Read zande Yezekere 7 Bible Online

Yezekere 7 - zande bible

Yezekere 7

¹Sangba Yekova ki ye kono du mi ni ki ya:

²“Na mo, Ako wiri boro, ya Gbia MBORI wẽ fu ringara aYisaraere: Digidapai! Digidapai da ku ti tukpu ringara biama.

³Awere digidapai du ku ri roni, mi ki kusi gi zinga ki mbu he ku ri roni, ki sari ngbanga roni kuti gaoni apai; mi ki mbusi roni tipa gaoni kere gbegberẽ asino.

⁴Mi ama nga pai fu roni te, nungaroni adú nga ti re a te; ono mi ambúsa roni tipa gaoni apai, ho du gaoni kere gbegberẽ asino ni dagba roni. Si du oni ka ina ha ti ni ya mi nga Yekova.

⁵“Ya Gbia MBORI wẽ: Gbigbitapai fuo gbigbitapai! Oni ngere, si naye.

⁶Digidapai da, digidapai da; si zingi kuti roni. Oni ngére, si naye.

⁷Ako mo naraka rogo ringara, gu pai i aringbisi tipa ro si da foro; rago ho da, uru he mbedi, uru gbarakagbaraka pai, ka si adu nga ni uru paa ngbarago ni tatangba ri abaagangara yo ya.

⁸Were mi aúka gi ngariangaria zinga mbembedi ku ri roni, ki nyasi gi zinga kuti roni, ki sari ngbanga roni kuti gaoni apai; mi ki mbusi roni tipa gaoni kere gbegberẽ asino dunduko.

⁹Mi aína nga pai fu roni te, nungaroni adu nga ti re a te; mi ambúsa roni kuti gaoni apai, ho du gaoni kere gbegberẽ asino dagba roni ni. Si du oni aína ha ya mi nga Yekova, mangi roni.

¹⁰“Oni ngére, ragoho! Oni ngere, si naye! Gu pai i aringbisi he tipa roni si da, ga bazogo ngau mbumbo, ruka ki tona ka maa pai.

¹¹Pa zuu sono wa ngau gbegberẽpai; a nga boro dagba yo sa nikanye te, ngenge yo anyé nga a te, gayo kumuko a te; kparakpe adu nga tipa yo a te.

¹²Rago ho da, uru he nambeda. Ka bangbeahe ngí nga ya, ka babagiahe kpári nga kpe a ya, bambiko nzengerenzengere zinga du ku ri rimbasa yo dunduko.

¹³Bambiko babagiahe akaraga nga tini sa gu he ni abagi he te, ho du yo ni ni ungayo. Bambiko yuguyugupai du ku ri rimbasa yo dunduko; si asá nga tihe ku sa yo te; bambiko ga boro irairapai, boro arengba nga na mbakada ungani te.

¹⁴“I vudi mbanya ki mbakadi pai rengbe dunduko; ono a nga boro sa ndu sa vura te, bambiko gi nzengerenzengere zinga du ku ri rimbasa yo dunduko.

¹⁵Basape du zegi yo, tata kaza na ngbongi du dimo yo; gu ni du ati yo ni kpi be basape; gu ni du bakporo yo ngbongi na tata kaza imi ni.

¹⁶Ka agu yo nye vura mefa vurũ, i adu ri abaagangara yo, wa ambipo nga ga ngboongboorago ra, i dunduko nikakpara, aboro ni ba sa sa mbiko gayo irairapai.

¹⁷Be aboro rungbura dunduko, arukusue ki rungbura du wa ime.

¹⁸1 ukadi tiyo na mbuzaroko, gbudagbuda ki zi yo; zee ki zi yo dunduko, kpatakpa ki du ri yo yo dunduko.

¹⁹I bafu gayo feda ku ngba a gene bakporo, gayo dahabu du wa birikobiriko he; gayo feda na gayo dahabu arengba nga ka batasa yo rago gu uru nga ga ga Yekova dingidingi ngbaduse te; i arengba nga ka nyasa gayo gomoro watadu hisa vuyo yo na ni a te. Bambiko si angia mbia kota nga ga gayo irairapai.

²⁰Gayo bawene fongo i navo tipa kungba taataa taarimo, i ki mangi gayo kpiaahe rogo ho nga ga kere gbegberẽ asino na gayo kere ahe a; si du mi ka sa ha fu yo ti ni ni birikobiriko he.

²¹Mi ki fu he ku be kungba aboro ni umozi, na ku be gu gbegberẽ yo nga ga kpotosende yo ni gbugbu ahe; i ki gbarasi he.

²²Mi aária kpakpure ti yo, ya 1 birikosi gi kikiipa ba; abatuka aríma ki birikosi he,

²³ki sa ha wa kungba rago. “Bambiko ringara hi be gu kere apai nga pa uka kure, bakporo ki hi be pa zuu,

²⁴si du mi ayé na gu rikaaboro susi na gbegberẽpai i rogo gayo akporo ni gayo; mi adígisa gu enda nga ga omeyo, gayo kparakpara ziazia aba adu ni birikosibirikosi he.

²⁵Ho imisiri ka ye ni, i agbáta zereda, ono si adu nga ho te.

²⁶Gbigbitapai naye kina ku ri gbigbitapai, mboimboipai ki nipeke kina mboimboipai; i nagbata yuguyugupai be nebi, ono rugute nyasi be boromotumo, na rugapai be abaakumba.

²⁷Bakindo nakpara kpe, bazogo vodi tiko na gbarasapai, imamaka zi be aboro ringara be gbudagbuda. Mi amánga fu yo kuti kina gayo apai, mi asára ngbanga yo kuti kina boro gayo asarangbanga; i ki ini he ya mi nga Yekova.”