Read zande Yezekere 40 Bible Online

Yezekere 40 - zande bible

Yezekere 40

¹Ti 25 garã nga ga gaani zia, ti tonatona garã, ti bawe rame diwi, ti gu 14 garã fuo dia yo be bakporo, ti kina gu uru re, be Yekova adu ti re,

²ko ki ye na mi rogo yuguyugupai nga ga Mbori ku rogo ringara Yisaraere, ki moi re ri gbanga bagangara, he adu auru he wa kpia bakporo bara ku sudiyo.

³Ho ko aye na mi ni koyo, mo ngére, boro adu yo, ngbanyani adu wa ga sirigi, giri kpekpe nzibi adu be ni na nganzi ringbisaahe; ni aru ti ngbadimo bakporo.

⁴Gu boro re ki ya fere, “Wiri boro, mo ngére ni bangiro, ki gi pai ni turo, ki moi berãro ti agu apai dunduko nga gu mi akayugo ho foro, bambiko i ye na mo ku erẽ mi yugu pai foro; mo táki pande pa agu apai dunduko bi mo fu ngbatunga aYisaraere.”

⁵Mo ngere, ngapa adu kirikiri pati vurukporo yekaru zegi yo, bagiza gu nganzi ringbisaahe nadu be gu boro re adu wa bagiza mbiribe sita, bagizaha ni ba sa sa adu wa bagiza mbiribe sa na pabe sa; ni ki ringbisi banaga ngapa, si adu wa nganzi sa; na basonaha wa nganzi sa.

⁶Ni ki ndu sa gu ngbadimo bakporo nangera ku uroyo, ki dakpa ti babita ha, ki ringbisi rago ti barima ngbadimo, banagaha ki du wa nganzi sa;

⁷avuruhe pavuru bambu yo adu wa nganzi sa, patihe ki ngia nganzi sa; gu ba dagba avuruhe pavuru bambu yo adu wa bagiza mbiribe bisue; barima ngbadimo pati mbaraza dati digida ngbadimo ku dimoyo adu wa nganzi sa.

⁸Ni ki ringbisi mbaraza nga ga ngbadimo bagizaha ki du wa bagiza mbiribe muambi;

⁹na gaha ngua pa ngbadimo wa bagiza mbiribe ue, mbaraza nga ga ngbadimo adu ti digidaha ku vuruhe yo.

¹⁰Avuruhe adu biata pavuru bambu yo ku bani na ku bani ti gu ngbadimo du ku uroyo; bakiaha adu sa; bakia ngua pa ngbadimo ku bani na ku bani adu sa.

¹¹Ni ki ringbisi bakia barima ngbadimo, si ki ngia bagiza mbiribe bawe; bakia ngbadimo ki ngia bagiza mbiribe 13.

¹²Angbongbo adu barangba agu avuru bambu du pavuruhe, bagiza mbiribe sa ti gu ku bani na ti gu ku bani a; agu avuruhe pavuru bambu yo adu wa bagiza mbiribe sita pavuruhe ku bani na ku bani.

¹³Ni ki ringbisi dagba rago tona ti ngbadimo ti gu pavuruhe yo dati gu kura ha, patihe ki du wa bagiza mbiribe 25, tona ti gu ngbadimo sa gu ngbadimo.

¹⁴Ni aringbisi mbaraza, si ki ngia bagiza mbiri De 20; vurukporo adu kirikiri pati mbaraza nga ga ngbadimo.

¹⁵Bagiza rago tona ti ngbadimo ti barima sa digidaha ti mbarazaha ku dimoyo adu wa bagiza mbiribe 50.

¹⁶Ngbadimo tigaha adu na abangirihe ti ni kirikiri, naumbasi tine dimo yo ku ti ngua pangbaha ti agu avuruhe pavuru bambu yo, mbaraza bakporo adu a wo na abangirihe ti ni kirikiri ku vuruhe yo, na kpia asikisa ti ngua pa ngbadimo.

¹⁷Ni ki ye na mi ku rogo gu vurukporo du ku zegi yo; mo ngére, avuru bambu adu yo na gene kpakakpaka ambia kirikiri vurukporo; avuru bambu 30 adu ti pavuru gu kpakakpaka ambia.

¹⁸Gene kpakakpaka ambia ki du pavuru angbadimo; rngbisi tihe sa na bagiza angbadimo; gere nangia gu gene kpakakpaka ambia du ni zorõzorõ ho.

¹⁹Ni ki ringbisi dagba rago tona ti gu vuru ngbadimo du ti zorõzorõ rago yo ki da ti gii gu vurukporo yo du ku dimo yo, si ki ngia bagiza mbiribe 100. Ni ki ngbe mbata yo fere ku nodiyo,

²⁰mo ngére, ngbadimo adu yo nangera ku nodiyo, nga ga gu vurukporo du ku zegi yo. Ni aringbisi bagizaha na patihe.

²¹Bakia agu avuruhe nadu biata ku bani na ku bani, na gaha ngua pa ngbadimo na mbarazaha, adu wa sa na gu nangia ga bambata ngbadimo; bagizaha adu wa bagiza mbiribe 50, patihe ki du wa bagiza mbiribe 25.

²²Abangirihe, na gaha mbaraza, na gaha kpia asikisa adu na bakiaha wa sa na gu ngbadimo nasa kpakpuhe ku uroyo; ababitaha adu yo saba nandu ku ari yo, mbarazaha adu ku dimo yo.

²³Barangba gu ngbadimo nadu nodiyo, wa du he ku uroyo, kura ngbadimo adu ku vurukporo ku dimo yo; ni ki ringbisi dagba rago ti gu ngbadimo dati gu ngbadimo, si ki ngia bagiza mbiribe 100.

²⁴Ni ki ngbe fere ku mbata yo ku sudiyo, mo ngére, ngbadimo adu yo ku sudiyo; ni ki ringbisi angua pa ngbadimoho na mbarazaha; si adu na bakiaha wa sa wa ga akura ha.

²⁵Abangirihe adu ti ni kirikiri vuruhe yo na ti mbarazaha, wa abangiri ga akura ha; bagizaha adu wa bagiza mbiribe 50, patihe adu wa bagiza mbiribe 25.

²⁶Ababitaha adu yo saba nandu ku ari yo, mbarazaha ki du ku dimo yo, si ki du na kpia asikisa ti angua pa ngbadimo, gu sa ku bani na gu ku bani.

²⁷Ngbadimo adu ku sudiyo ti gu vurukporo du ku dimo yo; ni ki ringbisi dagbarago tona ti gu ngbadimo ki da ti gu kura ha du ku sudiyo, si ki ngia bagiza mbiribe 100.

²⁸Ni ki ye na mi ku rogo gu vurukporo du ku dimo yo pati ngbadimo du ku sudiyo, ni ki ringbisi ngbadimo du ku sudiyo; si adu na bakiaha wa sa wa ga akura ha.

²⁹Avuruhe ti pavuruhe, gaha angua pa ngbadimo, na mbarazaha adu na bakiaha wa sa wa bakia akura ha; abangirihe adu ti ni kirikiri vuruhe yo na ti mbarazaha a; bagizaha adu wa bagiza mbiribe 50, na bakia patihe adu wa bagiza mbiribe 25.

³⁰Mbarazaha ki du kirikiri, bagizaha ki du wa bagiza mbiribe 25, na patihe ki du wa bagiza mbiribe bisue.

³¹Mbarazaha asa kpakpuhe ku vurukporo ku zegi yo, kpia asikisa ki du ti anguaha, gaha babita adu na abandue ti ni muambi.

³²Ni ki ye na mi ku rogo gu vurukporo du ku dimo yo bara ku uroyo, ni ki ringbisi ngbadimo; si adu na bakiaha wa sa wa ga akura ha.

³³Avuruhe ti pavuruhe, gaha angua pa ngbadimo, na mbarazaha adu na bakiaha wa sa wa bakia akura ha; abangirihe adu ti ni kirikiri vuruhe yo na ti mbarazaha a; bagizaha adu wa bagiza mbiribe 50, patihe adu wa bagiza mbiribe 25.

³⁴Mbarazaha ki sa kpakpuhe ku vurukporo ku zegi yo, si ki du na kina kpia asikisa ti anguaha, gu ku bani na gu ku bani a; gaha babita adu na abandue ti ni muambi.

³⁵Ni ki ye na mi ku ngbadimo du ku nodiyo, ni ki ringbisi he; si adu na bakiaha wa sa wa ga akura ha.

³⁶Avuruhe ti pavuruhe, gaha angua pa ngbadimo, na mbarazaha adu na bakiaha wa sa wa ga akura ha; abangirihe adu ti ni kirikiri; bagizaha adu wa bagiza mbiribe 50, patihe ki du wa bagiza mbiribe 25.

³⁷Mbarazaha ki sa kpakpuhe ku vurukporo ku zegi yo, si ki du na kpia asikisa ti anguaha, gu ku bani sa na gu ku bani a sa; gaha babita adu na abandue ti ni muambi.

³⁸Vuru bambu adu yo na kpuguruhe pati angua pangbadimo yo, yo i ka azunda zozo motumo ni.

³⁹Ambisa adu ue ku bani na ku bani tii mbaraza ku ngbadimoho, nga gu i ka aimo zozo motumo ku ri he na motumo ingapai na motumo tiandika a.

⁴⁰Ambisa adu ue ti pavuru mbaraza ku zegi yo ti barima ngbadimo du ku nodiyo, na ambisa ki du ue ti kura pavuru mbaraza a.

⁴¹Ambisa adu dimo yo biama, na ambisa zegi biama ti pavuru ngbadimo, wa ambisa muambi nga gu i ka aimo anya motumo ku ri he.

⁴²Ambisa adu yo biama a du ni sese ambia tipa zozo motumo, bagizaha adu wa bagiza mbiribe sa na beberehe, na patihe ki du wa bagiza mbiribe sa na beberehe a, basonaha ki du wa bagiza mbiribe sa, nga gu i ka amaa auimo zozo amotumo ku ri he na ga amotumo a.

⁴³1 amoi akombe kirikiri vuru ambisa yo, bagiza akombe ki du wa pabe sa. I ka amaa pasio nga ga gamunihe mbedisatise ni ku ri ambisa.

⁴⁴Ni ki ye na mi ku zegi yo ku vurukporo ku dimoyo, mo ngére, avuru bambu adu yo ue vurukporo dimo yo, sa ti pavuru gu ngbadimo du ku nodiyo nangera ku sudiyo, gu kura ha ti pavuru ngbadimo du ku sudiyo nangera ku nodiyo.

⁴⁵Ni ki ya fere, Gi vuru bambu sa kpakpuhe ku sudiyo re du tipa aboro motumo nga agu yo du na pa sunge banda yekaru,

⁴⁶gu vuru bambu sa kpakpuhe ku nodiyo du tipa aboro motumo du na pa sunge bamotumo; agi yo re nangia awiri Sadoka, du ni sa yo dagba awiri Revi nikaniye ka mbeda na Yekova ka manga pa ko.

⁴⁷Ni ki ringbisi vurukporo, bagizaha adu wa bagiza mbiribe 100, bakia patihe ki du wa bagiza mbiribe 100, bagizaha ki du sa na patihe, pavuruhe ki du wa sa; bamotumo ki du barangba yekaru.

⁴⁸Ni ki ye na mi ku tii mbaraza ti yekaru ki ringbisi angua pangba mbaraza, bagizaha ki du wa bagiza mbiribe bisue ti pavuruhe ku bani na ku bani; bakia ngbadimo adu wa bagiza mbiribe 14; gu pavuru ngbadimo adu wa bagiza mbiribe biata ku bani na ku bani a.

⁴⁹Bagiza mbaraza adu wa bagiza mbiribe 20; na patihe ki du wa bagiza mbiribe 11; ababita andu sa ni bawe; adangba adu yo pati angua pangbadimo ti pavuruhe ku bani na ku bani.