Read zande Osea 4 Bible Online

Osea 4 - zande bible

Osea 4

¹Ako awiri aYisaraere, oni gí sangba Yekova; bambiko Yekova nati kangu na araki rogo gi ringara re. Bambiko yososopai watadu weneringise ho te, na ina pa Mbori rogo gi ringara re te;

²ono kina zungahe ni wia du ho, rezire, imoaboro, dĩahe na manga bari; i mbu manga pa rugute dunduko, imoaboro fuo imoaboro.

³Si du ringara akpara kpenunga ti ni, agu aboro dunduko naraka rogo ho naruna, anya nvuo a, na azire ari; zavura atĩo baime i zi ra du.

⁴Ono ka boro dárĩ nga kangu ya, ka i kíti nga ngbanga boro a ya, Ako boromotumo, bambiko gi kangu na mo.

⁵Mo akótoka uru, nebi gbia kuti ro akótoka yuru; mi abá namo ku sa yo.

⁶Gimi aboro gberẽ be zingo inahe; bambiko wa gindiga mo inahe, mi gindiga ro a ti du mo ni boromotumo fere. Wa bangiro nago ti ga gamo Mbori rugute, bangire ago a ti awiro.

⁷Wa i azuga susi, kina wo i amanga ingapai ki susi kuti re; mi asá gayo taarimo ku rogo pa zee.

⁸I nariga tiyo be gu ingapai nga ga gimi aboro; kina boro nyemu gayo irairapai du ti yo.

⁹Si ki du were, wa du aboro, wo du aboromotumo; mi ambúsa yo tipa gayo apai, ki iri bape ti yo tipa gayo mangapai.

¹⁰I ari he, ono ka i ambí nga ya; i amánga bari, ka i azúga nga ya; bambiko i mbu Yekova sa berã kina pa bari.

¹¹Imekakue na vovo imekakue di rugatinapai ku sa yo.

¹²Gimi aboro nasana gu he nga ngua tipa pai, gayo ngau nayugo pai fu yo. Bambiko nyemu pa bari ngbe fu yo ku mbata yo ki ingisi yo, i ki mbu gayo Mbori ki nimangi kina pa bari.

¹³I natumo ri abaagangara yo, ki nizo fuõngua ri agangara, tii agero, tii ngua ribine, na tii ngua terebinata, bambiko nzeremehe ngba. Si du awironi nga ade ki nimangi sino pa bari, na gaoni rogorogo ade ki nimangi bari.

¹⁴Mi ambúsa nga awironi nga ade ho i amanga sino pa bari ni, gaoni rogorogo ade a ho i amanga bari ni te; bambiko akumba ni tiyo nandu ku bani fuo pa bari, ki nitumo ni sino adebari, aboro zanga rugatinapai anau ki da ti gbarasa tiyo.

¹⁵Ako aYisaraere, ka oni vura manga bari vurũ, ka oni ídi nga ha fu aYudo i dú na pai ku ri yo ya. Ka oni rimi nga ku Girigara yo ya, ka oni andú nga ku Beta-avena yo a ya, ka oni zúnga nga he ki ya, “Wa du Yekova ni ungako,” ya.

¹⁶Wa nyanyakiri paranga nabagara, wo du aYisaraere a na nyanyaki riyo; Yekova rengbe ka riga yo awere wa wiri kandoro rogo kpaima banambu?

¹⁷Efuraima kpamia tiko kuti kpiaahe, oni mbú ko.

¹⁸Wa rika aboro nga ga akpiimekakue, i fu tiyo sa bari; i nakpi nyemu pa zee susi gayo taarimo.

¹⁹Yuge kaĩ yo ku tii pupoho yo, i adú na zee be pa gayo abamotumo.