Read zande Daniere 12 Bible Online

Daniere 12 - zande bible

Daniere 12

¹“Ti gu rago re Mikaere agúari a, nga gu bakere bazogo naruga pa gamo aboro. Ono rago fuda nikadu, ngbatunga ha adu nga mbata wa gu te re, tona wa rikaaboro aenge ki da ti gu rago re. Ono ti gu rago re i abátasa gamo aboro, nga agu yo i ka bi rimoyo ni ba sa sa ni kekehe rogo kitabu.

²Dungu agu yo naakpiki ku nvutu sende yo azínga berewe, agu yo sa nyenye unga, agu yo sa nyenye wasiro.

³Agu yo nga airatatamana akĩ imaima wa vuro ngbangbaturũ; agu yo nisa dungu yo sa rurupai, i akĩ wa akerekuru nye anye kindi.

⁴Ono mo, Daniere, mo kísi agu apai re ki dika he ti gu kitabu re, dati digidaragoho. Dungu aboro nikaora koyo na kono, inahe amáa pai.”

⁵Si du mi nga Daniere angere, ki bi aboro ue narundu, gu ni ti ngba gango ime kono, gu kura ni ti ngba gango ime koyo.

⁶Mi ki ya fu gu kumba naukadi roko ni tutu giri nzibi, nga gu ko nadu ku ri aime wiridi, “Rago aima waĩ dati digida gi banaru apai re?”

⁷Gu kumba naukadi roko ni tutu giri nzibi, nga gu ko nadu ku ri aime wiridi atumba kumbabeko na garebeko a ku ngbangbaturũ yo; mi ki gi pa ko ko nizunga he ti rimo gu ko nye anye kindi, ya si adú tipa rago sa, na rago wa bara ue, na bebere rago a. Ho i ka nyasa kua gu tandu ni nga ga kparakpara ziazia aboro, agi apai dunduko re ki du ni mangimangi he.

⁸Mi agi pa ha ono mi aruga nga tire na ni te. Si du mi ki ya, “Ako gi gbia, gini pai nikadu ti digida agi apai re?”

⁹Ko ki ya, “Mo ndú ngba ga gene, Daniere, bambiko i kisi agu apai re du ki dika ha ki da ho digidaragoho ka da ni.

¹⁰Dungu aboro akpúruka tiyo, ki girisi tiyo, ki mbakadi tiyo; ono gbegberẽ yo amánga pai ni gbegberẽ he. A nga gu ni sa dagba gbegberẽ yo yo nikaruga tini na pai te; ono agu yo du ni airatatamana inikaruga tiyo na ni.

¹¹Tona ti gu rago i ka roga gu zozo motumo ku sa yo i naatumo na ni na uru, na ho i ka maa gu kere gbegberẽhe ni namanga gbarasahe, arame wa 1,290.

¹²Boro maku nga gu ni sungu ki da ti ye gu arame du wa 1,335.

¹³Ono mo ndú ngba ga gene daho digidaha ka da ni. Mo aóngoda, ti digida agu arame re mo ki ru rogo kina gu ga ba i aringbisi he foro.”