Read zande Yezekere 9 Bible Online

Yezekere 9 - zande bible

Yezekere 9

¹Si du ko ki poi ku ture yo ni bakere fugo, niya, “Oni abasaringbanga bakporo, oni mbédi kono mbembedi, oni ni ba sa sa na gaoni úvura gbarasahe be roni.”

²Mo ngére, akumba sita aye bara yo du ngbadimo ni ku ngbi yo, nga gu nangera ku nodiyo, i ni ba sa sa na kina gayo úvura be yo tipa imo boro, kumba adu na yo naukadi roko ni tutu giri nzibi, na kambu ime ke waraga pavuko. I ki rimi ku dimoyo ki rundu pati bamotumo sirigi.

³Were gu taarimo nga ga Mbori nga ga aYisaraere ko akuru yo du akeruba ni, yo si nasunga ni, sa barima nga ga bambu; ko ki yambu he koyo du gu kumba ni naukadi roko ni tutu giri nzibi, nadu na kambu ime ke waraga pavuko.

⁴Yekova ki ya fu ko, “Mo ndú rogo bakporo, rogo Yerusarema, ki gba fuohe ti ngbandia kpakpu agu aboro nauka omeyo ki nikpari mbiko gu kere gbegberẽ asino nga gu du ni mangimangi he rogo ho.”

⁵Ko aya fu akurayo ku ture yo a, “Oni susi asusa rogo bakporo fuo ko, ki niimi aboro; ka oni aina nga pai fu boro wa sa ya, ka nungayo adú nga ti roni a ya;

⁶oni imi gbinza aboro dunduko, paranga akumba na paranga ade, rukutu agude na ade, ono ka oni zádi nga gu boro du na fuohe ti ni wa sa ya. Oni ki tona ha ti gi kparakpara ba.” Si du i ki tona ha ti agu abaakumba nadu barangba bambu.

⁷Ko ki ya fu yo, “Oni birikosi bambu, ki hisi avurukporo na kangba aboro. Oni kúru.” Si du i ki kuru, ki imi aboro bakporo yo.

⁸Ho i aimo aboro ni, mi ki du ni sa re, mi ki ti ni kpakpure, ki nikpari, “Ako Gbia MBORI! mo agbárasa agu yo dunduko nga ga aYisaraere yo nanye, rago ba mo ga ngariangaria zinga ku ri Yerusarema?”

⁹Si du ko ki ya fere, “Gu irairapai nga ga ngbatunga aYisaraere na ga aYudo du ni babakere he ki susi; ringara hi be kure, bakporo hi be iraira sarangbanga bambiko ya yo, ‘Yekova mbu ringara, Yekova abi nga pai te.’

¹⁰Ono tipa re, mi aina nga pai fu yo te,, nungayo adú nga ti re a te, ono mi amanga yo rengbe na gayo mangaapai.”

¹¹Mo ngere, gu kumba naukadi roko tutu giri nzibi, na kambu ime ke waraga pavuko ki yega na pai, kt ya, “Mi mangi he wa mo arugu re na ni.”