Read zande Osea 13 Bible Online

Osea 13 - zande bible

Osea 13

¹Ho Efuraima agumba pai ni, aboro akio; ko akiisi pa tiko Yisaraere yo; ono ko adu na pai ku ri ko tipa pa Bara ko ki kpi.

²Awere i namanga ingapai ki susi asusa gbe, ki nimbakadi zaragasizaragasi kpiaahe tipa yo, nga kpiaahe i amangi he ni tatamana rogo gayo feda, si dunduko nga gu mangapai nga ga abangbasia sunge. Ya yo, oni túmo fu agi ahe re. Aboro nanyora awiri bagara ni ngbayo!

³Si du i adú wa kina nduro wiso watadu wa gu ndomo naagunda ngbatutu, wa gu umuhe yuge naaya na ni bataka zende ahe yo watadu wa gu ngime naakura ti bangiri bambu.

⁴Mi nga Yekova gaoni Mbori tona ti rago du oni ringara Ezipeta yo; oni aina nga kura Mbori te, ono kina re, kura batasi du nga ho fuo re te.

⁵Mi du naini roni ngbakungba yo, rogo ngbi ugure;

⁶ono wa gayo banambu adu, wo i ambiki, ho i ambiki ni kpotoyo yo ki niabia tihe; si du bangiriyo ki go ti re.

⁷Si du mi adú fu yo wa gu bahu napazuo, mi agbú wa mama pangba gene.

⁸Mi agbúradi yo wa gu urusi rogo yo awiru be ru, mi agbá ngbaduyo gbagaza, mi ki riti yo kina ho wa bahu, ki sipi yo wa nyarinde nisipi he.

⁹Ako Yisaraere, mi agbarasa ro, mi nga ga undahe.

¹⁰Wari du ga bakindo ni awere rengbe ka batasa ro? wari du gamo abazogo ni dunduko nga agu yo mo niya tipa yo, “Mo fú bakindo fere na abazogo”?

¹¹Mi fu abakindo foro rogo gi dingidingi ngbaduse, mi rogo yo be ro rogo gi era.

¹²Mi vo ga Efuraima irairapai du, gako ingapai du ni bandabanda ha ku baigaahe yo.

¹³Gu imisiri nga ga vunga gude da ti ko, ono ko nga gu wiri boro zanga tatamana; bambiko awere ko ayugo nga tiko ti ngba rukumbu te.

¹⁴Mi batasi yo be gu tandu nga ga Baatoro kpikpi aboro? Mi tumo yo be Kpio? Ako Kpio, wari du ga tata akaza ni? Ako Baatoro kpikpi aboro, wari du ga gbarasahe ni? Nunga ni okooko he ti bangire.

¹⁵Ono ka ko vura zugasi tiko ki susi awirinako, gu bayuge naaya uroyo, ga Yekova bayuge si ayé, ki guari ngbakungba yo; gako gugaabi auguda dú, gako guga ki ugudi a; si agbárasa pa gako baigaahe nga kikiipaahe dunduko.

¹⁶Somorona akpída kina gaha apai, bambiko si sa mungu kuti gaha Mbori; i akpíka be basape, gayo rukutu yo akúadi rukutu, i asípa rogo agu ade du na gude.