Read zande Daniere 2 Bible Online

Daniere 2 - zande bible

Daniere 2

¹Ti gu ue garã zogarago nangia ga Nebukadenesara, Nebukadenesara arari amusumo; toroko ki du ni fudifudi he, rame ki sonzora bangiriko.

²Si du bakindo ki gumba pai i yambu abinza i ye na ainibirĩ tatamana, na airasoroka, na aKasado a, i yugu sangba ga bakindo amusumo fu ko. Si du i ki rimi ki rundu ku bangiri bakindo.

³Bakindo ki ya fu yo, “Mi rari musumo, torore ki du ni fudifudi he tipa ina pa gu musumo re.”

⁴Si du aKasado ki ya fu bakindo, “Ako bakindo, mo nyé ni ungaro kindi! Mo gúmba pa ga musumo fu gamo amoyambu, ani ki kusi sangbaha.”

⁵Bakindo ki karaga ha fu aKasado, “Pa ha go ti re: ka oni akúsa nga pa gu musumo re na sangbaha fere ya, i ayépa aparoni ngbudongbudo, ki gbarasi gaoni akporo.

⁶Ono ka oni kusi pa gu musumo re na sangbaha, oni adia gamunihe be re na mosoro na bakere irisa. Si du oni kúsi pa gu musumo re fere na sangbaha.”

⁷I ki karaga ha ni ue he, “Bakindo gúmba pa gu musumo re fu gako amoyambu, ani ki kusi sangbaha.”

⁸Bakindo ki karaga ha, “Mi ini he ni rengo ya oni nakpi nyemu ka gizasi rago, bambiko oni bi he ya gu pai dũ ngbare nga rengo

⁹ka oni akúsa nga pa gu sangba musumo re fere ya, mbusa ho sa tipa roni. Oni aberẽ pai dagba roni ka gumba zire ku bangire na wasiwasi pai daho i ka sa rago ni. Si du oni gúmba pa musumo fere tie, mi ki ini he ya oni rengbe na ringbisa sangbaha fere.”

¹⁰AKasado ki karaga ha fu bakindo, “A nga boro sa zegino rengbe na ina gu pai bakindo asana he tipa ha te; bambiko a nga bakindo watadu gbia, watadu bazogo nasana ngbatunga gu sanahe re fu binza watadu bainibirĩ tatamana watadu aKasado a te.

¹¹Iiriwopai nga gu pai sana bakindo he tipa ha, a nga boro ho rengbe ka yugu he fu bakindo te kina ambori, nga agu yo araka nga dagba aboro ya.”

¹²Bakindo ki zingi mbiko gi pai re ki nierẽ aerã gbe, ki ya i imi airatatamana Babera no dunduko.

¹³Si du ndika ki ndu ya i imi airatatamana, i ki nigbata aDaniere na abadiangbako, ka imo yo a.

¹⁴Daniere ki karaga pai ni rugatinapai na zereda fu Arioka, nangia barutiri ga bakindo ababandarago, nangia gu ko nakuru ka imo airatatamana Babera;

¹⁵ko ki ya fu Arioka, ga bakindo barutiripai, “Tipagine du ga bakindo ndika ti ni were ni ipiipi he?” Si du Arioka ki yugu pa ha fu Daniere.

¹⁶Daniere ki rimi ku dimoyo ki sana bakindo ko ringbisi rago fu ko, ko kusi sangba musumo fu bakindo.

¹⁷Daniere ki ga ku kpuko yo ki yugu gu pai re fu Ananya, na fu Misaere na fu Azaraya, nangia abadiangbako.

¹⁸Ko ki gumba pai fu yo ya i sana Mbori tipa inapai tipa gi okooko pai re, nga ga ngbangbaturũ ko, ka Daniere akpíka nga na abadiangbako na airatatamana nga ga Babera yo ya.

¹⁹Okooko pai ki du ni kusikusi he fu Daniere yuru rogo yuguyugupai. Si du Daniere ki sambua Mbori ti ni nga ga ngbangbaturũ ko.

²⁰Daniere ki ya: “I nisámbua rimo Mbori waragoagira, du tatamana ni gako na ngarã.

²¹Ko nasaka arago na regbo ahe; ko naroga agu abakindo ki nimoi kura abakindo; ko nafu tatamana fu airatatamana na inahe fu agu yo du na rugatinapai;

²²ko nakusa gasigasi apai du ni okooko ho; ko naina gu he du ku bitimo yo, imarago du yo du ko ni.

²³Ako Mbori nga ga abuba ko, mi nafu tambuahe foro ki taasi rimoro, bambiko mo naafu tatamana fere na ngarã, ki yugu gu pai fere awere nga gu ani asana ro tipa ha, bambiko mo kusi pa ga bakindo pai fu rani.”

²⁴Si du Daniere ki rimi koyo du Arioka ni nangia gu ko bakindo aasia pa imo airatatamana Babera fu ko; ko ki ndu ki ya fu ko wẽ, “Ka mo imi nga airatatamana Babera no ya; mo rímisi nga re ku bangiri bakindo, mi kusi sangba musumo fu bakindo.”

²⁵Arioka ki rimisi Daniere ni ipo ku bangiri bakindo, ki ya fu ko wẽ: “Mi bi kumba dagba gu zizi aboro yo nga ga aYudo yo narengbe ka kusa sangba musumo fu bakindo.”

²⁶Bakindo ki ya fu Daniere, du rimoko nga Beretesasara a, “Mo rengbe ka kusa pa musumo fere nga gu bi mi na sangbaha a?”

²⁷Daniere ki karaga ha fu bakindo, “A nga iratatamana ho, na ainibirĩ tatamana, abinza, watadu airasoroka rengbe ka kusa gu okooko pai fu bakindo nga gu sana bakindo he tipa ha te?

²⁸ono gu Mbori du ngbangbaturũ yo ko nakusa okooko pai, ko kusi gu pai fu Bakindo Nebukadenesara nikadu rogo yangara arame. Ga musumo na gu yuguyuguapai nga ga ga berã nga gu mo abi wa mo api auru ga barame si nga gere:

²⁹Tipa ro, Ako bakindo, agu aberã naye foro wa mo api auru ga barame nga gu pai nikamanga giza, gu ko nakusa okooko apai kina ko nayugu gu foro nikamanga.

³⁰Ono tipa re, i ayugo nga pa gi okooko pai fere re tiparimowe mi du na tatamana susi kura aboro te, ono tipa kusa sangbaha fu bakindo, ya mo ini agu aberã du kpotoro yo.

³¹“Ako bakindo, mo angere ki bi bakere kpiahe. Gi kpiahe re, si adu ni bakere he gbe, ki ru ku bara bangiro, timaha ki susi imaima gbe, ngbanyaha ki du ni iiriwo ho.

³²Ri gi kpiahe re adu ni ndikidi dahabu, ngbaduhe na abehe ki du ni feda, beberehe na ambosoho ki du ni sirigi,

³³merenduhe ki du ni marã, kpetenduhe ki du ni marã na ni pere a.

³⁴Wa mo angera, mbia asari ni sa ha, nga gu be boro ase nga ha ase ya, si ki nari gu kpiahe re ti nduhe nga marã na pere, ki kuadi he rukutu.

³⁵Si du gu marã re na pere, na sirigi, na feda, na dahabu, akuadi wa sa rukutu dunduko, ki sa tihe wa gu umuhe du batakahe yo garã; yuge ki ya aya na ni ku sa yo, ka i abi nga fuoho berewe ya. Ono gu mbia nga gu nanari gu kpiahe re si ki sa tihe ni bagangara ki hisi kpotosende dunduko.

³⁶“Gere nga gu musumo re: ani nikagumba sangbaha awere fu bakindo.

³⁷Ako bakindo, mo nga bakindo ku ri abakindo, nga gu ko Mbori ngbangbaturũ afu ngbi foro na ome na tandu, na irisa.

³⁸Ko afu awiri aboro ku be ro, yo i naraka ni, na anya nvuo, na azire ari, ki moi ro ni bazogo ku ri yo dunduko mo nga gu rihe nadu ni dahabu.

³⁹Fuo ro kura ngbi akúra nikaumba ti ro, biata ngbi ki du a wa sirigi, nga gu nikazoga kpotosende dunduko.

⁴⁰Biama ngbi adú nyanyaki wa marã, bambiko marã nakuadi ahe rukutu ki zogo ahe dunduko; wa marã nasadiga he, kina wo si ka kuadi ahe ki sadiga agi angbi re dunduko.

⁴¹Wa mo abi anduhe na awirinduhe bete he adu wa ga bamepere pere, gu bete he ki du wa marã, si adú nga kparakakparaka ngbi; ono bete gu nyaka nga ga marã adú ti ni a, a wa mo abi marã ni kodikodi he na gbedegbede pere.

⁴²Wa awirinduhe adu ni bete marã na bete pere, kina wo ngbi ka du na bete ome, ni mburumburu he a.

⁴³A wa mo abi marã ni kodikodi he na gbedegbede pere, wo i ka koda tiyo na akurayo rogo pa rogatise, ono i adú nga ni kpamiakpamia tiyo te, a wa marã akpamia nga tihe na pere ya.

⁴⁴Rago agu abakindo re Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi;

⁴⁵a wa mo abi gu mbia nasari ti bagangara nga gu boro ase nga ha ni beni ya, si ki kuadi marã rukutu, na sirigi, na pere na feda, na dahabu. Mbori du ni Bahe nayugu pa gu pai fu bakindo nikaye giza. Gu musumo re nga rengo, sangbaha nga kina rengo a.”

⁴⁶Bakindo Nebukadenesara ki ti ku sande ni kpakpuko, ki niudi Daniere, ki ya i fu gamunihe fu ko na wene fuõngua a.

⁴⁷Bakindo ki ya fu Daniere, “Ga Mbori nga Mbori ku ri ambori ni rengo, nga Gbia ku ri abakindo, nga bakusi okooko apai, bambiko wa rengbe mo na yugo gi okooko pai re.”

⁴⁸Si du bakindo ki fu babakere airisa fu Daniere na dungu babakere agamahe, ki moi ko ni bazogo ku ri ngbi Babera dunduko, ni gbia baira abazogo ku ri airatatamana Babera dunduko.

⁴⁹Daniere ki sana bakindo, ko ki moi aSadaraka na Mesaka, na Abedenego ku ri apai rogo ngbi Babera; ono Daniere anye tigako kina ngbanga ku bakindo yo.