Read zande Daniere 1 Bible Online

Daniere 1 - zande bible

Daniere 1

¹Ti gu biata garã zogarago nangia ga Yoyakima nangia bakindo aYudo, Nebukadenesara nangia bakindo aBabero aye ku Yerusarema yo ki ru nguru pati he.

²Gbia ki fu Yoyakima ku be ko nangia bakindo aYudo, na agu aĩisunge nga ga ga Mbori bambu; ko ki ye na ni ku ringara Sinara yo, ku rogo gu bambu nangia ga gako mbori, ki mamoi agu aúsunge re ku rogo gu bambu igaahe nangia ga gako mbori.

³Bakindo ki rugu Asepeneza nangia baira avuruko nangia airazangada, ko ye na agu awiri aYisaraere nangia kina ngbatunga bakindo na ngbatunga irisiirisi agbia,

⁴nangia agu aparanga nadu nga na serõ ti yo ya, du ni nzoonzoo yo ni airabirĩ rogo tatamana dunduko, ki du na inahe, na rugatinapa inahe, ka du ni abangbasia mangapai ku bakindo yo, ko sonosi yo na ga aKasado tatamana na furayo a.

⁵Bakindo ki asia pa bete riahe fu yo na uru dagba gu wene riahe bakindo anari, na gu imekakue nga gu ko anambira. I nisonosi yo tipa garã biata, ti digida gu garã re i ki rengbe na ru ku bangiri bakindo.

⁶Were Daniere ki du dagba agi yo re na Ananya, Misaere, na Azaraya nangia ngbatunga aYudo.

⁷Baira avuru bakindo nangia airazangada ki yambu arimo ku ri yo; ko ki ya ti Daniere Beretesasara, Ananya ki ngia Sadaraka, Misaere ki ngia Mesaka, Azaraya ki ngia Abedenego.

⁸Ono Daniere aberẽ he kpotoko yo ya ko abirikosi nga tiko na ga bakindo wene riahe te, watadu na gu imekakue nangia gu ko anambira ha a te; si du ko asana baira avuru bakindo nangia airazangada ko idi he fu ko ka ko birikosi nga tiko na ni ya.

⁹Mbori ki fu irisa fu Daniere na nunga ku bangiri baira avuru bakindo.

¹⁰Baira avuru bakindo ki ya fu Daniere, “Mi nagunde ti gi gbia nga bakindo, naringbisi gaoni riahe na gaoni mbirimbiri he, ya ko ka bi kpotoroni si angba nga wa ga agu aparanga du garãyo wa kina gaoni te. Si du oni ka ba pai ku ri re mi du ngbapai yo be bakindo.”

¹¹Si du Daniere ki ya fu gu buruku baira avuru bakindo amoi ko ku ri aDaniere na ku ri Ananya, Misaere, na Azaraya:

¹²“Mo ásadi gamo amoyambu tipa rame bawe; mo nitu kina bakinde fu rani ani niri he na ime tipa mbira ha.

¹³Mo ki kparia nga ngbanyarani na ngbanya agu aparanga nari ga bakindo wene riahe, kuti gu pai mo ka bi momángi pai kina wonagamo amoyambu.”

¹⁴Si du ko ki gi gayo pai, ki asadi yo tipa rame bawe.

¹⁵Ti digida rame bawe ko abi he ya ngbanyayo du ni wene he ki susi agu aparanga dunduko nanari ga bakindo wene riahe, i ki kindigi susi yo a.

¹⁶Si du buruku ki di gayo wene riahe na imekakue ka i ambira, ki nifu kina bakinde fu yo.

¹⁷Tipa agi aparanga biama re, Mbori afu inahe fu yo na rubangirise rogo apai yo dunduko na tatamana. Daniere ki du na rugatinapai na pa yuguyuguapai na pa amusumo dunduko.

¹⁸Ti digida gu rago bakindo aringbisi tipa yo i ye na yo koyo du ko ni, baira avuru bakindo nangia airazangada ki ye na yo ku bangiri Nebukadenesara.

¹⁹Bakindo ki fura na yo, ka ko abi nga gu boro dagba yo yo wa aDaniere, na Ananya, na Misaere, na Azaraya wa sa ya; si du i anarunda ti ni ku bangiri bakindo.

²⁰Rogo agu apai dunduko bakindo anasana yo ti ni, nangia pa tatamana na rugatinapai, ko anabi yo i nisusi agu abinza dunduko na agu ainibirĩ tatamana nadu rogo gako ngbi dunduko bara bawe.

²¹Daniere ki nye yo dati gu bambata garã nangia ga Bakindo Kurese.