Read zande Yezekere 8 Bible Online

Yezekere 8 - zande bible

Yezekere 8

¹Ti sita garã, ti sita diwi, ti rameru bisue, wa mi asungu dimo kpure yo, ga aYudo abaakumba ki sungu ku bara bangire, be Gbia MBORI ki ye ku ri re.

²Si du mi ki ya ngere, mo ngere, kpiahe ki ye, ngbanyaha adu wa ga boro; si adu wa we adu ti ni tona ti gu du wa dimo boro daku sande, ku ri dimoni ku ari adu wa imaima imarago, wa nzere sirigi.

³Si ki kusi kpia be, ki zi re ti mangerire; Toro ki tumba re ku ari ku dagba kpotosende na ngbangbaturũ, ki ye na mi rogo yuguyugupai yo ku Yerusarema yo, ti gu barima nga ga ngbadimo gu vurukporo du ku dimo yo nangera ku nodiyo, yo kiti adu ni nga ga kpiahe nga ga deringo, nga gu nazingisa deringo.

⁴Mo ngere, gu taarimo nga ga Mbori nga ga aYisaraere ko, si ki du yo, wa gu yuguyugupai mi abi kpasakpasa rago yo.

⁵Toro ki ya fere, “Wiri boro, mo túka nga bangiro awere ki ngere ku nodiyo.” Si du mi ki tuka bangire ka ngera ku nodiyo, mo ngére, gu kpiahe nga ga deringo ki du ti barima ti ngbadimo ku bamotumo yo du ku nodiyo.

⁶Ko ki ya fere, “Wiri boro, mo bi gu pai i amanga? gu bakere kere gbegberẽ asino ngbatunga aYisaraere amanga ha erẽ, ka do re tuturu pati gi kparakpara ba? Ono mo nikabi kura kere gbegberẽ asino susi gure.”

⁷Ko ki kusi re ku ngbadimo vurukporo yo; ho mi angere ni, mo ngére, yaro adu ti vuro bambu.

⁸Si du ko ki ya fere, “Wiri boro, mo gé vuro bambu”; ho mi age vuro bambu ni, mo ngére, ngbadimo adu ti ni.

⁹Ko ki ya fere, “Mo rimi koyo, ka bi gu wasiwasi kere gbegberẽ asino nga gu i amanga ha yo.”

¹⁰Si du mi ki rimi koyo ki bi he; keke kpiaahe ni be ki du yo ti vuro bambu kirikiri, kpia angbatunga agu agbiro nagbe tira agbe sande adu yo, na ga kere anya, na gu kpiaahe dunduko nga ga ngbatunga aYisaraere.

¹¹Akumba 70 aru barangba ha nga ga ngbatunga aYisaraere abaakumba, Yazanaya wiri Safana ki ru dagba yo. I ni ba sa sa adu na gayo úzokingire be yo, gu ngimi fuõngua re du ni ratutu he ki nigundu ku ari.

¹²Ko ki ya fere, “Wiri boro, mo bi gu pai agu abaakumba nga ga ngbatunga aYisaraere yo amanga rogo bitimo, aboro ni ba sa sa du kpiaahe dimo kpuyo yo? Bambiko ya yo, ‘Yekova abi nga rani te, Yekova mbu ringara.’ ”

¹³Ko ki ya fere a, “Mo nikabi kura kere gbegberẽ asino susi gure nga gu mangi yo.”

¹⁴Ko ki ye na mi ku ngbadimo ga Yekova bambu du ku nodiyo; mo ngére, ade asungu yo nikpari tipa Tamuza.

¹⁵Si du ko ki ya fere, “Ako wiri boro, mo bi gere? Mo nikabi kura kere gbegberẽ asino susi agere.”

¹⁶Ko ki ye na mi ku rogo gu vurukporo du pati ga Yekova bambu gu du ku vuruhe yo; mo ngére, ti ngbadimo ga Yekova bambu aboro adu dagba mbaraza yekaru na bamotumo wa 25, i asa giiyo sa ga Yekova yekaru, kpakpuyo ki du ku uroyo; i ki irisi uru ku uroyo.

¹⁷Ko ki ya fere, “Ako wiri boro, mo bi gere? Si nga taataa pai bangiri ngbatunga aYudo ka manga gu kere gbegberẽ asino nga gu i amanga ha erẽ? ya i hisi ringara ni zuu, ki gara gi zinga berewe ku ri yo? Mo ngére, i moi bengua ku õyo yo.

¹⁸Si du mi amánga yo rogo ngariangaria zinga; mi aina nga pai fu yo te, nungayo adú nga ti re a te; ka i vura ka kpara kina ku ture yo ni bakere wawa vuru, mi agia nga pa yo te.”