Read zande Yezekere 46 Bible Online

Yezekere 46 - zande bible

Yezekere 46

¹“Ya Gbia MBORI wẽ: Gu ngbadimo du ku vurukporo ku dimo yo nasa kpakpuhe ku uroyo si ka nidu ni kisikisi he ti rago gu rame sita re i amanga sunge rogo ho; ono ti rago sabiti i ka niza ha, na ti rago fogo diwi a.

²Bazogo nikanirimi ku tii mbaraza zegi, ki ru pati ngua pangbadimo. Aboromotumo animbakadi gako zozo motumo na gako amotumo zereda, ko anifu irisa pati barima ngbadimo yo. Fuo gure ko ki kuru ku zegi yo, ono ngbadimo anidu ni zaza ha ki da ku nyemu.

³Aboro ringara anifu irisa tigayo ku bara bangiri Yekova ti gu ngbadimo re ti arago sabiti na ti arago fogo diwi.

⁴Gu zozo motumo nga ga gu bazogo ni niye na ni koyo du Yekova ni ti rago sabiti, si anidu nga wiri akandoro sita zanga serõ na bakandoro sa zanga serõ;

⁵gu motumo riahe du na bakandoro sa adu mbembedi na aritere 37, na gu motumo riahe du na wiri akandoro adú ni bakere he wa rengbe ko na ni, wa sa na nzeme wa aritere sita tipa gu aritere du 37.

⁶Ti rago fogo diwi ko anifu paranga babagara sa zanga serõ na wiri akandoro sita na bakandoro sa, zanga serõ;

⁷ko animbakadi motumo riahe du mbembedi na aritere 37 na babagara sa, na gu a wo na bakandoro sa, na ga wiri akandoro ni bakere he wa rengbe ko na ni, wa sa na nzeme wa aritere sita tipa gu aritere du 31

⁸Ho bazogo narima ni, ko anirimi ku tii mbaraza pati ngbadimo, ko ki nikuru ku zegi yo ngba kina gu gene re.

⁹“Ho aboro ringara ka niye ni ku bangiri Yekova ti ringbisiringbisi rago pumbo, gu ni ka rimi ngba gu ngbadimo du ku nodiyo tipa irisa Mbori, ni nikuru ngba gu ngbadimo du ku sudiyo; gu ni ka rimi ngba gu ngbadimo du ku sudiyo, ni nikuru ngba gu ngbadimo du ku nodiyo: a nga boro sa nikanikaraga tini berewe ngba gu ngbadimo ni nirimi rogo ho te, i ni ba sa sa animo ka kura kina ngba gene ku mbata yo nzunzu.

¹⁰Ho i ka nirimi ni, bazogo anirimi na yo; ho i ka nimo ka kura ni, ko anikuru ku zegi yo a.

¹¹“Ti arago pumbo na ti gu ringbisiringbisi arago i ka nifu gu motumo riahe du mbembedi na aritere 37 na babagara sa, gu a wo na bakandoro, na ga wiri akandoro ni bakere he wa rengbe yo na ni, wa sa na nzeme wa aritere sita tipa gu aritere du 37.

¹²Ho bazogo nikanifu motumo ni nga gu ko afu he zaza ni nyemuhe, ka ngia zozo motumo watadu amotumo zereda wa gu motumo ko afu he zaza ni nyemuhe fu Yekova, gu ngbadimo nasa kpakpuhe ku uroyo i ka niuru he fu ko; ko anitumo na gako zozo motumo watadu gako amotumo zereda a wa ko namanga ha ti rago sabiti. Si du ko ki nikuru ku zegi yo, fuo kura ko i ki kisi ngbadimo.

¹³“Ko anifu gu wiri kandoro zanga serõ du garãru sa ni zozo motumo fu Yekova na auru; wiso na awiso ko ka nifu he.

¹⁴Ko anifu motumo riahe na ni na wiso na awiso nga aritere sita, na aritere nzeme ue ka mogoda nguga na ni, si ki du wa motumo riahe fu Yekova; gere nga gu rugaapai du tipa gu zozo motumo i atumo na ni na uru kindi.

¹⁵Were i ka fu gu wiri kandoro na motumo riahe na nzeme wiso na awiso, tipa gu zozo motumo i atumo na ni na uru kindi.

¹⁶“Ya Gbia MBORI wẽ: Ka bazogo fu gamahe fu gu wiriko sa dagba gako aukumbo yo, si anidu ni kina ga wiriko, si nga boro gayo ahe ni ukumbo.

¹⁷Ono ka ko fu gamahe fu gu gako moyambu sa dagba gako ukumbo yo, si anidu ni gani ki da ti kina garã raniri; i ki karaga ha berewe fu bazogo; kina awiriko nikanidu na pa gamahe kindi dagba gako ũkumbo yo.

¹⁸Bazogo anidi nga gu he sa dagba ga aboro ũkumbo yo, ni nitutura yo pati boro gayo ũkumbo te; ko anifu ga awiriko ũkumbo fu yo dagba ndikidi kina gako ahe, si du i ka nidi nga gimi aboro ti ni pati gayo ũkumbo ya.”

¹⁹Gu boro nafura na mi ni ki ye na mi ki kusi re rogo barima, nga gu nadu pavuru ngbadimo sa gu tangaratangara kparakpara avuru bambu du ku nodiyo du tipa aboromotumo; yo mi abi ba ni ti tuturu rago ku digidaha ku dioyo.

²⁰Ni ki ya fere, “Gere nga gu ba yo aboromotumo ka apasa motumo tindika ni na motumo ingapai, yo i ka azo motumo riahe ni a, ka i kúsi nga ha ku zegi yo ku vurukporo yo ka kusa kparakparahe fu aboro ya.”

²¹Ni ki kusi re ku vurukporo zegi yo, ki ngbe ku mbata yo fere sa tukpu vurukporo biama; ti tukpu vurukporo ni ba sa sa kura vurukporo ki du

²²ti tukpu vurukporo biama rukutu avurukporo adu, bagizaha ki du wa bagiza mbiribe 40, patihe adu wa bagiza mbiribe 30; bakia agu avurukporo biama re adu sa.

²³Duadua gene ambia adu ku vuruhe yo, kirikiri pati avurukporo biama ni ba sa sa, abagindawe ki du ti mburu duadua ambia yo kirikiri

²⁴Ni ki ya fere, “Agere nga agu abamanga riahe, yo agu yo namanga sunge yekaru yo ka apasa amotumo ni nga ga aboro.”