Read zande Daniere 6 Bible Online

Daniere 6 - zande bible

Daniere 6

¹Si angba ti Darayawesa ka maa abanyaki ku ri angbi 120, i du rogo ngbi dunduko;

²na bakere agbia biata ku ri yo, Daniere adu dagba agi yo biata re, ya agi abanyaki re i niringbisi pai fu yo, i nibanda pa ga bakindo pai ka si agberã nga be pai wa sa ya.

³Gi Daniere re pa ko asusi pa kura bakere agbia na pa abanyaki, bambiko toro rengbanapai adu rogo ko yo; bakindo aberẽ pa maa ko ku ri ngbi dunduko.

⁴Bakere agbia ki nigbata pai kuti Daniere na abanyaki rogo pa ngbi; ono i abi nga pai kuti ko na gbegberẽpai a te, bambiko ko adu ngangarã, ka i abi nga irairapai kuti ko na gbegberẽpai a ya.

⁵Si du agi akumba re ki ye ki ya, “Ani abí nga pai kuti Daniere te kina gu ka ani gbata pai rogo pa rugute yo nga ga gako Mbori.”

⁶Agi bakere agbia re na abanyaki, i ki dungura tiyo koyo du bakindo ni ki ya fu ko, “Ako Bakindo Darayawesa, mo nyé ni ungaro!

⁷Bakere agbia dunduko du ku ri ngbi na agbia na abanyaki, na abasapungbanga na abaira abazogo idi gu pai nga bakindo ru ndika ki fu nyanyaki rugute nga ka boro kpári fu kura mbori watadu fu boro rogo gi rame 30 re, fuo kina ro, Ako bakindo, i abá ni ku sima abahu yo.

⁸Awere, Ako bakindo, mo nyákasi gi ndika re ki moi fuo bero ti kekehe, ka i arengba nga na sa paha ya, a wa ga aMadaio na aParaso ndika, nga gu ka i asa nga ha ya.”

⁹Bakindo Darayawesa ki moi fuo beko tie ti gu kekehe re nga ga ndika.

¹⁰Ho Daniere aini he ni ya bakindo moi fuo beko ti gu kekehe re, ko ki ga ku kpuko yo yo abangiri bambu adu ni ti gu vuru bambu nadu ku ari ni zaza ha ku Yerusarema yo; ko ki nikuku ngba rukusuko wa bara biata na uru nikpari nifu tambuahe fu gako Mbori, a wa ko anamanga ha mbata.

¹¹Si du agi akumba re ki dungura tiyo ki bi Daniere ko nizungadi he nikpari kpe ku bangiri gako Mbori.

¹²I ki ndu ki mbedi ki gumba pai fu bakindo, tipa ga bakindo ndika, ki ya “Ako bakindo! Mo amaa nga fuo bero ti ndika te? ya gu boro ka sana kura mbori tipa he watadu boro, rogo gi 30 rame re, Ako bakindo, i abá ni ku sima abahu yo, te?” Bakindo ki karaga ha ki ya, “Rengo nga ha, ku sangba ga aMadaio ndika na ga aParaso, nga gu ka i asa nga ha ya.”

¹³I ki karaga ha kina ku ngba bakindo ki ya, “Gu Daniere re nga gu ko du dagba zizi aboro aYudo, ko aberã nga pa ro te. Ako bakindo, watadu pa gu ndika mo amoi fuo bero ti ni a te, ono ko nakpara gako kpe bara biata na uru.”

¹⁴Ho bakindo agi agi apai ni re, ngbaduko ki imi aima gbe, ko ki moi gako berã tipa batasa Daniere; ko ki asadi ka batasa ko daho uru ati ni.

¹⁵Agi akumba re ki dungura tiyo koyo du bakindo ni, ki ya fu bakindo, “Ako bakindo, mo ini he ya ga aMadaio ndika nga ha na ga aParaso ya a nga ga bakindo rugute ho watadu ndika nga gu ko naru ka i sa ha te.”

¹⁶Bakindo ki gumba pai, i ki ye na Daniere ki ba ko ku sima abahu yo. Bakindo ki ya fu Daniere, “Ga Mbori, nga gu ko mo namanga pa ko kindi, ko bátasiro!”

¹⁷I ki ye na mbia ki moi he ti ngbadimo sima, bakindo ki dika ha na gako údikahe, na ga gako agbia údikadhe, ya ka si sa nga pai tipa Daniere wa sa ya.

¹⁸Bakindo ki ga ku kpuko yo, ki sungu ni gu yuru re na kina gina riahe; i aye nga na umbaro koyo du ko ni wa sa te, rame ki sonzora bangiriko.

¹⁹Bakindo ki guari ngbatutu wiso ka ndu ku pati sima abahu yo ni ngarã.

²⁰Ho ko ambedi ni na sima, yo Daniere adu ni ko ki kpari ni wawa ki ya fu Daniere, “Ako Daniere, nga moyambu unga Mbori, ga Mbori nga gu ko mo namanga pa ko kindi, ko rengbe na batasa ro be abahu?”

²¹Daniere ki ya fu bakindo, “Ako bakindo, mo nyé ni ungaro kindi!

²²Gi Mbori nikedi gako maraika ko kisi ngba abahu, ami amanga nga re te, bambiko mi zanga gbegberẽpai ku bangiriko. Ako bakindo, na ku bangiro a mi amanga nga irairapai te.”

²³Si du bakindo ki wasa gbe ki ya i kusi Daniere sima yo. Si du i akusi Daniere ti ni sima yo, ka i abi nga wiri ngbatunga ima ti kpotoko wa sa ya, bambiko wa ko akida kuti gako Mbori.

²⁴Bakindo ki gumba pai i ki ye na agu akumba naakiti ngbanga Daniere i ki bafu yo ku sima abahu yo i na awiriyo, na adiayo; abahu ki di be yo ki kuadi amemeyo dunduko rukutu mbata i nikati ku mburu sima yo.

²⁵Bakindo Darayawesa ki ke pai fu aboro dunduko na fu arikaaboro, na fu ngbatunga aboro na afugoyo naraka auru kpotosende dunduko: “Zereda moi pai fu roni.

²⁶Mi ru ndika ya rogo gi ngbi dunduko aboro kígi akiga ki nigunde ti ga Daniere Mbori, bambiko ko nga unga Mbori, nye anye kindi; gako ngbi ka i agbárasa nga ha ya, gako zogarago nikanye dati digid arago.

²⁷Ko nakusa aboro ki nibatasi yo, ko namanga yuguyuguapai na iiriwoapai ngbangbaturũ yo na auru kpotosende no a, ko nga gu ko batasi Daniere be ome abahu.”

²⁸Si du gi Daniere re, gako pai ki kpatare akpatare ti rago ga Darayawesa zogarago na ti rago ga Kurese zogarago nangia Paraso a.