Read zande Yezekere 4 Bible Online

Yezekere 4 - zande bible

Yezekere 4

¹“Na mo, Ako wiri boro, mo dí iwo biriki ki moi he bara bangiro, ki ke kpia bakporo auru he, nga kina kpia Yerusarema;

²ki moi ndugu nguru kuti ni, ki me nyanyaki nguru pati he, ki ba kanda kuti ni; mo moi bataya a pati he, ki moi nyanyaki ngua fokahe pati he kirikiri.

³Mo ki di tata marã ni kpasakpasa ha, ki moi he wa ndugu marã dagba ro na bakporo; mo ki sa kpakpuro koyo du he ni, si ki du rogo pa zizi he yo, mo ki moi bero ti ni ka zia ha. Gere nga gu yuguyugupai du tipa ngbatunga aYisaraere.

⁴“Mo ki pi ku garebero yo, mi ki moi gu mbusa nga ga ngbatunga aYisaraere ku auru ro; mo akpída pa gayo mbusa rago gu gedigedi rame nga gu mo akapi ku garebero yo.

⁵Bambiko mi ringbisi dungu rame foro wa 390, ni ringbisiringbisi he kuti gedigedi garã gayo mbusa; si du mo akakpida pa gu mbusa ti ni nga ga ngbatunga aYisaraere kina wo.

⁶Ho mo ka nyasa gere ni, mo apí berewe ni ue he, ono ku kumbabero yo, ka kpida pa gu mbusa nga ga ngbatunga aYudo; mi ringbisi rame 40 foro, rame sa tipa agarã ni ba sa sa.

⁷Mo ki sa kpakpuro yo du Yerusarema ni du ni zizi he, na abero ni ku he; mo ki gumba pai wa nebi kuti bakporo.

⁸Mo ngére, mi amaá gire kuti ro, si du ka mo aréngba nga na sa tiro ku bani na ku bani ya, daho mo ka nyasa rame ga zia ni.

⁹“Na mo a, mo ai nganu na he wa mapunga, na abapu, na abakpa, na vunde, na kura zendeahe wa mapunga, ki moi he ku rogo bangisa pere, ki mangi riahe rogo ho. Ti rago gedigedi arame nga gu mo akapi ti ni ku pavuro, 390 rame, mo ari he.

¹⁰Gu riahe mo akari he i aríngbisa barõaha aringbisa, si adu mbembedi na agarama 250 tipa uru sa; mo aniri he bara sa rogo uru sa.

¹¹Mo ki nimbiri ime a ni kina ringbisiringbisi he, wa ritere sa; mo animbiri he bara sa rogo uru sa.

¹²Mo ki niri he wa mekemeke he rogo he wa mapunga; nizo ho kina ku bangiriyo auru regbo boro.”

¹³Yekova ki ya, “Were awiri aYisaraere ka ri gayo riahe ni birikosibirikosi he ku dagba gu rikaaboro yo mi ka do yo ku ho ni.”

¹⁴Si du mi ki ya, “Ako Gbia MBORI! mo ngére, mi abirikosi nga tire mbata wa sa te; tona ti rago parangare daku awere mi ari nga gu he nga kotokakpi te, watadu gu he zi nyarinde he te, furu pasio ada nga ngbare yo a te.”

¹⁵Ko ki ya fere, “Mo bi, mi ambu ro mo di regbo bagara tie ku ba regbo boro, mo ka mbakada ga riahe auru he.”

¹⁶Ku ri gere ko ki ya fere, “Wiri boro, mo ngére, mi akísa gene riahe ku Yerusarema yo; i ari riahe ni ringbisiringbisi he ni gunde; i ki nimbiri ime a ni ringbisiringbisi he na kiga.

¹⁷Mi amánga gere ya i du na zingo riahe na zingo ime a, ki ngere koyo du akurayo ni na kiga, ki runa du be gayo mbusa.