Read zande Osea 1 Bible Online

Osea 1 - zande bible

Osea 1

¹Gu sangba Yekova naaye koyo du Osea ni nangia wiri Beri, ti rago Uziya, ti rago Yotama, ti rago Aza, na ti rago Izikiya, nangia abakindo aYudo, na ti gu rago nangia ga Yerobama wiri Yoasa, bakindo aYisaraere.

²Ho Yekova agumba pai ni mbata ku ngba Osea, Yekova aya fu Osea, “Mo ndú, ki di de ni diaro nga debari, ki vungu awiri debari ti ri, bambiko ringara mangi pai ni bakere he wa sino pa bari ni mbu yo pa Yekova.”

³Si du ko ki ndu ki di Gomere wiri Diberaima, ri ki du na gude ki batika kumbagude.

⁴Yekova ki ya fu ko, “Mo yámbu rimoko nga Yizerere; bambiko rago ni ngbutuko ho mi ki mbusi ngbatunga Yeu tipa kure Yizerere, mi ki digisi ngbi nga ga ngbatunga Yisaraere.

⁵Ni gu rago re, mi akúa gu mboto nga ga Yisaraere rogo ngboongboorago Yizerere yo.”

⁶Ri ki du na kura gude berewe ki batika degude. Yekova ki ya fu ko, “Mo yámbu rimori nga Nungate, bambiko mi adú nga na nunga ngbatunga Yisaraere berewe te, ka vu yo wa sa te.

⁷Ono mi adú na nunga kina ngbatunga Yuda, mi ki batasi yo na ome Yekova nga gayo Mbori Mi abátasa nga yo na mboto te, na basape te, na pa sovura te, na afarasi te, na abanduri afarasi a te.”

⁸Ho ri ambu ti Nungate ni, ri adu na kura gude ki batika kumbagude.

⁹Yekova ki ya, “Mo yámbu rimoko nga Gimiaborote, bambiko oni nga gimi aboro te, mi adu nga ni gaoni Mbori a te.”

¹⁰Ono gedigedi awiri aYisaraere adú wa ngume baime, arengba nga i ringbisi he na geda ha a ya. Rogo gu ba yo i agumba ha ni fu yo, “Gimi aboro nga oni te,” i agúmba ha fu yo ya, “Awiri unga Mbori nga oni.”

¹¹Awiri aYudo adúngura tiyo wa sa na awiri aYisaraere, i ki sia barumbatayo fu yo sa; i ki kuru ringara yo, bambiko bakere pai nikadu rago Yizerere.