Read zande Yezekere 5 Bible Online

Yezekere 5 - zande bible

Yezekere 5

¹“Na mo, Ako wiri boro, mo dí tĩtĩ basape du wa gu musa nga ga bakperi; ki kpe riro na ni na maingbaro. Mo ki di marã ringbisahe, ki kparaka mangeriro.

²Sa dagba biata ha mo ka zo ho ku we yo bebere bakporo yo, ho arame zia ka nyasa ni; sa dagba biata ha mo ka dia ha ka yepa ha na basape nike pati bakporo kirikiri; sa dagba biata ha mo agbándaka ha ku yuge yo, mi ki mo basape tipa ha.

³Mo ki di bete mange dagba agere, ki vo ho ku rogo ga gbanga baukadi.

⁴Dagba gere berewe mo adia bete he, ki ba ha ku we yo, ki zo ho ni we; yo we ka kura ni kuti ngbatunga aYisaraere.

⁵Ya Gbia MBORI wẽ: Gere nga Yerusarema; mi moi he ku bebere arikaaboro yo, na aringara pati he kirikiri.

⁶Si basa pa gimi asarangbanga ni gbegberẽ he ki susi arikaaboro, ki sa pa gimi rugaapai ki susi agu aringara du pati he kirikiri, nigindiga gimi asarangbanga ka i apeka nga fuo gimi rugaapai ya.

⁷Si du ya Gbia MBORI wẽ: Bambiko oni na fudifudipai kuti re ki susi arikaaboro nga agu yo du pati roni kirikiri, ka oni apeka nga sangba gimi rugaapai watadu ka kuti gimi asarangbanga ya, ono oni amanga nga pai kuti gu sarangbanga nga ga arikaaboro du pati roni kirikiri a te;

⁸si du ya Gbia MBORI wẽ; Oni ngére, Mi, kina boro re, mi gbarasi rimoroni; mi asára sarangbanga ku dagba roni ku bangiri arikaaboro.

⁹Bambiko gaoni kere gbegberẽ asino mi amánga fu roni gu pai mi ata manga nga ha mbata wa sa ya, nga gu mi akamanga nga berewe wo wa sa a ya.

¹⁰Si du abaagude ari awiriyo nga akumbagude kina ku dagba roni, agude nga akumba ki niri abayo; mi ki sari sarangbanga ku ri roni, agu yo nikabata dagba roni mi agbándaka yo ku rogo angbi dunduko.

¹¹Si du, wa du mi ni ungare, wo poi Gbia MBORI, ni rengo, bambiko oni birikosi gi kparakpara ba na gaoni kere apai dunduko na gaoni kere gbegberẽ asino dunduko, si du mi ka kpara roni ti ni ku sa yo; mi aina nga pai fu roni te, nungaroni adú nga ti re a te.

¹²Agu yo sa dagba biata roni akpíka be tata kaza ki nyasi be ngbongi dagba roni; sa dagba biata roni nikakpika be basape kirikiri pati roni; sa dagba biata roni mi nikagbandaka yo ku rogo angbi dunduko ki mo basape fuo yo.

¹³“Were gi zinga ka manga gaha pai re, mi ki zingi fu yo, gi ngariangaria zinga adú ku ri yo daho si ka rengba ni ku bangire; i ki ini he nzunzu ya mi nga Yekova, gumba pai ni gi deringo, ho mi ka nyasa gi ngariangaria zinga ni ku ri yo.

¹⁴Ku ri gere mi asá roni ni ngbi ugure na ni ugbarasarimo dagba agu arikaaboro du pati roni kirikiri na ku bangiri agu yo dunduko nasusa pati roni.

¹⁵Oni adú ni ugbarasarimo na ni fisawia, ni úfugapai na ni úgbudagbuda fu agu arikaaboro du pati roni kirikiri, ho mi ka sara sarangbanga ni kuti roni rogo zinga na ngariangaria zinga, na nyanyaki mbusa mi nga Yekova, gumba ha

¹⁶ho mi ka zumuda gi kere aguanza ni Kuti roni nga ngbongi ka gbarasa he, nga agu ra mi ka zumuda ra ami gbarasi roni, ho mi ka ye ni na ngbongi ku ri roni ni bakere he, ki kisi gene gaoni riahe.

¹⁷Mi akéda ngbongi sa roni na kere anya, ami ki zangasi roni ni zia awironi be roni; tata kaza na kure akúra ku dagba roni yo; mi ki ye na basape ku ri roni, mi nga Yekova, gumba ha.”