Read zande Daniere 10 Bible Online

Daniere 10 - zande bible

Daniere 10

¹Ti gu biata garã zogarago nangia ga Kurese bakindo aParaso i akusi pai fu Daniere, i ayambu rimoko nga Beretesasara. Gu pai re adu ni rengo, si angia pa bakere vura. Ko ki rugu tiko na gu pai re ki rugu tiko a na pa gu yuguyuguhe re.

²Rogo agu arame re mi nga Daniere akpari kpenunga tipa aposo biata.

³Mi ari nga wene riahe wa sa te, pasio watadu imekakue arima nga ku ngbare yo te, mi ambeda nga kpotore ni nzeme wa sa a te, aposo ki du kina boro biata.

⁴Mi atuka bangire ti rame diwi 24 nga ga bambata diwi, wa mi aru aru ti ngba gango bakere di, gu nga Tigiri, ki ngere, ki bi kumba naukadi roko ni tutu giri nzibi, ki vo gire dimoko ni dahabu nga ga Ufaza.

⁶Kpotoko adu wa gu mbia nga rusoriso, ngbanya kpakpuko ki du wa ikpira gumba, abangiriko ki du wa tigitigi mirãwe, abeko na anduko adu wa gu sirigi kõ yo ho akõ; paa fugoko ki du wa woro rimbasa aboro.

⁷Kina re nga Daniere naabi gu yuguyuguhe re ni sa re, bambiko agu aboro ani adu na yo abi nga gu yuguyuguhe te re, ono bakere kio azi yo, i ki oro ka gbuka.

⁸Si du i ambu re ni kina sa re mi bi gi bakere yuguyuguhe re, ka ome adu nga ti re berewe ya. Gi imaima ngbanya ki sa tihe ki gberẽ, ka ome anye nga rogo re yo ya.

⁹Mi agi paa fugoko, ho mi agi paa fugoko ni, mi ati ni kpakpure ni bakere rame ku sande.

¹⁰Oni ngére, be boro azadi re ki sungusi re mi nikio ku ngba bere na ku ngba rukusure.

¹¹Ko ki ya fere, “Ako Daniere, nga gu kumba Mbori nakpi nyemu ko gbe, mo dége turo sa agu apai nga gu gumba mi foro, ki ru ku ari, bambiko i kedi re awere kono du mo ni.” Ho ko agumba gi pai re ni fere, mi ki ru ku ari ki nikio.

¹²Si du ko ki ya fere, “Daniere, ka mo gúnde nga ya, bambiko tona ti gu bambata uru mo amoi bangiro ka ruga tiro ki umbasi tiro ku bangiri ga Mbori, Mbori agi gamo apai, ye mi bambiko ga kpe.

¹³Gu bazogo ngbi nga ga Parasa adika re tipa rame 21. Ono Mikaere, gu ko dagba gbia abazogo, ko aye ka unda re, si du mi ambu ko kina yo na bazogo ngbi nga ga Parasa,

¹⁴ka ye ka yugo gu pai foro nikamanga gamo aboro ti digida arago. Bambiko gu yuguyuguhe re si tipa agu arago ata da nga ya.”

¹⁵Ho ko agumba pai ni fere kuti agi apai re, mi asa kpakpure ku sande, ngbare ki du ni bubo.

¹⁶Oni ngére, boro ni kpia wiri aboro azadi ngbare; si du mi ki za ngbare ki gumba pai. Mi aya fu gu ko naru bara bangire, “Ako gi gbia, aima ye kuti re be gu pai nga ga yuguyuguhe, ka ome anye nga rogo re yo ya.

¹⁷Waĩ ka ga gi gbia moyambu fura na gi gbia? Bambiko ome anye nga rogo re yo awere te, ome onga anye nga rogo re yo a ta.”

¹⁸Boro azadi re berewe, kpiani adu wa ga boro, ni ki nyakasi re.

¹⁹Ni ki ya, “Ako mo nga gu kumba Mbori akpi nyemu ko gbe, ka mo gúnde nga ya, zereda dú na mo; mo dú nyanyaki ki ngarã.” Ho ko afura ni kono du mi ni, mi adu nyanyaki ki ya, “Gi gbia gúmba pai, bambiko mo nyakasi re.”

²⁰Ko ki ya, Mo ini gu pai mi niye ti ni kono du mo ni? Ono mi akaraga tire awere ka so vura na bazogo aParaso; ho mi ka ndu ni koyo du ko ni, mo ngére, bazogo aGiriki ayé.

²¹Ono mi agúmba gu pai foro ke yo ho rogo kitabu rengo yo: a nga boro ho nanyakasi tini ku pati re kuti agi yo re te, kina Mikaere, nga ga bazogo.