Read zande Osea 11 Bible Online

Osea 11 - zande bible

Osea 11

¹Ho Yisaraere adu ni ni gude, mi I akpi nyemu ko, mi ayambu wire Ezipeta yo.

²Wa mi aniyambu yo dedede kina wo i aniguari ti re; i ki nitumo fu aBara, ki nizo fuõngua fu sese kpiaahe.

³Ono mi ni tire nayugu pai fu aEfuraima i nita, mi arogo yo ku bere; ono i aina nga ha ya mi naahusi yo te.

⁴Mi angbe ku mbata yo fu yo na giri nunga, na agiri nyemuse, mi ki du fu yo wa gu boro nazaka gonga ngba ti biringa ngbayo, mi ki nugadi koyo du yo ni ki rigi yo.

⁵I akáraga tiyo berewe ku ringara Ezipeta yo, Asura adú ni gayo bakindo, bambiko i ka pa karaga tiyo kono du mi ni.

⁶Basape azínga kuti gayo abaakpo ro, ki nyasi angbongbo susu du ti gayo angbadimo, ki nyasi yo tipa boro gayo berã.

⁷Gimi aboro nakpi nyemu ka sa tiyo ti re ku sa yo; si du mi ringbisi yo sa gonga, a nga boro ho nikadia ha te.

⁸Ako aEfuraima, mi awira pa mbu roni waĩ! Ako aYisaraere, waĩ rengbe mi ka fu roni ku be aboro! Waĩ rengbe mi ka sa roni wa gu kporo nga Adama! Waĩ rengbe mi ka manga roni wa Zeboima! Ngbadure yo nanoka tihe rogo re yo, gimi nunga naguari ni wene he.

⁹Mi amánga nga pa gi ngariangaria zinga te, mi agbárasa nga Efuraima berewe te; bambiko mi nga Mbori nga boro te, gu Kparakpara Ziazia Ko du dagba roni, mi ayé nga ka gbarasa bakporo te.

¹⁰I andú fuo Yekova, ko apázuo wa bahu; ii, ko apázuo ni tiko, awiriko ki niye dioyo ni kio;

¹¹i ayé wa azire Ezipeta yo ni kio, wa ambipo ringara Asura yo; mi akáraga yo ku rogo gayo akporo, wo poi Yekova.

¹²Efuraima re azire kuti re gbe, ngbatunga aYisaraere namanga re ni biriki; ono Mbori ini Yuda kindi, Yuda nanye na yososopai fu gu Kparakpara Ziazia Ko.