Read zande Yezekere 6 Bible Online

Yezekere 6 - zande bible

Yezekere 6

¹Sangba Yekova ki ye koni, du mi ni niya:

²“Wiri boro, mo sá kpakpuro koyo du agu abaagangara ni nga ga aYisaraere, ki gumba pai kuti yo wa nebi,

³ki ya, Oni abaagangara nga ga aYisaraere, oni gi sangba Gbia MBORI! Ya Gbia MBORI wẽ fu abaagangara na fu agangara a, fu angbungumu na fu angboongboorago: Oni ngére, mi, kina borore, aye na basape ku ri roni, mi ki gbarasi gaoni tumbatumba aba.

⁴Gaoni abamotumo adú wa bate, gaoni duadua ambia du ni kpia uru adú ni kuadikuadi he; mi ki bafu gaoni kangba aboro ku sande barangba gaoni kpiaahe.

⁵Mi ki pipigi akangba awiri a Yisaraere barangbe gayo kpiaahe; mi ki gbandaka amemeroni kirikiri pati gaoni abamotumo.

⁶Zavura ho oni aráka ni gaoni abaakporo adú wa ngbi ugure na gaoni tumbatumba arago adú ni ku he, si du gaoni abamotumo ki gberẽ ki du ni gbarasigbarasi he, gaoni kpiaahe akúadi ki digi, i ki dewe gaoni duadua ambia du ni kpia uru ku sande, ki gbandaka fuo gaoni mangaapai.

⁷Kangba aboro atiwa ku dagba roni, oni ki ini ne ya mi nga Yekova.

⁸“Ono mi ambú bete unga aboro dagba roni. Ho oni ka du ni na aboro dagba roni naabati be basape, ho oni ka gbandaka ni ku rogo aringara du,

⁹si du agu yo dagba roni nikabata be basape i atingida pa re dagba agu arikaaboro yo i aga na yo ku dagba yo yo ni zizi yo, ho mi ka kuadi gayo ngbadu wia ni nga gu naaguari ti re, mi ki fu vurari sa bangiriyo nasa tihe wa debari fuo gayo kpiaahe; i ni tiyo nikasoga tiyo tipa gu gbigbita apai i amangi, na tipa gayo kere gbegberẽ asino dunduko.

¹⁰I ki ini he ya mi nga Yekova; mi agumba nga ha gbua ya mi amanga gi gbigbita pai fu yo te re.”

¹¹Ya Gbia MBORI wẽ: “Oni tá beroni, ki doka nduroni, ki ya, Ako! bambiko gu kere gbegberẽ asino nga ga ngbatunga aYisaraere; si du i ka kpi ti ni be basape, na be ngbongi, na be tata kaza.

¹²Gu ni nikadu tuturu ku sa yo ni akpi be tata kaza; gu ni nikadu mbembedi ni akpi be basape; gu ni nikanye ki du ni bandabanda ni, ni akpi be ngbongi. Were mi akanyasa gi ngariangaria zinga ku ri yo.

¹³Oni ki ini he ya mi nga Yekova, ho gayo kangba ka pika ni dagba gayo kpiaahe kirikiri pati gayo abamotumo, ri tumbatumba aba ni ba sa sa, na ri abaagangara yo na tii iwo angua ni ba sa sa, na tii agero ni ba sa sa du na wikowiko kpehe, yo i natumo ni na wene fuõhe fu gayo kpiaahe dunduko.

¹⁴Mi ki taĩ bere kuti yo, ki sa ringara ni vurubate ni kungba he, rogo gayo abaraka dunduko, tona ngbakungba yo daku Dibera yo. Si du i ka ina ha ti ni ya mi nga Yekova.”