Read zande Osea 6 Bible Online

Osea 6 - zande bible

Osea 6

¹“Oni yé, ani káraga tirani koyo du Yekova ni; bambiko wa ko asipi rani, ko húsi rani; wa ko ata rani, ko avóda gaani oro.

²Fuo uru ue ko ki ungasi rani berewe; ti biata uru ko atumba rani ku ari, ya ani du ni ungarani ku bara bangiriko.

³Ani ini ko, ani gbisi ku mbata yo ka ina Yekova; gako kura ku mbata yo nga rengo wa kura uru ngbatutu dedede; ko ayé fuo rani wa mai, wa mamu yangara mai nana nga gu natuda kpotosende.”

⁴Ako Efuraima, gini he mi ka manga na mo? Ako Yuda, gini he mi ka manga na mo? Gaoni nyemuse du wa kina nduro wiso, wa gu ndomo nauga ngbatutu.

⁵Si du mi dewe yo ku ngba anebi, mi imi yo na fura ngbare, gi sarangbanga ki nikuru wa imarago.

⁶Bambiko mi nakpi nyemu wene ringise, motumo te, pa ina Mbori, si susi ti pa zozo amotumo.

⁷Ono i agu auru mokido Adama yo; yo i amangi pai ni ni biriki kuti re.

⁸Girada nga bakporo amangi gbegberẽpai, du ni birikobiriko ho be kure.

⁹Wa abatuka nasunguda boro, kina wo aboromotumo nakpamia tiyo wa sa; i imi aboro ngba gene ku Sekeme yo, ii, i mangi aboro ni wasiro.

¹⁰Mi bi kere gbegberẽpai dagba ngbatunga aYisaraere; ga Efuraima pa bari du yo, si birikosi Yisaraere.

¹¹Ono tipa roni a, Ako aYudo, i ringbisi regbo keahe. Ho mi akpi nyemu ka karaga gimi aboro ni gene zia yo yo,