Read zande Osea 12 Bible Online

Osea 12 - zande bible

Osea 12

¹AEfuraima nariga yuge, ki nido gu yuge naye uroyo na uru pitipiti, i nangeesa pa zire na gbarasapai; i nazunga he na aAsuro, i ki tindi nzeme ku Ezipeta yo.

²Yekova du na ngbanga kuti Yuda, ko ambúsa Yakoba kuti gako apai, ki fu mbusa fu ko kina kuti gako mangaapai.

³Yakoba azi wirinako ti gidako, rukumbu yo, ho Yakoba adu ni ni kumba ko ata kpata na Mbori.

⁴Ko ata kpata na maraika ki di be ko, ko akpari ki nizungadi ko. Ko agbia Mbori Betere yo, yo Mbori afura na ko ni―

⁵Nga kina Yekova nga Mbori nga ga arimbasa ko, Yekova nga rimoko:

⁶“Si du mo akaraga tiro mbiko gu undahe nga ga ga Mbori, mo ka kuti weneringise na ruru sarangbanga, ki nisungudi ga Mbori kindi.”

⁷Yakoba wa babagiahe, du na úringbisaahe nga ga biriki be ko, ko nakpi nyemu ka rungosi aboro.

⁸Efuraima aya, “Ako, ono mi nga irakumuko, mi bi mokiisa kumuko tipa re”; ono gako akumuko dunduko arengba nga ka dia gu irairapai ku sa yo mangi ko te.

⁹Mi nga Yekova nga ga Mbori tona ti du mo ringara Ezipeta yo; mi aída ha foro mo niraki berewe rogo abamburoko yo, wa ti rago ringbisiringbisi pumbo.

¹⁰Mi agumba pai fu anebi; kina mi du naangeesi pa yuguyuguahe, ki nifu apai ni asanza ku ngba anebi.

¹¹Ka irairapai du Girada yo i adú adu wa kungba he; ka ngia Girigara yo i atumo ni ni abaabagara, gayo abamotumo adú a wa kina guguda ambia pangba dede due ati yo.

¹²Yakoba aoro ku ringara Arama yo, yo Yisaraere amangi sunge diade ni, ko ki nibanda akandoro gene diade.

¹³Yekova aye na Yisaraere Ezipeta yo ku be nebi, ko adu ni bandabanda ko a be nebi.

¹⁴Efuraima azingisi pai ni kere pai; si du Yekova ambú kure gako ingapai kina ku ri ko, ki sa gako gbarasarimo kina ku ri ko a.