Read zande Daniere 11 Bible Online

Daniere 11 - zande bible

Daniere 11

¹Ono tipa re, ti gu bambata garã zogarago nangia ga Darayawesa nga Madaio, mi aru ku ari ka zada ko ka nyakasa ko.

²“Mi ayúgo rengo foro awere. Mo ngére, abakindo biata nikadu Parasa yo; gu biama yo adu ni irakumuko gbe ki susi yo dunduko. Ho ko ka du ni ni nyanyaki ko be gako akumuko, ko azingisa yo dunduko kuti gu ngbi nga ga aGiriki.

³Fuo gure, nyanyaki bakindo akúra nga gu ko nikazoga rago ni bakere ome ki nimangi pai kina kuti gu pai ko akpi nyemu he.

⁴Ho ko ka kura ni, gako ngbi agbérã ki kparaka koyo du agu ayuge ni du biama nga ga ngbangbaturũ ono fu atitako te, kuti gu pa zogarago nga gu ko azogo ho a te; bambiko i adia gako ngbi ku sa yo ki fu he fu akura yo akia ti agi yo re.

⁵“Si du gu bakindo du ku sudiyo adú nyanyaki, ono gu gako bazogo sa nikanyaka ki susi ko gbe, gako zogarago ki du na bakere ome.

⁶Fuo bete agarã i amánga kpamiatise, gu wiri bakindo nga de du ku sudiyo ayé koyo du gu bakindo ni du ku nodiyo, ka manga pa zereda. Ono tandu adú nga ti beri te, ko na awiriko arú nga te. Ono i ambú ri ambu, na gari amoyambu na wiriri, na gu ni nanyakasi pa ri a.

⁷“Ti agu arago re ngbatungari akúra ku ba ko; ko ayé sa rimbasa vura ki rimi ku gbata yo nga ga bakindo du ku nodiyo, ko amánga yo ki di be yo.

⁸Ko andú na gayo ambori ku Ezipeta yo na gayo zaragasizaragasi kpiaahe na gayo kikiipa aúsunge du ni feda na ni dahabu. Ko ambú pa zuba gu bakindo du ku nodiyo tipa bete agarã.

⁹Ono gu bakindo du ku nodiyo ayé ku rogo gu ngbi nga ga gu bakindo du ku sudiyo, ono ko akaraga tiko kina ku rogo gako ringara berewe.

¹⁰“Awiriko asó vura ki dungura rimbasa nga bakere rimbasa vura, nga gu nikaye ka ndu rogo ringara ki susi rogo ho, ki ndu na sovura berewe ki da nga dati gako gbata.

¹¹Si du gu bakindo du ku sudiyo agúari na zinga, ki kuru ka so vura na gu bakindo du ku nodiyo. Ko adúngura bakere rimbasa, ono i afú yo kina ku be ko.

¹²Ho i ka dia gu rimbasa ni re, ngbaduko adú na abiatise, ko ki bafu aboro wa bawe akuti, ono ko adia nga be he te.

¹³Bambiko gu bakindo du ku nodiyo adúngura rimbasa berewe, ni babakere he ki susi gu naadu mbata; ko ayé na bakere rimbasa vura fuo bete agarã, na badungu ngbatunga ahe a.

¹⁴“Ti agu arago re dungu aboro nikazinga kuti gu bakindo du ku sudiyo; airazuu dagba kina gaoni aboro agúari ku ari ka digisa pa gu yuguyuguhe; ono i aréngba nga na ni te.

¹⁵Si du bakindo du ku nodiyo ayé ki dua akanda pati he, ki di gu bakporo du nyanyaki ngapa pati he. Rimbasa agu aborosovura du ku sudiyo arú nga te, zavura gako siasia aborovura a vurũ, bambiko ome adú nga ti yo ka ru te.

¹⁶Ono gu ni naye sa ko ni amánga pai kina kuti gu pai ni akpi nyemu he, a nga boro ho nikaru ku bara bangirini te, ono ni arú rogo wene ringara, si adú dunduko kina tii be ni.

¹⁷Ni anyákasa tini ka ye na ome nga ga gani ngbi dunduko, ni ayé na pa zereda ki mangi pa ha Ni afú de fu ko nga wiri ade tipa gbarasa ngbi; ono si arú nga te watadu du tipa pa gani u a te.

¹⁸Ni asá kpakpuni giza sa aringara ti ngba gango baime, ni zia dungu he dagba ha yo. Ono barutirivura nikadigisa gani ruguzuruguzu pai; ko akáraga gani ruguzuruguzu pai ku ri ni berewe ni rengo.

¹⁹Si du ni asá kpakpuni berewe koyo du agbata ndugu ni nga kina ga gani ringara; ono ni akóta ki ti, ka i abí nga ni berewe ya.

²⁰“Si du boro ki guari ku ba ni nga gu ko nikakeda badungura rúhe rogo wene ngbi; ono fuo wiri guru rago i akúadi ko, ono rogo zinga te, rogo vura a te.

²¹Payasipayasi boro nikadu ku ba ko, nga gu ni i afu nga pa worimo akindo fu ni ya; ni aríma zanga fuga pa ha, ki di ngbi ni zomiahe.

²²Ni aróga arimbasa vura ku sa yo kpakaya; ki nikuadi yo; na bazogo nga ga mokido ko a wo.

²³Ni amánga pai ni biriki tona ti gu rago i ka manga kpamiatise ni na ni; ni ki sa tini nyanyaki na kina wiri zogoro aboro.

²⁴Ni ayé zanga fuga pa ha ku rogo gu wene pavuru ringara u au; ni amánga agu apai abani zavura atitani amanga nga ha ya, nga gbandaka úmozi dagba yo na gbugbu ahe, na angbatunga ahe. Ni asánga apai kuti nyanyaki abagbuko; ono tipa kina rago ngbutuko.

²⁵Ni ki wo ti tanduni na gani ngarã na bakere rimbasa vura kuti gu bakindo du ku sudiyo. Bakindo du ku sudiyo asó vura na gako bakere rimbasa vura susi na ome; ono ko arú nga te, bambiko i asánga dungu tabura kuti ko.

²⁶Zavura agu yo nan gako wene riahe vurũ i agbárasa ko. I aróga gako rimbasa avura ku sa yo, dungu yo ki kpiki

²⁷Ono tipa agu abakindo ue, i abérã pa manga gbigbitapai. I agúmba azire wa sungu yo kina pati gu mbisa sa, ono sa rengba na pai te; bambiko digidaha ata da nga ti ringbisiringbisi ragoho te.

²⁸Ko ki karaga tiko ku rogo gako ringara na bakere angbatunga ahe, ono kpotoko yo adú kina kuti gu ziazia mokido. Ko ki nimangi kina gu pai ko akpi nyemu he, ki karaga tiko kina ku rogo gako ringara.

²⁹“Ti gu rago i aringbisi he, ko akaraga tiko ki ye ku sudiyo. Ono si adú nga ni gi rago re wa si adu mbata te.

³⁰Bambiko agu abaakurungba nga ga ringara Kupurio ayé kuti ko, ko ki gunde ki di tiko ku sa yo, ki karaga tiko berewe ki du na imisiri ngbaduse ki tona pai kuti ziazia mokido. Ko akaraga tiko ki dege tuko fu agu yo nambu pa gu ziazia mokido.

³¹Gako arikavura akúra ki gbarasi kparakpara ba na gbata a, ki rogo gu zozo motumo ku sa yo i naatumo na ni na uru. I ki dua gu kere gbegberẽ he nagbarasa he.

³²Ko agbárasa agu yo naso vura kuti mokido ni zomiahe; ono agu aboro ini gayo Mbori i arú nyanyaki ki mangi pai.

³³Agu yo du dagba aboro nangia airatatamana amánga dungu yo i rugu tiyo na pai, ka i vura tiwa be basape vurũ na mirãwe, be zia yo na gbu yo, tipa bete arame.

³⁴Ho i ka tiwa ni, i adia undahe ni bete he. Dungu yo akóda tiyo na yo ni zomiahe;

³⁵bete agu yo nga airatatamana atíwa atiwa ka girisa tiyo na ka kpuruka tiyo na ka mbakada tiyo, daho digidaragoho ka da ni, bambiko si ata da nga ti ringbisiringbisi ragoho te.

³⁶“Bakindo ki mangi he kuti kina gu pai ko akpi nyemu he; ko aábia pa tiko ki kiisi tiko ku ri ambori dunduko, ko ki nigumba iiriwo apai kuti gu Mbori du ku ri ambori du. Ko au daho gu imisiri ngbaduse ka du ni ni mangimangi he; bambiko gu pai amánga amanga du ni ringbisiringbisi he.

³⁷Ko agía nga sangba ga abako ambori te, watadu gia pa gu ni ade akpi nyemu ni te; ko agía nga sangba kura mbori te, bambiko ko akíisa pa tiko ku ri aboro dunduko.

³⁸Ko aírisa gu mbori nga ga agbata, ku ba agi yo re; gu mbori abako aina nga ha ya ko aírisa ha na dahabu na feda, na kikiipa ambia na agamahe kii genohoakia.

³⁹Ko amánga gu banyanyaki agbata be gu undahe nga ga kungba mbori. Agu yo naida pa ko ko akíisa pa yo na irisa. Ko amáa yo ni abazogo ku ri dungu aboro, ki kparaka aringara kina ko abagi he fu yo.

⁴⁰“Ti digida ragoho gu bakindo du ku sudiyo azúba ko; ono gu bakindo du ku nodiyo agbá sa ko wa bakamikami yuge, na angbagidavura na abanduri afarasi, na dungu abaakurungba. Ko ki ye ku rogo aringara ki ndu rogo ho ki susi.

⁴¹Ko ayé ku rogo gu wene ringara. Badungu yo akpíka, wa kutu akutu aboro, ono agi yo re nikabata be ko: Edome na Moaba na gu bakumba papara Amona.

⁴²Ko atáã beko kuti aringara, ka ringara Ezipeta abáta nga ya.

⁴³Ko asá tiko ni bazogo gu wene ahe du ni dahabu na ni feda, na gu kikiipa ahe dunduko nga ga Ezipeta. Aboro Ribue na aEtiopio apéka fuo ko.

⁴⁴Ono apangbanga ayé uroyo na nodiyo, ki zigbasíko, ko akúra na bakere ngariangaria zinga ka nyasa dungu aboro ki gbarasi yo kpakaya.

⁴⁵Ko ki dua gako iiriwo bamburoko dagba baime na wene kparakpara ziazia bagangara; ono ko adá ti digida gako pai, zanga boro ka unda ko.