabi abia nyemuse na bawene fugoni ki nitaki uworo he wenengaĩ, bambiko i gi gu pai gumba mo ho, ono i amánga nga ha te.

³³Ho gi ka da ni re si ada ni rengo! i aina ha tie ya nebi nidu dagba yo.”