Read zande Yezekere 39 Bible Online

Yezekere 39 - zande bible

Yezekere 39

¹“Mo, wiri boro, mo gúmba pai wa nebi kuti Gogo, ki ya, Ya Gbia MBORI wẽ: Ako Gogo, mo ngére, mi gbarasi rimoro, nga gbia abazogo nga ga Meseke ko na ga Tubara ko;

²mi aária ro ku sa yo ki do ro ku mbata yo, ki kusi ro rogo mburu apapara rago nodiyo, ki ngbe mbata yo foro kuti abaagangara Yisaraere yo;

³si du mi akúa ga mboto du ku garebero yo, ki mangi gamo aguanza ami tiwi kumbabero yo.

⁴Mo ati ku ri abaagangara Yisaraere yo, mo na gamo bakere arimbasa aboro dunduko na agu aboro du fuo ro; mi afú ro fu angbatunga azire gomoro ni úmozi na fu anya nvuo ami riti ro.

⁵Mo ati ku rogo haurago yo; bambiko mi gumba ha, wo poi Gbia MBORI.

⁶Mi akéda we ku ri Magogo na ku ri agu yo naraka zezeredi ti ngba gango baime yo; i ki ini he ya mi nga Yekova.

⁷“Mi ki yugu pa kparakpara ziazia rimore i ini he dagba gimi aboro Yisaraere yo; ka mi aída nga i gbarasi kparakpara ziazia rimore berewe ya; arikaaboro aína ha ya mi nga Yekova, gu Ziazia Ko du dagba aYisaraere.

⁸Mo ngére, si naye, si adú ni mangimangi he, wo poi Gbia MBORI. Gure nga gu rago mi agumba pa ha.

⁹“Si du agu yo naraka rogo abaakporo Yisaraere yo, i akúra ka ndu ka maa we ti amarã vura ki zokodi he, na avurakube na bakikii avurakube, amboto na aguanza, angbondo na abaso, i ki ginda we kuti ni tipa agarã saba;

¹⁰si du zingo kua nyake ati yo amánga nga yo te, watadu de gu rogo abire yo a te, bambiko i agínda gayo awe kina ri amarã vura; i agbarasa agu yo nagbarasi yo, ki gbu agu yo nagbu yo, wo poi Gbia MBORI.

¹¹“Ti gu rago re mi afú ba fu Gogo tipa kpisida aboro rogo ho ringara Yisaraere yo, gu Ngboongboo Aboronunguro ku uroyo pati baime; si adé gangi ti andununguro, bambiko yo i ka kpisida Gogo ni na gako rimbasa dunduko; i ayámba ha nga Ngboongboo Amona-gogo.

¹²Bambiko ngbatunga aYisaraere nikakpisida yo adiwi ki du saba, ka girisa ringara.

¹³Aboro ringara dunduko nikakpisida yo; rimoyo awo mbiko gi pai re ni gu rago mi ka du ni irisiirisi re, wo poi Gbia MBORI.

¹⁴I akpára aboro i nisusi rogo ringara ka kpisida agu yo kindi nanye rogo ringara, si du wa ka i girisi he; ti digida saba diwi i ki wisigi pa ha.

¹⁵Ho agi yo ka susa ni re rogo ringara gu boro ki bi meme boro, ni amáa úyugohe ho pati he, daho akpisidi aboro ka kpisida ha ni ku rogo Ngboongboo Amona-gogo yo.

¹⁶Bakporo nga Amona du yo a. Were i ka girisa ringara.

¹⁷“Tipa ro, wiri boro, wo poi Gbia MBORI: mo gúmba pai fu angbatunga azire dunduko, na fu anya nvuo dunduko ki ya, ‘Oni tíria tironi ki ye, oni dungura tironi rogo pavuru arago dunduko sa motumo pumbo nga gu mi ambakada ha tipa roni, bakere pumbo motumo ku ri abaagangara Yisaraere yo, oni ki niri pasio ki nimbiri kure.

¹⁸Oni ari pasio airanyaka, ki nimbiri kure abazogo nga ga kpotosende yo ga abaakandoro, na ga wiri akandoro, na ga ameme, ga abaabagara, ami dunduko nga anya nzeme nga ga Basana ra.

¹⁹Oni ari nzeme ki da ho oni ka mbika ni, ki mbiri kure ki da ho oni ka kpi he ni, ti rago pumbo motumo nga gu mi ambakada tipa roni.

²⁰Oni ki nimbi pati gi mbisa na afarasi na abandurira, na airanyaka na angbatunga abasovura dunduko,’ wo poi Gbia MBORI.

²¹“Mi amáa gi taarimo dagba arikaaboro; arikaaboro dunduko abí gi sarangbanga nga gu sari mi he, na bere nga gu moi mi he ri yo.

²²Ngbatunga aYisaraere aina ha ya mi nga Yekova gayo Mbori, tona ti gu rago re na ku mbata yo.

²³Arikaaboro ki ini he ya ngbatunga aYisaraere andu ni zizi yo tipa gayo irairapai, bambiko i agu ri gimi andika si du mi aoko kpakpure ti yo ti ni, ki fu yo ku be avurayo, i dunduko ki tiwi be basape.

²⁴Mi amangi pai fu yo kuti kina gayo pa meteka na gayo samungu, ki oko kpakpure ti yo.

²⁵“Si du ya Gbia MBORI wẽ: Mi akáraga Yakoba gene zia yo ko yo awere, ki ini pai fu ngbatunga aYisaraere dunduko; mi ki du na ringo tipa kparakpara ziazia rimore.

²⁶Bangiriyo ago ti gayo pa zee, na ti gu gimi andika dunduko gu yo auru he, ho i ka raka ni zezeredi rogo gayo ringara zanga boro ka gundesi yo,

²⁷ho mi ka karaga yo ni be agu aboro ki rogodi yo rogo ga avurayo aringara, ki iri bape pa gi du ziazia ku bangiri dungu arikaaboro mbiko yo.

²⁸Si du i aina ha ya mi nga Yekova gayo Mbori bambiko mi akedi yo ni zizi yo ku dagba arikaaboro yo, mi ki dungura yo berewe kina ku rogo gayo ringara. Mi ambú nga gu ni dagba yo yo ni nye dagba arikaaboro yo berewe te;

²⁹ka mi aóka nga kpakpure berewe ti yo a ya, ho mi ka uka gi Toro ni ku ri ngbatunga aYisaraere, wo poi Gbia MBORI.”