Read zande Yoere 1 Bible Online

Yoere 1 - zande bible

Yoere 1

¹Gu pai nga ga Yekova naye koyo du Yoere ni, nga wiri Petuere;

²Oni nga gbinza aboro, oni gí gere, oni a nga araki rogo ringara dunduko, oni yé turoni! Ngbatunga gi pai re amangi rago roni, watadu ti rago abaroni?

³Oni gúmba pa ha fu awironi, awironi ki gumba ha fu awiriyo, awiriyo ki gumba ha fu gu kura ngbatungayo.

⁴Gu he a wiri ayere ambu he, gugu ayere ki riti he. Gu he gugu ayere ambu he, abakirigba ki riti he, na gu he abakirigba ambu he, ayere gbarasangbi ki riti he.

⁵Oni nga akpibuda, oni zíngi rame yo, ki nikpari; oni nga ambiri imekakue dunduko, oni yóro wawa, tipa nzinziri imekakue, bambiko i di he ti ngbaroni ku sa yo.

⁶Bambiko rikaaboro naye sa gi ringara, nga airaome i arengba nga ka geda yo ya; rindiyo wa rindi abahu, gburukayo wa ga nabahu.

⁷I gbarasi gimi abakakue, ki sapu gimi angua avurumo; i yuku sisihe ki ba ha ku sande; abehe du ni vurusivurusi he.

⁸Oni kpári wa gu ngasu de vo roko gira tipa gu kumba napazua ri rago parangari.

⁹I rogo motumo riahe na mbirimbiri motumo ku sa yo rogo ga Yekova bambu yo. Aboromotumo nakpara ni nunga, nga amangi pa ga Yekova sunge.

¹⁰I gbarasi aati, ringara nakpara ni nunga; bambiko i gbarasi zende ahe, vovo imekakue nanyota, nzeme nanyasa a.

¹¹Ako oni nga abasopobino, oni dú na zee, Ako oni nga ababanda abakakue, oni yóro wawa, tipa nganu na he wa mapunga; bambiko zuzu aũati gberẽ.

¹²Bakakue nauga, ngua vurumo nakpi. Rindi ngua wa ndavu, na mbiro a, na rindi ngua wa ga manga na agu angua du ati yo dunduko si ugu dũ; ngbarago ti awiri aboro a te.

¹³Ako aboromotumo, oni úkadi mbuzaroko ki nita ngbaduroni na kpenunga, Oni nga amangi pa bamotumo, oni tá wawa. Ako oni nga amangi pa gi Mbori, oni rími, oni rá yuru na mbuzaroko ti roni! Bambiko i ka na motumo riahe na mbirimbiri motumo ti ga gaoni Mbori bambu.

¹⁴Oni kpára rago tipa gina riahe, oni yámbu irisiirisi gbuu. Oni dúngura abaakumba na araki rogo ringara dunduko ku tii ga Yekova bambu yo nga gaoni Mbori; ka kpara fu Yekova.

¹⁵Ako rungo du tipa gu rago re! Bambiko rago Yekova nambeda, si naye wa gu gbarasahe du be gu Ko du na tandu apai dũ.

¹⁶A nga i di riahe ku sa yo bara bangironi, na ngbarago na du pusiapusia ti ga gaoni Mbori bambu yo te?

¹⁷Tunga ahe nazirã ku tii mbadambada sende yo, asoro nye ni ku he; agbamu ni kurugboho bambiko zende ahe ugu ni agba ha.

¹⁸Ako anya nauko! Si kpakara fu rimbasa zogozogo anya bambiko banambu tipa ra te; zavura arimbasa akandoro ami ni mbumbu ra.

¹⁹Ako Yekova, mi nakpara foro. Bambiko we riti abanambu ngbakungba yo, mirãwe ki zo angua dunduko ringara aati yo.

²⁰Zavura anya nvuo ami nakpara foro mbiko ime wiriadi ugudi dũ, we ki riti abanambu ngbakungba yo.