Read zande Yezekere 37 Bible Online

Yezekere 37 - zande bible

Yezekere 37

¹Be Yekova adu ti re, ko ki kusi re yo be gako Toro, ki moi re ku sande rogo ngboongboorago; si ahi ahi be meme aboro.

²Ko ki susi na mi Dati he kirikiri; oni ngére, badungu ameme nadu yo rogo ngboongboorago; were, si adu ni baugu he gbe.

³Ko ki ya fere, “Wiri boro, ka agi ameme re du ni ungaha berewe?” Mi ki karaga ha, “Ako Gbia MBORI, mo ini he.”

⁴Ko ki ya fere berewe, “Mo gúmba pai fu agi ameme re, ki ya fu he Ako ugu ameme, oni gí sangba Yekova.

⁵Ya Gbia MBORI fu agi ameme re wẽ: Oni ngére, mi arímisa omeonga ku rogo roni yo, oni ki du ni ungaroni.

⁶Mi amáa agbaga ti roni, ki moi pasio ti roni, ki moi kpotoboro ti roni, ki moi omeonga ku rogo roni yo, oni ki du ni ungaroni; oni ki ini he ya mi nga Yekova.”

⁷Si du mi ki gumba pai wa nebi wa Yekova arugu re na ni; wa mi agumba ha, oni ngére, worohe ki wo kesekese; ameme ki zungudi tihe wa sa, meme kuti kina gaha meme.

⁸Mi ki ngere, ki bi agbaga ti ni, pasio ki ye ku ti ni, kpotoboro ki du ti ni a; ono omeonga adu nga rogo ho yo te.

⁹Si du ko ki ya fere, “Mo gúmba pai wa nebi fu omeonga, Ya Gbia MBORI wẽ: Ako omeonga, mo ye rogo agu ayuge du biama, ki ongo ku ri gi imiimi aboro re, i du ni ungayo.”

¹⁰Si du mi agumba pai wa ko arugu re na ni, omeonga ki rimi ku rogo yo yo, i ki du ni ungayo, ki ru ku ngba nduyo, ni bakere rimbasa aboro gbe.

¹¹Ko ki ya fere, “Wiri boro, agi ameme re nga ngbatunga aYisaraere dunduko. Mo ngére, ya yo, ‘Memerani ugu du, gaani maabangirise go ti rani; i akpara rani Ku sa yo.’

¹²Si du mo gúmba pai wa nebi, ki ya fu yo, Ya Gbia MBORI wẽ: Oni ngére, Ako gimi aboro, mi azá amurãroni, ki kusi roni rogo amurãroni yo; mi ayéga na oni ku kporo no berewe na ku rogo ringara aYisaraere.

¹³Ako gimi aboro, oni aína ha ya mi nga Yekova ho mi ka zaka amurãroni ni, ki kusi roni rogo amurãroni yo.

¹⁴Mi ki moi gi Toro ku rogo roni yo, oni ki du ni ungaroni, mi ki moi roni ku rogo kina gaoni ringara; si du oni aína ha ya mi nga Yekova nagumba ha, mi mangi he, wo poi Yekova.”

¹⁵Sangba Yekova aye kono du mi ni niya:

¹⁶“Wiri boro, mo di ngua ki ke pai ti ni, ‘Tipa Yuda, na tipa awiri aYisaraere kpamia tiyo na ko’; mo ki di kura ngua ki ke pai ti ni, ‘Tipa Yosefa ga Efuraima ngua, na tipa gu ngbatunga aYisaraere kpamia tiyo na ko’;

¹⁷mo ki zungu he wa sa ku rogo ngua sa, si du wa ngua sa ku be ro.

¹⁸Ho awiri ngbatungaro ka ya ni foro, ‘Ka mo yugu nga gu pai fu rani yugu mo na agi angua te re?’

¹⁹Mo yá fu yo, Ya Gbia MBORI wẽ: Oni ngére, mi nikadia ga Yosefa ngua nga gu du be Efuraima na gu ngbatunga aYisaraere kpamia tiyo na ko; mi ki zungu ga Yuda ngua kuti ni, si ki du wa ngua sa, ya si du sa ku be re.

²⁰Ho agu angua mo nike pai ti ni ka du ni be ro ku bangiriyo,

²¹mo ki ya fu yo, Ya Gbia MBORI wẽ: Oni ngére, mi aróga awiri aYisaraere be arikaaboro dagba agu yo yo i andu ku ho ni, mi ki dungura yo rogo pavururago dunduko, ki ye na yo ku rogo kina gayo ringara;

²²mi ki kpamia yo wa rikaaboro sa rogo ringara, ri abaagangara Yisaraere yo; bakindo ki du sa ku ri yo dunduko; ka i adú nga berewe ni arikaaboro ue ya, ka i akparaka nga berewe ku rogo angbi ue a ya.

²³I abírikosi nga tiyo berewe na gayo kpiaahe na gayo kere ahe te, watadu na gayo samungu a te; ono mi abátasa yo ti gu tikusayo i amangi ingapai rogo ho, ki girisi yo; i ki du ni gimi aboro, mi ki du ni gayo Mbori.

²⁴“Gi moyambu nga Dawidi adú ni bakindo ku ri yo; i ki du na babanda akandoro sa. I apéka fuo gimi rugaapai ki nibanda pa gimi asarangbanga, ki nimangi he.

²⁵I aráka rogo gu ringara yo abaroni anaraka ni nga gu mi afu fu Yakoba gi moyambu; i na awiriyo na awiri awiriyo aráka yo nye anye kindi; Dawidi gi moyambu adú ni bazogoyo nye anye kindi.

²⁶Mi amánga mokido nga ga zereda na yo; si adú ni nyenye mokido na yo; mi ki fu maku fu yo ki ngeesi yo, mi ki moi gi kparakpara ba dagba yo nye anye kindi.

²⁷Gi baraka adú na yo; mi ki du ni gayo Mbori, i ki du ni gimi aboro.

²⁸Si du arikaaboro aína ha ya mi nga Yekova kpara awiri aYisaraere ziazia, ho gi kparakpara ziazia ba ka du ni dagba yo nye anye kindi.”