Read zande Osea 7 Bible Online

Osea 7 - zande bible

Osea 7

¹ho mi akpi nyemu ka husa Yisaraere ni, gu irairapai nga ga Efuraima ki kuru, na gu gbigbitapai nga ga Somorona a; bambiko i mangi pai ni biriki, iradĩ rimi ku dimo yo, abagbuahe ki nigbu ahe zegi yo

²Ono i aberã nga pa ha ya mi tingidi pa gayo gbigbitapai dunduko te. Awere gayo mangaapai ke pati yo, si du kina ku bara bangire.

³I nangiisa gayo bakindo na gayo gbigoitapai, na abazogo a be gayo biriki.

⁴I dunduko nga airabari; i wa kina gindadigindadi gbigiwi, baudi kpokuta nambu utuda we ti ni, tona ti puta ngungo daho agbooro ka ndu ni rogo ho du.

⁵Ti rago gaani bakindo, abazogo akaza be gu faarago nga ga imekakue; ko tai beko wa sa na airasawia.

⁶Bambiko ngbaduyo nagbi be biriki wa kina gbigiwi; gayo zinga nakf riaria yuru sasasa; wiso si ki ngaria wa kina mirãwe.

⁷I dunduko du fafoi wa gbigiwi, i ki riti gayo abasapungbanga. Gayo abakindo kpi dunduko; a nga boro sa dagba yo yo nayamba re te.

⁸Efuraima nakpamia tiko na aboro; Efuraima du wa rukutu zozo kpokuta i aria nga ha ku bani ya.

⁹Akare nyasi omeko dú, ka ko aina nga ha ya; pusi mangeri du riko yo, ka ko aina nga pa ha ya.

¹⁰Gu ruka nga ga aYisaraere nga dezire kuti ko; ono i akaraga nga tiyo kóyo du Yekova ni nga gayo Mbori te, i agbata nga ko a tipa agu apai re dunduko te.

¹¹Efuraima du wa kina mbipo, wa mumungo ru zanga wene berã, wa yambu yo he ku Ezipeta yo, nindu yo ku Asura yo.

¹²Wa i andu, mi azáraga gi pio ku ri yo; mi azóga yo ku sande wa azire ari; mi ambúsa yo ku sangba gayo gumbapai yo.

¹³Na gberẽ he fu yo, bambiko i ingi ti re! Gbarasapai dú fu yo, bambiko i sa mungu kuti re! Mi aidi ka tumo yo, ono i gumba kina zire kuti re.

¹⁴I akpara nga fere ku kpotoyo yo te, ono i yoro wawa auru gayo abarame; bambiko i nadewa tiyo tipa zende ahe na imekakue, i sa mungu kuti re.

¹⁵Wa vura mi yugo pai fu yo ki nyakasi beyo, ono i ta sangi gbegberẽpai kuti re.

¹⁶I sa tiyo fuo Bara; i wa mboto biriki, gayo abazogo akpíka be basape bambiko gu wasiro du ngbayo yo. I aúmo yo tipa gere ringara Ezipepeta yo.