Read zande Osea 5 Bible Online

Osea 5 - zande bible

Osea 5

¹Ako aboromotumo, oni gi gere! Ako ngbatunga aYisaraere, oni dége turoni! Ako ngbatunga bakindo, oni yé turoni! Bambiko sarangbanga du tipa roni; bambiko oni nidu ni gbina Misipa yo, ni pio gbaragi tihe ri Tabora.

²I ge due dudungura nga Sitimi; ono mi azá yo dunduko.

³Mi ini Efuraima, ka i oko nga Yisaraere ti re ya; Ako Efuraima, bambiko mo mangi sino pa bari awere, Yisaraere ki biriko.

⁴Gayo mangaapai aida nga ha fu yo i karaga tiyo berewe fu gayo Mbori te. Bambiko nyemu pa bari du rogo yo yo, ka i aina nga Yekova ya.

⁵Gu ruka nga ga Yisaraere du ni dezirepai kuti ko; Efuraima akóta mbiko gu pai dũ ku ri ko; Yuda akóta a wa sa na yo.

⁶I andú na arimbasa gayo akandoro na arimbasa gayo zogozogo anya ka gbata Yekova, ono i abi nga ko te; bambiko ko di tiko ti yo ku sa yo.

⁷I amangi pai ni biriki fu Yekova; bambiko i avungu agude ti auro. Fogo diwi aríta yo awere na gayo aati.

⁸Oni vú nambongo Giba yo, na mbanya Rama yo. Oni zigbasi rago Beta-avena yo; Ako Benyamina, mo kío!

⁹Efuraima adú wa bate rago zaapai; mi taki pande gu pai nga ga rengo dagba angbatunga aYisaraere.

¹⁰Abazogo aYudo sa tiyo wa agu yo gbisi úyugo bangbandarago; mi aúka gi dingidingi ngbaduse ku ri yo wa ime.

¹¹I rungosi Efuraima, i di be ko rogo sarangbanga, bambiko i abi ko ko nindu fuo kungba pai.

¹²Si du mi du wa gbaru fu Efuraima, wa gu ugu ngua nakuruka fu ngbatunga aYudo.

¹³Ho Efuraima abi gako kaza ni, Yuda ki bi gako oro a, Efuraima ki ndu ku Asura yo, ki kedi sunge koyo du Bakindo Yarebe ni. Ono ko arengba nga ka husa roni te watadu husa gaoni oro a te.

¹⁴Bambiko mi adú wa bahu fu Efuraima, wa paranga bahu fu ngbatunga aYudo. Mi, boro mi, mi asípa yo ki guari, mi andú na yo ku sa yo, ka boro abátasa nga yo wa sa ya.

¹⁵Mi akaraga tire berewe ku rogo gi ba, daho i ka kusa pa gayo tindika ni ki gbata kpakpure, ki nigbata re rayo gayo fudifudipai, niya.