Read zande Yezekere 43 Bible Online

Yezekere 43 - zande bible

Yezekere 43

¹Fuo ho ni ki ye na mi sa ngbadimo, gu nasa kpakpuhe ku uroyo.

²Mo ngére, gu taarimo nga ga Mbori nga ga aYisaraere ko aye uroyo; woro gako ye adu wa woro dungu aime; kpotosende ki nikĩ be gako taarimo.

³Gu yuguyuguhe mi abi si adu wa gu yuguyuguhe mi abi ho ni aye ni ka gbarasa bakporo, na wa gu yuguyuguhe mi abi pati di Kebara yo; mi ki ti ni kpakpure ku sande.

⁴Ho ga Yekova taarimo arimi ni ku yekaru yo ti gu ngbadimo nasa kpakpuhe ku uroyo,

⁵Toro ki tumba re ku ari, ki ye na mi ku vurukporo dimo yo; mo ngére, ga Yekova taarimo ki hisi yekaru.

⁶Ho gu boro aru ni re pati re were, mi agi fugo boro ni nifura kono du mi ni yekaru yo;

⁷ni ki ya fere, “Wiri boro, gere nga ba gi mbatabakindo na ba kpandure yo, yo mi akaraka ni dagba awiri aYisaraere nye anye kindi. Ka ngbatunga aYisaraere abírikosi nga ziazia rimore berewe ya, i tigayo, na gayo abakindo a ya, ni gayo pa bari, na be kangba gayo abakindo,

⁸ni maa gayo barima bambu pati gi barima bambu na gayo angua pangbadimo pati gimi angua pangbadimo, na kina ngapa dagba re na yo. I birikosi ziazia rimore ni gayo kere gbegberẽ apai nga gu mangi yo ho, si du mi nyasi yo rogo gi zinga.

⁹Awere ka i báfu gayo manga pai ni sino pa bari tuturu ti re, na kangba gayo aba kindo, mi aráka dagba yo yo nye anye kindi.

¹⁰“Na mo, wiri boro, mo ringbisi pa yekaru fu ngbatunga aYisaraere na pa ngbanyaha na pa kpiaha, ya zee mangi yo mbiko gayo irairapai.

¹¹Ka zee mangi yo mbiko agu apai dunduko mangi yo ho, mo ringbisi pa kpia yekaru, na ringbisa paha, waĩ du he na gaha abakura na gaha abarima, na kpiaha dunduko; mo yúgu pa gaha arugaapai dunduko fu yo i ini he, na gaha arugute dunduko; mo ké pa ha ku bangiriyo, i ka kuti pa ha na gaha rugaapai dunduko ka amanga ha.

¹²Gere nga gu rugute nga ga yekaru: ringara dunduko kirikiri ri bagangara yo adu ni kparakpara ha ziazia susi. Mo ngére, gere nga gu rugute nga ga yekaru.

¹³“Gere nga gu ringbisi nga ga bamotumo ni bagiza mbiribe. Bagiza mbiribe ki du wa bagiza mbiribe gbiakuti bakia pabe. Mburuhe adu wa bagiza mbiribe sa ku ari, patihe ki du wa bagiza mbiribe sa, na ngbaha wa bakia tona ti bawirinzaga dati tanga wirinzaga kirikiri ti ngbaha. Basona bamotumo adú wa gere:

¹⁴tona ti mburuhe ku sende sa bambata ngbaha adú wa bagiza mbiribe ue, patihe ki du wa bagiza mbiribe sa; na tona ti toni pangbaha sa gu babakere pangbaha, bagizaha adu wa bagiza mbiribe biama, patihe ki du wa bagiza mbiribe sa;

¹⁵bagiza bagindawe ti bamotumo adu wa Dagiza mbiribe biama; agbanga biama ki kuru ti bagindawe yo, basonaha ki du wa bagiza mbiribe sa.

¹⁶Pavuru bagindawe biama ti bamotumo adu wa sa, bagizaha ki du wa bagiza mbiribe 12, pavuruhe ki du wa bagiza mbiribe 12 a.

¹⁷Pavuru pangbaha biama ku ari adu wa sa a, bagizaha ki du wa bagiza mbiribe 14, patihe ki du wa bagiza mbiribe biama, na ngbaha ti ni kirikiri ki du wa bebere bagiza mbiribe sa, mburuhe ki du wa bagiza mbiribe sa kirikiri. Babita ti bamotumo asá kpakpuhe ku uroyo.”

¹⁸Ni ki ya fere, “Wiri boro, ya Gbia MBORI wẽ: Gere nga agu arugaapai tipa bamotumo: Ni gu uru ho i ka dua ha ni tipa tumo ni zozo amotumo ku auru he na tipa uka kure kuti ni,

¹⁹mo ka fu babagara sa tipa motumo ingapai fu aboromotumo nga ga Revi yo nga ngbatunga Sadoka, nga agu yo nambeda na mi ka manga pa re, wo poi Gbia MBORI,

²⁰Mo ki nidi bete kureru, ki kpe he ti agu agbanga du biama ti bamotumo, na ti gu atukpuhe biama du ti pangbaha, na ri ngbaha kirikiri; were mo ka nigirisi bamotumo ki nimangi pa dada ingapai tipa ha,

²¹Mo anidi gu babagara a tipa motumo ingapai, ki nizo ru ri gu ringbisiringbisi ba nga ga yekaru zegi ti kparakpara rago yo.

²²Ti ue uru mo aniye na bameme zanga serõ tipa motumo ingapai; i ki nigirisi bamotumo, a wa i agirisi he tipa babagara.

²³Ho mo ka ninyasi girisa ha ni, mo ki niye na paranga babagara zanga serõ na bakandoro dagba rimbasa anya yo zanga serõ a.

²⁴Mo ka nimoi ra bara bangiri Yekova, aboromotumo ki migidi tikpo ri ra ki fu ra ni zozo motumo fu Yekova.

²⁵Rame saba mo ka nifu meme na uru tipa motumo ingapai; mo ka nifu babagara a wo na bakandoro dagba rimbasa anya yo zanga serõ.

²⁶Rame saba i ka nimangi motumo dada ingapai tipa bamotumo, ki girisi he, si du ni kparakparaha.

²⁷Hoi ka ninyasi agi arame ni re, ti muambi rame na ku mbata yo aboromotumo ka nitumo na gaoni zozo amotumo ri bamotumo na gaoni motumo zereda; mi ki niidi pa roni, wo poi Gbia MBORI.”