Read zande Daniere 3 Bible Online

Daniere 3 - zande bible

Daniere 3

¹Bakindo Nebukadenesara amangi kpiahe ni dahabu, bagizaha adu wa bagiza mbiribe 60, bakia patihe adu wa bagiza mbiribe sita. Ko ki dua ha ti gu kpasakpasa rago nangia Dura, rogo ngbi Babera.

²Bakindo Nebukadenesara ki kedi asunge i dungura abanyaki, na agbia, na abaira abazogo, na abasapungbanga, ababandamarã, abarugupai, abainiparugute, na agu abanyaki nga ga ringara yo dunduko i ye tipa rago kpara gu kpiahe Bakindo Nebukadenesara adua ha.

³Si du abanyaki adungura tiyo wa sa, na agbia, na abaira abazogo, na abasapungbanga, na ababandamarã, abarugupai, abainiparugute, na abanyaki dunduko nga ga ringara yo, rago kpara gu kpiahe Bakindo Nebukadenesara adua ha; i ki ru barangba gu kpiahe Bakindo Nebukadenesara adua ha.

⁴Boro ngbuka ki poi ku ari ki ya, “Ako aboro, i rugu he fu roni, na fu arikaaboro, na ngbatunga aboro na afugoyo,

⁵ya ho oni ka gia woro ngbunga ni, na nambongo, na nzenze, na rekembe, na kindondo, na nafiri, na ngbatunga auworo ahe dunduko, oni ki tiwi ku sande ki udi gu kpiahe du ni dahabu Bakindo Nebukadenesara adua ha.

⁶Gu ni ka ti nga ku sande ki udi he ya i abá ni ni ba sa ku rogo gu we nagbi ni ngariangaria ha.”

⁷Si du ni gu rago re, ho aboro dunduko agi woro ngbunga ni, na nambongo, na nzenze, na rekembe, na kindondo, na nafiri, na ngbatunga auworo ahe dunduko, i dunduko ki tiwi ku sande nga aboro, na arikaaboro, na ngbatunga aboro na afugoyo, ki udi gu kpiahe nadu ni dahabu Bakindo Nebukadenesara adua ha.

⁸Were ti gu rago re agu aKasado aye ki mbedi ki ta bura aYudo.

⁹I ki gumba ha fu Bakindo Nebukadenesara, “Ako bakindo mo nyé anye ni ungaro kindi!

¹⁰Ako bakindo, mo aru ndika, ki ya agu aboro dunduko ka gi woro ngbunga, na nambongo, na nzenze, na rekembe, na kindondo, na nafiri, na ngbatunga auworo ahe dunduko, i dunduko tiwi ku sande ki udi gu kpiahe du ni dahabu;

¹¹gu ni ka ti nga ku sande ki udi he ya, i abá ni ku rogo gu we nagbi ni ngariangaria ha.

¹²Agu aYudo du ho nga agu yo mo amoi yo ku ri apai rogo ngbi Babera: nga aSadaraka, na Mesaka, na Abedenego, Ako bakindo, agi akumba re, i agia nga sangbaro te; i amanga nga pa gamo ambori te, i auda nga gu kpiahe du ni dahabu mo adua ha a te.”

¹³Nebukadenesara ki ya ni gako ngariangaria zinga i ye na aSadaraka, na Mesaka na Abedenego. I ki ye na agi akumba re ku bangiri bakindo.

¹⁴Nebukadenesara ki ya fu yo, “Ako Sadaraka, na Mesaka, na Abedenego, rengo nga ha ya oni amanga nga pa gimi ambori watadu uda gu kpiahe du ni dahabu nga gu dua mi he te?

¹⁵Ka oni mbakadi tironi awere ho oni ka gia woro ngbunga ni, na nambongo, na nzenze, na rekembe, na kindondo, na nafiri, na ngbatunga aúworo ahe dunduko, ki tiwi ku sande ka uda gu kpiahe du ni dahabu nga gu mangi mi he, si ka ngba; ono ka oni aúda nga ha ya, i abáfa roni ni ba sa ku rogo gu we nagbi ni ngariangaria ha; da ki ngia gu mbori rengbe ka batasa roni be re?”

¹⁶ASadaraka, Mesaka, na Abebenego ki karaga ha fu bakindo ki ya, “Ako Nebukadenesara, pai ho ka ani karaga ha foro tipa gi pai te re.

¹⁷Ka si du wo, gaani Mbori nga gu ko ani namanga pa ko, ko rengbe ka batasa rani be gu we nagbi ni ngariangaria ha; Ako bakindo, ko abátasa rani be ro.

¹⁸Ono ka si adú nga wo ya, Ako bakindo, mo ini he, ya ani amánga nga pa gamo ambori watadu uda gu kpiahe du ni dahabu mo adua ha a te.”

¹⁹Nebukadenesara ki zingi ni ngariangaria zinga, pa aSadaraka, na pa Mesaka, na pa Abedenego adu nga bangiriko wa mbata te. Ko ki rugu he i ginda we si foi susi gu nidu mbata wa bara saba.

²⁰Ko ki rugu agu yo nangia airaome dagba gako rikavura i vodi aSadaraka na Mesaka na Abedenego, ki bafu yo ku rogo gu we nagbi ni ngariangaria ha.

²¹I ki vodi agi akumba re na kina gayo roko nduhe ti yo na gayo baukadi, na gayo gbanga roko, na kura gayo aremu, ki bafu yo ku rogo gu we nagbi ni ngariangaria ha.

²²Mirãwe ki imi agu aboro nabafu aSadaraka na Mesaka na Abedenego, bambiko ga bakindo rugute adu ni nyanyaki he we ki nigbi ririri ki susi.

²³Agi akumba biata re, nangia aSadaraka, na Mesaka, na Abedenego, i ki tiwi ni vodivodi yo ku rogo gu we nagbi ni ngariangaria ha.

²⁴Bakindo Nebukadenesara ki kigi akiga ki guari ku ari ni ngarã. Ko ki ya fu gako abasapungbanga, “A nga ani nibafu aboro biata ni vodivodi yo ku rogo we yo te?” I ki karaga ha fu bakindo ki ya, “Ako bakindo, rengo du.”

²⁵Ko ki karaga ha ki ya, “Ono mi bi aboro biama ni zakizaki yo, i nita ata rogo we yo, ka i agbi nga ya; ngbanya gu biama ni ki du wa ngbanya wiri ambori.”

²⁶Si du Nebukadenesara ki mbedi ku pa ngbadimo gu we nagbi ni ngariangaria ha ki ya, “Sadaraka, na Mesaka, na Abedenego, oni nga avuru gu Mbori nga Bahe ki susi, oni kúru, ki ye kono!” ASadaraka ki kuru rogo we yo na Mesaka na Abedenego.

²⁷Si du abanyaki, na agbia, na abaira abazogo, na abasapungbanga, ki dungura tiyo wa sa ki bi gu pai nga we arengba nga na manga kpoto agi akumba te re; mangeriyo agbi nga a te, ka gayo roko nduhe adu nga akia ya, fuõ we adu nga ti yo wa sa te.

²⁸Nebukadenesara ki ya, “I sámbua Mbori nga ga Sadaraka ko, na ga Mesaka, na ga Abedenego a, nga gu ko kedi gako maraika ki batasi agu avuruko nakida kuti ko, ki sa sangba bakindo ni kungba pai, nga agu yo pa mbu pa kpotoyo angba ti yo, susi manga pa kura mbori ki udi he, ono kina gayo Mbori sa.

²⁹Si du ru mi ndika ti ni: Agu aboro, na arikaaboro, na ngbatunga aboro na afugoyo dunduko ka gumba pai kuti ga aSadaraka Mbori, na ga Mesaka, na ga Abedenego, i akáfa yo ngbudongbudo ti angbazungayo, ki gbarasi gayo akporo; bambiko a nga kura mbori ho nga gu ni rengbe ka batasa boro wa gi te re.”

³⁰Bakindo ki kiisi pa aSadaraka, na Mesaka, na Abedenego rogo ngbi Babera.