Read zande Yezekere 35 Bible Online

Yezekere 35 - zande bible

Yezekere 35

¹Sangba Yekova ki ye kono du mi ni niya:

²“Wiri boro, mo sá kpakpuro kuti Bagangara Seira, ki gumba pai wa nebi kuti he,

³ki ya fu he, Ya Gbia MBORI wẽ: Mo ngere, Bagangara Seira, mi gbarasi rimoro, mi atáã bere kuti ro, mi ki sa ro ni vurubate, ni gbegberẽ he.

⁴Mi asá gamo abaakporo ni ngbi ugure; mo asá tiro ni vurubate; mo ki ini he ya mi nga Yekova.

⁵Bambiko mo aka kuti nyenye sogote, ki fu aYisaraere ku be basape ti rago gayo gberãngbi; ti rago gayo yangara mbusa;

⁶si du, wa du mi ni ungare, wo poi Gbia MBORI, mi ambákada ro sa kure, kure ki nido fuo ro; bambiko ngbanga kure du ku ri ro, si du kure adó fuo ro ti ni.

⁷Mi asá Bagangara Seira gbegberẽ ni vurubate, mi ki rogo agu yo dunduko ku sa yo naaye ki niga.

⁸Mi ki hisi gamo abaagangara na kangba imiimi aboro; agu yo i ka imo yo ni basape i atiwa ku rogo gaoni angboongboorago na ku rogo gaoni angbungumu.

⁹Mi asá ro ni nyenye vurubate, ka boro ará nga rogo gamo abaakporo ya. Si du mo aina ha ya mi nga Yekova.

¹⁰“Bambiko ya mo, ‘Agi arikaaboro ue re na agi aringara ue re adú ni gimi, ani aróga ha ni gaani,’ ka Yekova vura du yo vuru

¹¹si du, wa du mi ni ungare, wo poi Gbia MBORI, mi amánga ro ku sangba gu zinga na ku sangba gu deringo yo mo ayugu bambiko ga sogote kuti yo; mi ki yugu tire dagba yo yo, mo ki ini re, ho mi ka sara ngbanga ro ni.

¹²Mo ki ini he ya mi nga Yekova, gi agu agberangbayo dunduko nga gu gumba mo kuti abaagangara du Yisaraere yo, niya, ‘Si ni vurubate, i fu he fu rani ani riti he.’

¹³Oni ki abia tironi kuti re ni ngbaroni, ki ningeesi gaoni gumbagumba apai kuti re; mi agi he.

¹⁴Ya Gbia MBORI wẽ: Mi asá ro ni vurubate, kpotosende ki ngi angi dunduko mbiko ho.

¹⁵Wa mo nangi ku ri ga ngbatunga aYisaraere ringara, bambiko si adu ni bate, wo mi akamanga ro; mo adú ni vurubate; nga Bagangara Seira, na Edome dunduko, na baha du. Si du i aina ha ya mi nga Yekova.