Read zande Daniere 7 Bible Online

Daniere 7 - zande bible

Daniere 7

¹Ti gu bambata garã zogarago nangia ga Beresasara bakindo aBabero, Daniere arari musumo ki bi yuguyuguahe rogo gako musumo wa ko api auru gako barame. Ko ake pa gu musumo re, ki gumba pa gu pai re.

²Daniere aya, “Mi abi he rogo gi yuguyuguhe yuru, oni ngere, agu ayuge nidu biama nga ga ngbangbaturũ awo ti bakere baime.

³Bakindigi anya biama ki kuru baime yo, gu ru akia ti kurai.

⁴Gu bambata ru adu wa bahu ki du na pupo dingimo ti ru. Si du wa mi angera koyo apuporu ki mofo k u sa yo du, i ki tumba ru sande ku ari ki rugu ru ngba nduru ue wa boro; i ki fu berã boro fu ru.

⁵Oni ngére, kura nya ki du, gu ue ru adu wa urisi. U aru ngba nduru ku bani sa; u adu na ameme ngazira biata ngba rindiru ngbaru yo; i ki gumba pai fu ru ki ya, ‘Mo gúari, ki riti bakere pasio.’

⁶Fuo gere mi angere, ki bi kura nya, u adu wa mama, na apupo biama wa pupo zire ku giiru yo; gu nya re ki du na ariru biama; i ki asia pa zogarago fu ru.

⁷Fuo gure mi abi yuguyuguapai yuru, oni ngére, biama nya ki du, ni kere ru iriwo airiwokisusina nyaka; u adunabaarindiru wa marã; u ki riti aboro nikua yo rukutu, ki nisimbi gu yangara yo ni nduru. U adu akia ti gu kura anya dunduko naadu mbata fu ru; agbangaru ki du bawe.

⁸Mi aberẽ pa agu agbangaru re, oni ngére, kura gbanga ki kuru berewe dagba akura ha, ni toni he, agu agbanga biata dagba bambata ha ki du ni mofomofo ho ti rigoho be gu toni he; oni ngére, bangirise adu vuru gi gbanga yo re wa kina bangiri boro, na ngbase nagumba bakere apai.

⁹Wa mi angera, i amoi ambatabakindo gu ko nga Bakuru Ko du ho kindi, asungu ri gako basunga; gako remu avuru avura wa morõgumba, mangeriko ki du wa ndikidi mange kandoro; gako mbatabakindo adu wa raurau mirãwe, angbagidaha adu wa gu we nagbi agbi.

¹⁰Mirãwe ki nifu wa wiridi nikuru bara bangiriko; aboro wa kutu akutu naamanga pa ko, aboro wa kutu bawe bara kutu bawe ki ru bara bangiriko; abasapungbanga ki sungu ka sara ngbanga, i ki za akitabu.

¹¹Mi angere tie, bambiko gu bakere apai gbanga agumba ha. Wa mi angera, i ki imi gu nya ki gbarasi pasioru ki fu he i zo ho.

¹²I ki di ga kura anya zogarago be ra ono i aimasi ungara tipa rago ngbutuko na ringbisiringbisi rago.

¹³Mi abi yuguyuguapai yuru, oni ngére, boro aye wa wiri boro rogo mai ngbangbaturũ yo, ko ki da koyo du gu Bakuru Ko ni du ho kindi, i ki mbedesi ko ku bara bangiriko.

¹⁴I aasia pa zogarago fu ko na taarimo na ngbi, ya aboro dunduko, na arikaaboro, na ngbatunga aboro na afugoyo mangi pa ko; gako zogarago nga nyenye zogarago, nga gu nikanyasa nga ya, gako ngoi nga gu ka i agbárasa nga ha wa sa ya.

¹⁵“Tipa re nga Daniere, torore ki nirungo rogo re yo, gu yuguyuguapai mi abi si afudi gi berã gbe.

¹⁶Mi ambedi na gu ni sa dagba agu yo narundu yo ki sana ni tipa gu rengo du tipa agi apai re dunduko. Si du ni agumba ha fere, ki yugu sangba agu apai fere re.

¹⁷‘Gi bakindigi anya du biama re nga abakindo biama nga agu yo nikakura kpotosende no.

¹⁸Ono gu ziazia yo nga ga gu Ko nga Bahe ki susi nikadia ngbi, ki di kumbo ngbi nye anye kindi.’

¹⁹“Si du mi akpi nyemu ka ina rengo tipa gu biama nya re, nga gu ru naadu akia ti agu ra dunduko, du ni kere ru gbe, na arindiru ni marã na sisiaga wirinzagaru nga sirigi; nga gu ru naarita aboro nikua yo rukutu, ki nisimbi yangara yo ni nduru;

²⁰na pa agu agbanga bawe re nga gu du riru yo, na pa gu kura gbanga naakuru nga gu agbanga biata atiwi ku barangba ha, gu gbanga naadu na bangirise ti ni na ngbase nga gu naagumba bakere apai, ki du wa si kii ti akura ha.

²¹Wa mi angera, gi gbanga re aso vura na ziazia aboro, ki di be yo,

²²daho gu Bakuru Ko du ho kindi ada ni, i ki sari ngbanga fu gu ziazia yo nga ga gu Ko nga Bahe ki susi, gu rago ki da ho ziazia yo adi ngbi ni.

²³“Ko aya wẽ; ‘Tipa gu biama nya, biama ngbi adú auru kpotosende, nga gu nikadu akia ti angbi dunduko, si ki riti kpotosende dunduko, ki simbi he ku sande, ki kuadi he mbusumbusu.

²⁴Ono tipa agu agbanga bawe dagba gi ngbi yo re abakindo ka guari ni bawe, kura ni ki guari a fuo yo; ni adú akia ti agu abambata yo, ni ki nizogo agu abakindo re biata.

²⁵Ni agúmba apai kuti gu Ko nga Bahe ki susi, ki nirungburasi gu ziazia yo nga ga gu Ko nga Bahe ki susi, ki niberẽ pa sa arago na arugute; i ki fu ziazia yo ku be ko tipa rago sa, na rago wa bara ue, na bebere rago a.

²⁶Ono abasapungbanga asúnga ka sara ngbanga, i ki di gani zogarago be ni, ka nyasa ha na ka gbarasa ha dati digidaha.

²⁷1 afú ngbi na pa zogarago na gu nyaka nga ga angbi tii ngbangbaturũ no dunduko fu agu aboro nga ga ziazia yo nga ga gu Ko nga Bahe ki susi; gako ngbi adú ni nyenye ngbi, angbi dunduko nikamanga pa ko ki nigi sangbako.’

²⁸“Digida gi pai re du re. Tipa re nga Daniere, gimi aberã afudi re bakere, kpakpure ki sa tihe; ono mi aka kuti gu pai re kina ku berãre yo.”