Read zande Yezekere 44 Bible Online

Yezekere 44 - zande bible

Yezekere 44

¹Ni ki yega na mi ku ngbadimo zegi ku kparakpara ba yo, nga gu nasa kpakpuhe ku uroyo; si ki du ni kisikisi he.

²Ni ki ya fere, “Gi ngbadimo re anyé ni kina kisikisi he; si adú nga ni zaza ha te, boro aríma nga ti ni wa sa te; bambiko Yekova, ga aYisaraere Mbori, naarimi rogo ho; si du si anyé ti ni ni kisikisi he.

³Kina bazogo nikasunga pati he ka ri riahe bara bangiri Yekova; ko aríma tii gu mbaraza nga ga ngbadimo, ki kuru kina ngba gu gene sa re.”

⁴Ni ki ye na mi ngba gene ngbadimo du ku nodiyo ku barangba yekaru yo; mi ki ngere, ki bi ga Yekova taarimo si hisi ga Yekova yekaru; mi ki ti ni kpakpure ku sande.

⁵Yekova ki ya fere, “Wiri boro, mo kpária pa agu apai dunduko nga gu mi akagumba ha foro tipa agu arugaapai dunduko nga ga ga Yekova yekaru na gaha arugute dunduko, mo ki gi he ni turo a; mo ki kparia pa agu yo wenengaí i ka rimisa yo ku yekaru yo na agu yo i ka kusa yo rogo kparakpara ba yo.

⁶Mo ki ya fu ngbatunga asamungu fu kina ngbatunga aYisaraere, Ya Gbia MBORI wẽ: Ako ngbatunga aYisaraere, gaoni kere gbegberẽ apai dígi dunduko,

⁷nga pa rimisa kungba aboro ku rogo gi kparakpara ba yo, nazanga yeratise ku kpotoyo yo na ti boroyo, ho oni naye na riahe ni fere na nzeme na kure, oni nagbarasa ha. Oni basa pa gi mokido, gbiakuti manga gaoni kere gbegberẽ apai dunduko.

⁸Oni ata ka nga kuti ruga pa gimi kparakpara ziazia ahe te; ono oni moi kungba aboro i ka kuti ruga gimi kparakpara ziazia ahe rogo kparakpara ba yo.

⁹“Si du ya Gbia MBORI wẽ: A nga kungba boro sa nazanga yeratise ku kpotoni yo na ti boroni aríma ku rogo gi kparakpara ba yo te, nga gu ni du dagba gu kungba aboro nidu dagba awiri aYisaraere.

¹⁰Ono agu aRevi nandu tuturu ti re, namerẽ be re, ki ndu fuo gayo kpiaahe ho aYisaraere amerẽ ni be re, i akpída kina pa gayo mbusa.

¹¹I adú ni amangi pa re rogo gi kparakpara ba yo, ki banda pa angbadimo yekaru, ki nimangi pai rogo yekaru; i nikaimo anya tipa zozo motumo na motumo tipa aboro, i nikaru ku bangiri aboro ka amanga pa yo.

¹²Bambiko i amangi pa yo barangba gayo kpiaahe ki sa tiyo ni mbia kota nga ga irairapai fu ngbatunga aYisaraere, si du mi zunga he tipa yo, wo poi Gbia MBORI, ya i akpída kina pa gayo mbusa.

¹³I ambéda nga koyo du mi ni te, ka manga pa re wa aboromotumo te, i ambéda nga na gimi kparakpara ziazia ahe na gu kparakpara ahe du ziazia ki susi te; ono i akpída kina pa gayo zee, bambiko gu kere gbegberẽpai nga gu mangi yo ho.

¹⁴Ono mi aásia pai fu yo i ka kuti ruga pa yekaru, ka amanga pa gaha apai dunduko na agu apai dunduko nikadu ni mangimangi he yo.

¹⁵“Ono agu aboromotumo nga ga Revi yo, nga agu awiri Sadoka nabanda pa ruga pa gi kparakpara ba ho awiri aYisaraere amerẽ ni be re, i ambéda kono du mi ni ka manga pa re; i ki niru bara bangire ka afu nzeme fere na kure, wo poi Gbia MBORI;

¹⁶i aríma ku rogo gi kparakpara ba yo, i ki mbedi na gi mbisa ka manga pa re, i ki nibanda pa gi rugapai.

¹⁷Ho i ka rima ti ngbadimo nga ga vurukporo ku dimo yo ni, i aúkadi tiyo na roko ni tutu giri nzibi; i aúkadi nga roko mange anya te, ho i ka manga pai ni angbadimo vurukporo dimo yo, na ku vuruhe yo a.

¹⁸I anidu na kaĩkaĩ rokori ni giri nzibi riyo yo, na roko sorondu ni giri nzibi ku dimoyo; i avóda nga tiyo na gu he narandasa yo a te.

¹⁹Ho i ka nikuru ni ku rogo gu vurukporo du zegi yo koyo du aboro ni, i aniuru gu roko aura i namanga sunge na ni re, ki momoi he kparakpara vuru bambu yo; i ki niukadi tiyo na gu kura roko, i ka kusa kparakpara pai fu aboro ti gayo aroko.

²⁰I akpé nga riyo watadu mbu digida mangeriyo si kuru ni bagbanga ha a te; i anirugu kina tii mburu mangeriyo ni kpehe.

²¹A nga boromotumo ka mbiri imekakue ho ni arima ni ku vurukporo ku dimo yo wa sa te.

²²I adia nga dekurugbo te, watadu gu de mbu kumbari te, ono kina ngasu de nga ngbatunga awiri aYisaraere, watadu gu dekurugbo du ni dekurugbo boromotumo.

²³I ayúgo gu kparaka du dagba kparakpara ziazia he na birikobiriko he, ka yugo waĩ ka i kparaka dagba nyakorokpa na gigiri he.

²⁴I amánga pai wa abasaringbanga rago tikangu, i anisari he kina kuti gimi asarangbanga. I aká kuti gimi arugute na gimi andika rago gimi ringbisiringbisi apumbo, i akpára gimi arago sabiti ziazia.

²⁵I abírikosi nga tiyo ni nduge mbembedi ku pati kangba boro yo te; ono kina tipa bayo watadu nayo i ki birikosi tiyo na tipa wiriyo nga kumba watadu de, tipa wirinayo watadu dawiriyo ni de gbua.

²⁶Ka gu ni birikosi tini, fuo girisa ni tini ni anigedi rame saba.

²⁷Ti gu uru ni akandu ku rogo kparakpara ba yo, ku rogo vurukporo dimo yo, ka manga sunge rogo kparakpara ba, ni aniye na gani motumo ingapai, wo poi Gbia MBORI.

²⁸“I adú nga na ngbi te; mi nga gayo ngbi: ka oni akpáraka nga he fu yo dagba aYisaraere yo ya; mi nga gayo úkparakakparaka he.

²⁹I aniri motumo riahe, na motumo ingapai, na motumo tindika; gu kparakpara ahe dunduko du be aYisaraere adú ni gayo.

³⁰Gu bambata he nga mbata zuzu he nga ga ngbatunga ahe dunduko, si adú ni ga aboromotumo, tumbatumba agamahe dunduko ni angbatunga ha dagba gaoni tumbatumba agamahe dunduko, oni anifu gaoni makawa sasa ngungo fu aboromotumo, ya maku sungu ri ngbatungaroni.

³¹Aboromotumo aniri nga gu nya nga kotokakpi watadu zi nyarinde ru te, watadu zire na anya.