Read zande Osea 9 Bible Online

Osea 9 - zande bible

Osea 9

¹Ako aYisaraere, ka oni ta ngí nga ya! Ka oni dú nga pusiapusia wa kura aboro ya; bambiko oni mangi bari, ni mbu oni gaoni Mbori. Oni akpi nyemu ga irabari ngbengbe marã bataka ahe yo dunduko.

²Bataka ahe na bapira imekakue ariga nga yo te, vovo imekakue ati bungudu be yo.

³I anyé nga rogo ga Yekova ringara te; ono Efuraima akáraga tiko berewe ku Ezipeta yo, i ki niri kina gbegberẽ riahe Asura yo.

⁴I aúka nga amotumo imekakue fu Yekova te; ka i angbá nga ti ko tipa gayo amotumo a ya. Gayo riahe adú wa ga akparikpe; agu yo dunduko nikari ngbatunga ha adú ni bibiriko yo; bambiko gayo riahe adú tipa kina gayo gomoro; si ayé nga ku rogo ga Yekova bambu yo te.

⁵Gini he oni akamanga ti gu ringbi siringbisi rago nga ga pumbo, na ti rago ga Yekova pumbo?

⁶Bambiko oni ngére, i naguari pati gbarasapai ku sa yo; Ezipeta nikadungura yo, Memefi akpísida yo. Asakokoso adia be gayo kikiipaahe du ni feda; akiwe akúra vuru gayo abamburoko yo.

⁷Rago mbusa da, rago tumo bape da; aYisaraere aina ha. Nebi du wa mumungo boro, gu boro du na gbegberẽ toro nga irapupo, bambiko pa gaoni bakere ira irapai, na gaoni bakere sogote.

⁸Nebi du ni babandarago nga ga Efuraima ko, nga ga gi Mbori aboro, ono ga baziazire gbina du ngba gako agene dunduko, na sogote rogo ga gako Mbori bambu yo.

⁹I wasi tiyo awasi ki susi wa si adu rago Giba: ko atingida gayo irairapai atingida, ko ambúsa yo tipa gayo ingaapai.

¹⁰Yekova aya: Mi abi aYisaraere wa rindi bakakue ngbakungba yo. Mi abi abaroni wa bambata zuzu vurumo ti nguaha, ti bambata garã zu he a. Ono i aye ku Bara-peoro yo, ki kpara tiyo fu Bara, ki sa tiyo ni sogosogo he, wa kina gu he i nakpi nyemu he ni tiyo.

¹¹Ga Efuraima taarimo agú ku sa yo wa zire— vungu te, gbe na gude a te, du na mobara a te!

¹²Ka i vura mbu ti awiriyo, mi azangasi yo daho gu ni ka anye nga ni sa ya. Na gberẽ he fu yo ho mi ka guari ni pati yo!

¹³Awiri Efuraima, wa bi mi yo, i du ni kparakpara yo wa umozi; Efuraima angbé ku mbata yo fu awiriko sa imo yo.

¹⁴Osea ki ya, Ako Yekova, mo fú he fu yo— ono gini he mo ka fu? Mo fú rukumbu ti agude fu yo na ugudiri mamuse.

¹⁵Yekova aya: Gayo gbigbitapai dunduko du Girigara yo; yo mi atona ka soga yo ni. Bambiko gu gbegberẽpai nga ga gayo mangaapai mi adó yo vuru gi bambu yo ku zegi yo. Mi akpi nga nyemu yo berewe te; gayo abazogo dunduko nga airasamungu.

¹⁶Mi ta Efuraima, tarãyo ugu du, i azú nga te. Ka i vura vunga agude, mi aimo agu awiriyo i akpi nyemu yo.

¹⁷Osea ki ya, Gi Mbori abáfa yo ku sa yo, bambiko i adega nga tuyo fu ko te; i adú ni yarayara aboro ku dagba arikaaboro yo.