Read zande Yezekere 34 Bible Online

Yezekere 34 - zande bible

Yezekere 34

¹Sangba Yekova aye kono du mi ni niya:

²“Wiri boro, mo gúmba pai wa nebi kuti ababanda akandoro nga ga aYisaraere yo, mo gúmba pai wa nebi ki ya fu yo, fu kina ababanda akandoro, Ya Gbia MBORI wẽ: Ako ababanda akandoro nga ga aYisaraere yo ninariga kina tironi! Ka ababanda akandoro rigi nga akandoro te?

³Oni nari nzeme, oni naukadi tironi na roko mange anya, oni naimo anya nzeme; ono oni ariga nga akandoro te.

⁴Oni anyakasa nga gu rurungbura ra a te, agu ra du na kaza oni ahusa nga ra te, gu gbarĩgbarĩ ra oni avoda nga ra a te, gu ngbuongbuo ra oni ayega nga na ami te, gu ingiingi ra oni agbata nga ra a te, oni nazoga ra na ome na kere nyaka.

⁵Si du gbandaka ami ti ni bambiko babandara adu nga ho te; ami ki du ni riahe tipa anya nvuo dunduko.

⁶Gimi akandoro agbandaka, ami ki niyara ri abaagangara dunduko na ri tumbatumba arago dunduko; gimi akandoro agbandaka ri kpotosende dunduko, ki zanga boro du ho ka ngera tipa ra, watadu ka gbata ra.

⁷“Si du, oni nga ababanda akandoro, oni gi sangba Yekova:

⁸Wa du mi ni ungare, wo poi Gbia MBORI, bambiko gimi akandoro du ni úmozi, gimi akandoro du ni riahe fu anya nvuo dunduko, wa adu nga babanda akandoro ti ra ya; bambiko gimi ababanda akandoro angera nga tipa gimi akandoro te, ono ababanda akandoro rigi kina tiyo, ka i ariga nga gimi akandoro ya;

⁹si du, oni ababanda akandoro, oni gi sangba Yekova:

¹⁰Ya Gbia MBORI wẽ, Oni ngére, mi gbarasi rimo ababanda akandoro; ngbanga gimi akandoro adú kina ku ri yo, mi ki za yo ti riga akandoro; ababanda akandoro ariga nga tiyo berewe te, Mi abátasa gimi akandoro ngbayo yo, ka ami aau nga ni riahe fu yo ya.

¹¹“Bambiko ya Gbia MBORI wẽ: Mo ngére, mi ni tire nikangera tipa gimi akandoro, ki nigbata ra.

¹²Wa babanda akandoro naagbata gako rimbasa anya ho bete gako akandoro nigbandaka ni ku rogo kura ringara tuturu, wo mi ka gbata gimi akandoro, mi ki batasi ra rogo arago dunduko yo ami agbandaka ku ho ni ti rago adubo na nduunduu bitimo.

¹³Mi ki kusi ra dagba aboro, ki dungura ra rogo aringara, ki ye na ami ku rogo ndikidi gaami ringara; mi ki nirigi ra ri abaagangara Yisaraere yo, pati agugaabi yo, na rogo abaraka dunduko ringara yo.

¹⁴Mi ariga ra na wene banambu, gaami abanambu adú ku ri gbangagbanga abaagangara Yisaraere yo; yo ami ka pika ni sande rogo wene nvuo, ami ari wene wesewese nvuo ri abaagangara Yisaraere yo.

¹⁵Mi ni tire adú ni babanda gimi akandoro, mi ki pigi ra sande, wo poi Gbia MBORI.

¹⁶Mi agbáta ingiingi ra, mi ki yega na gu ngbuongbuo ra, mi ki vodi gu gbarĩgbarĩ ra, mi ki nyakasi gu rurungbura ra, mi abánda gu kikindigi ra na gu nyanyaki ra, mi ariga ra na ruru sarangbanga.

¹⁷“Tipa roni, nga gimi rimbasa anya, wo poi Gbia MBORI: Oni ngére, mi sari ngbanga dagba gu kandoro na kura kandoro, dagba abaakandoro na abaameme.

¹⁸Si arengba nga bangironi ka ri rogo gu wene banambu te re? ono oni ki simbi gaoni yangara banambu ku sande ni nduroni; oni ki mbiri ziazia ime, ono oni ki metasi gu yangara ha ni nduroni.

¹⁹Ka gimi akandoro ri agu ahe oni asimbi ni nduroni, ki mbiri gu he oni ametasi he ni nduroni?

²⁰“Si du, ya Gbia MBORI fu yo wẽ: Oni ngére, Mi ni tire asára ngbanga dagba gu kikindigi akandoro na gu ugudiugudi akandoro.

²¹Bambiko oni fõ ra ni pavuroni na kpurunga beroni, ki turã gu rurugbura ra dunduko ni gaoni ome, daho oni agbandaka ra ni ku rogo ringara dunduko,

²²mi abátasa gimi rimbasa akandoro, ami adú nga berewe ni umozi te; mi ki sari ngbanga dagba gu kandoro na kura kandoro.

²³Mi ki moi babanda akandoro sa ku ri ra, nga gi moyambu nga Dawidi, ko ki nirigi ra: ko ariga ra ki du ni babanda ra.

²⁴Mi nga Yekova adú ni gaami Mbori, gi moyambu nga Dawidi ki du ni bazogo ku ri ra; mi nga Yekova gumba ha.

²⁵“Mi amánga mokido na ami nga ga zereda, ki do anya nvuo rogo ringara, si du ami ki niraki zezeredi rogo ngbakungba ki nira rogo abire yo.

²⁶Ami ki du na maku wa sa na agu aba du pati ra kirikiri pati gi gangara; mi ki nikedimamumai ti regboho; si adú nga mamu maku.

²⁷Angua ati azúka zuzuhe, kpotosende ki zugasi gaha zuzuhe, ami ki raki zezeredi rogo gaami ringara; ami ki ini he ya mi nga Yekova, ho mi ka kua angbongbo ni ti gaami gonga, ki batasi ra be agu yo nasa ra ni akanga.

²⁸Ami adú nga berewe ni úmozi fu arikaaboro te, anya ringara aríta nga ra a te; ami aráka zezeredi, ka boro agúndesi nga ra ya.

²⁹Mi ki mbakadi wene rúkurúku ahe tipa ra, ka gomoro amánga nga ra rogo ringara berewe ya, ka ami ambú nga be gu wasiro nga ga arikaaboro berewe a ya.

³⁰Ami ki ini he ya mi du na ami nga Yekova gaami Mbori, ami nga ngbatunga aYisaraere nga gimi aboro a, wo poi Gbia MBORI.

³¹Oni nga gimi akandoro, nga agu akandoro nga ga gi banambu ra, mi nga gaoni Mbori, wo poi Gbia MBORI.”