Read zande Daniere 4 Bible Online

Daniere 4 - zande bible

Daniere 4

¹Bakindo Nebukadenesara fu aboro dunduko, na fu arikaaboro, na fu ngbatunga aboro na afugoyo, nga agu yo naraka auru kpotosende dunduko: Zereda moi pai fu roni!

²Si adu ni wenepai bangire ka yugo gu yuguyuguapai na iiriwoapai mangi Mbori fere nga Bahe ki susi.

³Na nge gako yuguyuguapai! na nyaki gako iiriwoapai! Gako ngbi nga nyenye ngbi, gako zogarago natona ti gu rikaaboro sa gu rikaaboro.

⁴Mi nga Nebukadenesara adu na zereda kpure, gimi apai ki u au gbe rogo gi bambu bakindo.

⁵Mi arari musumo nga gu nagundesi re; wa mi api auru barame gu iiriwo berã na pa yuguyuguapai nadu rogo gi berã afudi re.

⁶Si du mi aru ndika ya i ye na agu airatatamana dunduko ku bangire du Babera no, i yugu sangba gu musumo re fere.

⁷Si da abinza ki rimi fuo re na ainibirĩ tatamana, na aKasado, na airasoroka a; mi ki gumba pa gu musumo re fu yo, ono i arengba nga ka yugo sangbaha fere te.

⁸Daniere ki rimi ku bangire ni yangara yo nga gu ko i ayambu rimoko nga Beretesasara nga rimo gi mbori, nga gu ko du gu toro ti ko nga ga ziazia mbori mi ki gumba pa gu musumo re fu ko, ki ya,

⁹“Ako Beretesasara, gbia abinza, bambiko mi ini he ya gu toro nga ga ziazia mbori du rogo ro yo, a nga okooko pai ho kpakara foro a te, gu musumo nga gu mi abi du re; mo gúmba sangbaha fere.

¹⁰Gu yuguyuguapai nga ga gi berã wa mi api auru barame du re: mi angere ki bi ngua auru kpotosende; bagizaha adu ni bagbanga ha gbe.

¹¹Gu ngua re asono ki sa tihe ni banyanyaki he, rihe ki da kina ku ngbangbaturũ yo, i ki bi he ti digida kpotosende yo dunduko.

¹²Akpehe adu ni wene he, zuzuhe ki du zoozoo, riahe ki du ti ni tipa aboro dunduko. Anya nvuo anaru tii nzeremehe, azire ari ki niraki ti abehe, aboro dunduko naariga tiyo na zuzuhe.

¹³“Mi abi he rogo yuguyuguapai rogo gi berã wa mi api auru barame, mo ngére, babandarago azorõ ngbangbaturũ yo nga gu kparakpara ko.

¹⁴Ko apoi ni wawa ki ya wẽ, ‘I dé gu ngua re ku sande ki kafu abehe, ki zura akpehe ku sa yo ki misika zuzuhe; anya óro tii he, azire ki gundu ti abehe.

¹⁵Ono i mbú tarã rukurumoho ku sende yo, ki vo ho ni giri marã na sirigi, rogo gu wesewese nvuo ati yo. I mbú ko ko zirĩ be ndomo; ko ki sungu na anya nvuo kpotosende no;

¹⁶gako berã sá tihe ti ga boro, i fú berã fu ko wa ga nya; ringbisiringbisi rago ki susi ri ko wa bara saba.

¹⁷Gi pai re du mbiko gu ndika nga ga ababandarago, gu sarangbanga du mbiko gu pai nga ga kparakpara yo, ya unga aboro ini he ya gu Ko nga Bahe ki susi nazoga gu ngbi nga ga aboro, ko nafu he fu gu ni ko akpi nyemu ka fu he fu ni, ki moi agu yo ku ri he nga umba pa aboro.’

¹⁸Gi musumo re, mi abi he, mi nga Bakindo Nebukadenesara. Na mo, Ako Beretesasara, mo yúgu sangbaha, bambiko agu airatatamana dunduko nga ga gi ngbi arengba nga ka yugo sangbaha te, ono mo rengbe, bambiko gu Toro nga ga Ziazia Mbori du ti ro.”

¹⁹Si du ngba Daniere azere tipa rago ngbutuko, gako aberã ki fudi ko, nga gu ko kura rimoko angia Beretesasara. Bakindo ki ya, “Beretesasara, ka gu musumo re na sangbaha fúdi nga ro ya.” Beretesasara ki karaga ha, “Gi gbia, gu musumo re dú tipa agu yo nasoga ro na sangbaha tipa avuraro!

²⁰Gu ngua mo abi, nga gu nasono ki nyaki, rihe ki da kina ku ngbangbaturũ yo, i ki bi he ti digida kpotosende yo dunduko;

²¹du akpehe ni wene he na zuzuhe zoozoo, nga gu du riahe ti ni fu aboro dunduko; tii nzeremehe anya nvuo napika ni, azire ari ki niraki ti abehe―

²²Ako bakindo, si nga mo, sono ki du nyanyaki. Ga nyaka sono ki da ku ngbangbaturũ yo, na ga zogarago ki da kuti digida kpotosende yo.

²³Ho bakindo abi babandarago ni, gu kparakpara ko, ko nizorõ ngbangbaturũ yo ki ya, ‘I dé gu ngua re ki gbarasi he, ono i mbú tarã rukurumoho ku sende yo, ki vo ho na giri marã na sirigi, rogo gu wesewese nvuo ati yo; i mbú ko ndomo zirĩsi ko; ko ki sungu na anya nvuo yo, daho ringbisiringbisi rago ka susa ni ri ko wa bara saba’;

²⁴sangbaha nga gere, Ako bakindo: Gu Ko nga Bahe ki susi ringbisi gu pai ye ku ri gi gbia nga bakindo,

²⁵ya i adó ro dagba aboro, ga baraka ki du kina dagba anya nvuo; i asá ro mo niri nvuo wa babagara, ndomo ki zirĩsi ro, ringbisiringbisi rago ki susi ri ro wa bara saba, daho mo ka ina ha ni ya gu Ko nga Bahe ki susi nazoga gu ngbi nga ga aboro, ko nafu he fu gu ni ko akpi nyemu ka fu he fu ni.

²⁶Wa ko arugu he i mbu tarã rukurumo ngua, ga ngbi adú foro ni rengo ti gu rago mo ka ina ha ya Ngbangbaturũ nazoga rago.

²⁷Si du, Ako bakindo, mo ídi gu pai rugu mi foro; mo mbú gamo ingaapai ni manga rurupai, na ga irairaapai ni yugo inapai fu rungorungo aboro, si ngia zezeredi rago ka du ni gbanga ha foro.”

²⁸Agi apai dunduko re si aye ku ri Bakindo Nebukadenesara.

²⁹Ti digida 12 diwi wa ko ata ri bambu yo nga ga bakindo Babera yo,

³⁰bakindo ki ya, “A nga gere nga gu bakere Babera, nga gu nti adua be gu nyaka nga ga gi ome wa ga bakindo kporo na tipa gu taarimo nga ga worimore, te?”

³¹Ho agu apai adu ni re kina ku ngba bakindo, fugo ki ye ngbangbaturũ yo, “Ako Bakindo Nebukadenesara, mo i agumba gi pai foro re: Ngbi guari be ro,

³²i adó ro dagba aboro, ga baraka ki du dagba anya nvuo; i asá ro mo niri nvuo wa babagara; ringbisiringbisi rago ki susi ri ro wa bara saba, daho mo ka ruga tiro ni ya gu Ko nga Bahe ki susi nazoga gu ngbi nga ga aboro ki nifu he fu gu ni ko akpi nyemu ka fu he fu ni.”

³³Gu pai ki da ti Nebukadenesara ni ba sa re. I ki do ko dagba aboro, ko ki niri nvuo wa babagara, kpotoko ki zirĩ dodoi be ndomo daho mangeriko afuna ni ni bagbanga ha wa kina sue dingimo, sisiaga awirinzagako ki kukuru wa sisiaga zire.

³⁴Ti digida ragoho, mi nga Nebukadenesara atuka bangire ku ngbangbaturũ yo, gi berã ki karaga tihe fu kina re, mi ki sambua gu Ko nga Bahe ki susi, ki nitaasi rimoko ki niirisi ko nga gu ko du ni ungako nye anye kindi; bambiko gako zogarago nga nyenye zogarago, gako ngbi ki nye anye tona ti gu rikaaboro sa gu rikaaboro;

³⁵i gedi araki kpotosende no dunduko wa kungbahe; ko namanga pai dagba rimbasa ahe ngbangbaturũ yo wa ko akpi nyemu he, na dagba araki auru kpotosende no; a nga boro ho rengbe ka ka fu ko watadu ya fu ko, “Gini pai mo amanga ha?” wa sa te.

³⁶Ti kina gu rago re gi berã akaraga tihe fu kina re; gi worimo akaraga tihe fere na gi irisa tipa gu taarimo nga ga gi ngbi. Gimi abasapungbanga agbata re, na gimi agbia, mi ki du ni nyakasinyakasi re rogo gi ngbi, i ki nigbia pa nyaka fere kindi.

³⁷Were mi nga Nebukadenesara taasi rimo Bakindo nga ga ngbangbaturũ ko, ki niirisi ko ki nitambua ko; bambiko gako mangaapai dunduko nga ruruhe; gako apai ki du ni rengo; ko rengbe na umbasi agu yo nata na ruka.